Josué 16 - Bible in Tzotzil de Chenalhó with Deuterocanon

Sc'oplal yosilic Efraín xchi'uc Manasés

¹ Li osil ic'ot ta stojol smomnich'nabtac Josee te xlic batel ta sloq'ueb c'ac'al ta uc'um Jordán xchi'uc ta Jericó c'alal to ta nio'etic yu'un li Jericoe. Te xbat ta xocol banamil; te xmuy batel ta Jericó ta toyolaltic yu'un Bet-el.

² Te xlic batel ta Bet-el, ja' li Luz yan sbie; te xjelov batel ta yosilal arquitaetic c'alal to ta Atarot.

³ Ts'acal te xlic batel noxtoc ta stuq'uil smaleb c'ac'al ta yosilal jafletaetic c'alal to ta sts'aquic xchi'uc Bet-horón ta olon; xc'ot c'alal to ta Gezer. Te xlic batel noxtoc, xc'ot loc'uc ta muc'ta Nab Mediterráneo.

⁴ Li yosilic laj yich'ic li jchop liquemic ta Manasés xchi'uc ta Efraine, ja' li smomnich'nabtac Josee, ja' jech xbat chac li'i:

⁵ Ti c'u smuc'ul yosilal laj yich'ic ta jujuchop sbiic li jchop liquemic ta Efraine te xlic batel ta sloq'ueb c'ac'al yu'un Atarot-adar c'alal to ta Bet-horón ta cajal.

⁶ Te xlic batel noxtoc xc'ot c'alal to ta muc'ta Nab Mediterráneo. Li sti' yosilalic te ta stuq'uil nortee ja' li Micmetate. Li sts'aquile te xbat ta stuq'uil sloq'ueb c'ac'al c'alal ta Taanat-silo; te xjelov batel ta Janoa.

⁷ Te xlic ta Janoa; te xyal batel ta Atarot xchi'uc ta Naarat; te xjelov ta Jericó; xc'ot ta loq'uel ta uc'um Jordán.

⁸ Li sts'aquil xlic batel ta Tapuae te xbat ta stuq'uil smaleb c'ac'al c'alal ta bevo' yu'un Caná xchi'uc ta muc'ta Nab Mediterráneo. Le'e ja' yosilalic laj yich'ic li jchop liquemic ta Efraine; ja' jech yepal laj yich'ic ti c'u yepal oyic ta jujuchop sbiique.

⁹ Oy yan lumetic te ta osil ti bu laj yich'ic li jchop liquemic ta Manasese, ja' laj yich'ic voc'bel comel li jchop liquemic ta Efraine; ja' laj yich'ic c'alal ta tsobtsobnaetic yu'un.

¹⁰ Li boch'otic liquemic ta Efraine muc snutsic loq'uel ta Gezer li canaanetic te nacajtique, jech te nacajtic icom o yu'unic c'alal to tana, pero la sujic ta spasel tsatsal abtel.