Josué 14 - Bible in Tzotzil de Chenalhó with Deuterocanon

La svoc' Canaán banamil li Josuee

¹ Li'i ja' sc'oplal scotol li banamiletic te ta Canaán ti laj yich'ic li israeletique; ja' ti laj yich'ic voc'bel yu'un li pale Eleazar, Josué, xchi'uc li banquilaletic yu'unic ta jujuchop sbiic li israeletique.

² C'alal la svoq'uic li banamile, la spasic canal tajimol li o'lol slajunchop israeletique yu'un jech albil yu'un Muc'ul Dios li Moisese.

³ Yan li jchop liquemic ta Rubén, ta Gad, xchi'uc li o'lol jchop liquemic ta Manasese, ba'yuc xa ono'ox ac'bil comel yosilic yu'un Moisés ta jot uc'um Jordán. Yan li levietique mu'yuc xich' yosilic.

⁴ Li smomnich'nab Josee cha'chop iloc' israeletic te. Jchop iloc' ta sventa Manasés; jchop iloc' ta sventa Efraín. Yan li levietique mu'yuc laj yich'ic yosilic; ja' no'ox laj yich'ic lumetic sventa chnaquiic xchi'uc yosilal sventa tsts'ites xvacax xchi'uc xchijic.

⁵ Li israeletique ja' jech la sliquesic svoq'uel osil jech chac c'u cha'al i'albat yu'un Muc'ul Dios li Moisese.

Sc'oplal bu laj yich' yosil Caleb

⁶ Li smomnich'nabtac Judae ibat sc'opanic li Josué c'alal te oyic ta Gilgale. Li Caleb, xnich'on Jefone cenezeo vinique, jech laj yalbeic li Josuee: “Vo'ote, ana'oj c'usi i'albat yu'un Muc'ul Dios te ta Cades-barnea li Moisese, ja' li yajtunel Diose. Ja' i'albat ac'oplal li vo'ote xchi'uc jc'oplal ec li vu'une.

⁷ C'alal te oyutic ta Cades-barneae, quich'oj xa'ox cha'vinic (40) jabil; ja'o la stacun tal ta sq'uelel osil li Moisese, ja' li yajtunel Muc'ul Diose. C'alal c'ot calbe ya'yic li ca'yeje, ja' jech c'ot cal ti c'u x'elan laj ca'ay ta co'ntone.

⁸ Li yantic jchi'iltac ti ay xchi'inicune ja' no'ox c'ot xchibajesbeic yo'nton li yantic jchi'iltactique. Pero li vu'une j'ech'el la jch'un o li Muc'ul Dios cu'untique.

⁹ Li Moisese jech laj yalbun ta stojol Dios: ‘Li osil bu ay ateq'ue ja' avu'un chcom o achi'uc amomnich'nabtac yu'un jun avo'nton ta stojol li Muc'ul Diose’, xiyutun.

¹⁰ Oy xa vo'ob yoxvinic (45) jabil ti c'alal jech i'albat yu'un Muc'ul Dios li Moisese; ja'o yorail ti c'alal te xjoyetic ta xocol banamil li jchi'iltactique. Muc'ul Dios laj yac' cuxicun jech chac c'u cha'al laj ono'ox yalbune. Li' ta orae quich'oj xa vo'ob yo'vinic (85) jabil.

¹¹ Pero yoquel to lec tsotsun jech chac c'u cha'alun ono'ox c'alal la stacun tal ta sq'uelel osil li Moisese. Bisil to lec xu' cu'un xiloc' xi'och ta paspleito jech chac c'u cha'alun ono'oxe.

¹² Ja' yu'un chacalbot ti ac'o avac'bun ta ora li osil le' ta toyolaltic ti yalojbun ono'ox Muc'ul Dios ja' cu'une. Yu'un ana'oj ono'ox ti ja' te nacajtic li smomnich'nab muc'ta vinic Anaque. Lec spasoj li lumetic yu'unique; lec setel ta tsatsal coralton. Pero ja' no'ox ta jch'un ti Muc'ul Dios chixchi'inun batele; ja' chiscoltaun jech xu' cu'un ta jnuts loq'uel jech chac c'u cha'al yalojbun ono'oxe”, xi li Calebe.

¹³ Ja' yu'un li Josuee la sc'anbe bendición li Calebe, xchi'uc ja' laj yac'be yich' o xchi'uc smomnich'nab li Hebrone.

¹⁴ Li Hebrone ja' yu'un icom o xchi'uc smomnich'nabtac li Calebe yu'un j'ech'el jun yo'nton o ta stojol li Muc'ul Diose, ja' li Dios yu'un Israele.

¹⁵ Li Hebrone ja' to'ox Quiriat-arba sbi. Yu'un li Arbae ja' jun vinic ti lec xu' yu'une, ti puquem sc'oplale; ja' smomnich'on li muc'ta vinic Anaque. C'alal i'ech' scotol le'e, ipaj li c'op te ta yosilalique.