Josué 11 - Bible in Tzotzil de Chenalhó with Deuterocanon

La stsalic yan ajvaliletic li israeletique

¹ C'alal laj ya'ay c'usi la spas israeletic li Jabín ajvalil ta Hazore, la stac batel mantal ta stojol li ajvalil Jobad ta Madone, xchi'uc ta stojol ajvalil ta Simrón, xchi'uc ta stojol ajvalil ta Acsaf.

² Xchi'uc la stac batel mantal noxtoc ta stojol ajvaliletic ta toyolal vitsetic ta norte, xchi'uc ta Arabá ta stuq'uil sur yu'un Nab Cineret ta stenlejaltic, xchi'uc ta yosilal Dor ta smaleb c'ac'al.

³ Xchi'uc la stac batel mantal noxtoc ta stojol canaanetic ti te nacajtic ta stuq'uil sloq'ueb c'ac'al xchi'uc ta stuq'uil smaleb c'ac'ale. Xchi'uc la stac batel mantal noxtoc ta stojol amorretic, hetetic, ferezetic, jebusetic ti te nacajtic ta toyolaltic ta vitsetique, xchi'uc ta stojol hevetic ti te nacajtic ta yoc vits Hermón ta Mizpa banamile.

⁴ Jech iloq'uic tal scotolic xchi'uc yajsoldadotaquic, xchi'uc epal viniquetic; bats'i epic ta jyalel jech chac c'u cha'al yi' ta ti'nab, xchi'uc bats'i ep sca'ic xchi'uc scaretaic sventa pleito.

⁵ Scotol li ajvaliletic le'e jmoj la stsob sbaic tal; te jmoj vul spas scarpanaic ta nopol vo'etic ta Merom sventa tstsaquic ta pleito li israeletique.

⁶ Pero li Muc'ul Diose jech laj yalbe li Josuee: “Mu me xaxi'. Oc'om jech ora chac c'u cha'al li'i chacac'bot ta ac'obic. Scotol ta xcham avu'unic vo'oxuc li israeloxuque. C'asbeic yacan scotol li sca'ique; ac'beic sc'ac'al li scaretaic sventa pleitoe”, xut.

⁷ Li Josué xchi'uc svinictac ta paspleitoe ital scotolic, tal staic te ta nopol vo'etic ta Merom; ch'ayel yo'nton la staic.

⁸ Li israeletique i'ac'bat ta sc'obic yu'un Muc'ul Dios scotol, jech la smilic, la snutsic batel c'alal to ta muc'ta lum Sidón, xchi'uc c'alal to ta Misrefot-maim, xchi'uc c'alal to ta stenlejaltic Mizpa ta stuq'uil sloq'ueb c'ac'al. La smilic scotol, ja' to ti c'alal mu xa junuc cuxul icom yu'unique.

⁹ Li Josuee ja' jech la spasbe jech chac c'u cha'al albil yu'un Muc'ul Diose. La sc'asbeic li yacan sca'ique, xchi'uc la xchic'beic scotol li scaretaic sventa pleitoe.

¹⁰ Ja'o yorail ibatic noxtoc ta lum Hazor. La smilic comel ta espada li ajvalil tee. Yu'un li Hazore ja' to'ox muc'ta lum yu'unic scotol li ajvaliletic le'e.

¹¹ La smilic comel ta espada scotol li boch'otic te nacajtique; me junuc mu'yuc c'usi cuxul la scomtsanic; solel laj yulesic o scotol. Jech noxtoc la xchiq'uic comel li Hazore.

¹² Ja' jech la spasbeic noxtoc li yantic ajvaliletique xchi'uc li slumalique, la smilic comel ta espada scotol, laj yulesic o comel jech chac c'u cha'al yaloj ono'ox li Moisese, ja' li yajtunel Muc'ul Diose.

¹³ Pero li lumetic ti te to oyic batel ta sne xa yosilique, mu'yuc la xchiq'uic; ja' no'ox la xchiq'uic li Hazore.

¹⁴ Li israeletique laj yich'ic comel scotol li c'usitic oy te ta lumetique, xchi'uc xvacaxic, xchijic, xchi'uc scotol yantic. Yan li cristianoetique la smilic ta espada scotol; me junuc mu'yuc cuxul la scomtsanic.

¹⁵ Ti c'u x'elan albil yu'un Muc'ul Dios li Moisese, ja' li yajtunel Diose, ja' jech laj yalbe comel ec li Josuee. Jech ec li Josuee xquechet la spas scotol, me jbeluc mu'yuc la scomtsan.

Li Josuee la spas scotol li c'usi albil comel yu'un Moisese

¹⁶ Li Josuee i'och ta sc'ob scotol li banamile. Ja' li osil ta vitsetique, xchi'uc scotol li Negueve, xchi'uc scotol li yosilal Gosene, xchi'uc scotol li stenlejaltique, xchi'uc li muc'ta soplejal te ta Jordane, xchi'uc scotol li vitsetic li stenlejaltic ta Israele.

¹⁷ Xlic ta vits Halac, xmuy batel ta stuq'uil Seir c'alal to ta Baal-gad ta stenlejaltic yu'un Líbano xchi'uc c'alal ta ch'utch'ut vits Hermón. C'alal ta ajvaliletic i'och ta sc'obic, jech la smilic ta espada scotol.

¹⁸ Ep c'ac'al puru pleito la spas li Josué xchi'uc li ajvaliletic le'e.

¹⁹ Me junuc lum mu'yuc bu ti muc spasic pleito xchi'uquic li israeletique. Ja' xa no'ox li hevetic ti te nacajtic ta lum Gabaón ti muc smilique.

²⁰ Yu'un li Muc'ul Diose la spasbe ta tsots yo'ntonic scotol li yajcontra israeletique yu'un jech ac'o scontrainic li israeletique. Ja' yu'un li israeletique laj yulesic o scotol; mu'yuc abul sba laj yilic, yu'un jech ono'ox albil yu'un Muc'ul Dios li Moisese.

²¹ Jech noxtoc li Josuee ja'o yorail laj yulesic scotol li anaquetic te nacajtic ta vits Hebrón, ta Debir, ta Anab, xchi'uc ta scotol li vitsetic ta Judá xchi'uc ta Israele.

²² Mu junuc sts'unubal Anac te icom ta yosilalic li israeletique. Ja' xa no'ox te icom sts'unubal Anac ta lum Gaza, ta Gat, xchi'uc ta Asdod.

²³ Li Josuee la spoj scotol li banamil jech chac c'u cha'al yaloj ono'ox Muc'ul Dios ta stojol li Moisese. Ts'acal lic svoc'anbe li jaychop israeletique, jech icom ta yu'unic o. C'alal i'ech' scotol le'e, ipaj scotol li pleitoe; jun yo'nton icomic te ta yosilalic.