Jonás 4 - Bible in Tzotzil de Chenalhó with Deuterocanon

I'ilin Jonás ta scoj ti ic'uxubinvan li Diose

¹ Li Jonase toj chopol laj ya'ay c'usi la spas li Muc'ul Diose, jech i'ilin.

² Te lic sc'opan Dios, jech laj yal: —Muc'ul Dios, ja' xa'ox jech c'an calbot ti c'alal te oyun ta cosilale. Ja' ta scoj ti chijatov ox batel ta Tarsise. Yu'un jna'oj ti toj lec avo'ntone, ti toj ep c'uxubinel avu'une, xchi'uc jna'oj ti muc ta aniluc cha'iline, ti toj ep slequil avo'ntone, xchi'uc ti chlecub avo'nton, ti mu'yuc chavac'be stoj li smulique.

³ Ja' yu'un, Muc'ul Dios, ta jc'anbot vocol ti ac'o amilun ta orae, yu'un ja' lec chca'ay ti chichame; mu xa jc'an ti li' to cuxulune —xut.

⁴ Li Muc'ul Diose jech laj yal: —¿Me ja' lec chava'ay ti toj ep cha'iline? —x'utat.

⁵ Li Jonase iloc' batel ta lum; te ibat ta stuq'uil sloq'ueb c'ac'al yu'un li lume. Te la spas yunin yaxna sventa te ch-axinaj; te la smala yil li c'usi chc'ot ta pasel ta lume.

⁶ Li Muc'ul Diose laj yac' ch'iuc jpets vomol yo' bu oy li Jonase; xco'laj xchi'uc caxlan ch'upac' yanal, yu'un ja' sventa te ch-axinaj li Jonase, yu'un jech mu'yuc svocol ta c'ac'al. Li Jonase toj xcuxet yo'nton yu'un li jpets vomole.

⁷ Pero c'alal isacub osil ta yoc'omale, li Diose la spas ta mantal jcot c'onon, ja' la xc'uxbe yibel li vomole jech itaquij.

⁸ C'alal iloc' c'ac'ale, la stac tal tsots q'uixin ic' li Diose. Jech bats'i c'ux c'ac'al laj ya'ay li Jonase. Ic'ac' ta jyalel li sjole, jech ta xa x'alub laj ya'ay. Jech la snop ti ja' lec ac'o chamuc oe, jech laj yal: —Ja' lec ac'o xa chamcun; mu xa xnel chca'ay ti li' to cuxulune —xi.

⁹ Ja' yu'un li Diose jech laj yalbe li Jonase: —¿Me toj tsots cha'ilin ta scoj li jpets vomole? —xut. Itac'ov li Jonase: —¡Jech, tsots chi'ilin! Ac'o chamcun o ta sc'ac'al co'nton —xi.

¹⁰ Itac'ov li Muc'ul Diose: —Li vo'ote toj chopol chava'ay ti itaquij li jpets vomole, pero muc vo'ocot avabtel; muc vo'ocot laj avac' ch'iuc. Ta jun no'ox ac'ubal ich'i; ta yan ac'ubale taquin xa'ox.

¹¹ ¿Me mu ja'uc jech chc'uxubaj ta co'nton ec li muc'ta lum Nínive ti ech'em ta vacvinic ta mil (120,000) ololetic te oyic ti mu to sna'ic bu sts'etc'obic xchi'uc bu sbats'ic'obique, xchi'uc ti bats'i ep sts'unub yovolic te oye? —xi li Diose.