Jonás 3 - Bible in Tzotzil de Chenalhó with Deuterocanon

Li cristianoetic ta lum Ninivee la sutes yo'ntonic

¹ Li Jonase ic'opanat yan velta yu'un li Muc'ul Diose, jech i'albat:

² “Lican, batan ta muc'ta lum Nínive; bat albo ya'yic li c'usi laj calbote”, x'utat.

³ Jech ilic li Jonase; ibat ta muc'ta lum Nínive jech chac c'u cha'al i'albat yu'un li Muc'ul Diose. Li Ninivee bats'i muc'ta lum ta jyalel, bats'i jamal; ta oxib to c'ac'al chlaj jxantic scotol.

⁴ Jech te i'och batel ta lum li Jonase; ja' jun c'ac'al ixanov batel. Te x'avet batel, jech laj yal: “Le' ta cha'vinic (40) c'ac'ale ta xlaj scotol li lum li'i”, xi.

⁵ Li cristianoetic ta lum Ninivee la xch'unic c'usi laj yal li Diose, jech lic yictaic ixim ta sjunul slumalic, xchi'uc la slapic c'u'il sventa at-o'nton ti c'ux ta lapele. C'alal ta biq'uit ta muc' la slapic.

⁶ Li a'yej le'e ic'ot c'alal ta stojol li ajvalil te ta lume. C'alal laj ya'ye, la snit loq'uel li sc'u' sventa ajvalilale; la slap c'u'il sventa at-o'nton ti c'ux ta lapele, xchi'uc iyal ta xchotleb, ichoti ta tantic.

⁷ Lic yaq'uic jun mantal ta sjunul lum xchi'uc scotol li j'abteletic yu'une, jech laj yalic: “Ta sjunul jlumaltic xchi'uc c'alal ta jts'unub covoltic, mu'yuc ta xijve' jchi'uctic; mu'yuc ta xcuch'tic vo', me jutuc mu'yuc c'usi ta jtuntic o.

⁸ Ja' xa no'ox ac'o jlaptic c'u'il sventa at-o'nton ti c'ux ta lapele; c'alal ta jts'unub covoltic tsots xa'oq'uic ta stojol li Diose. Comtsanic li chopol be atamojic jujunoxuque xchi'uc scotol li tsatsal uts'intael chapasique.

⁹ Oy yic'al jech xu' chlic c'uxubajcutic ta yo'nton li Diose, jech chlaj sc'ac'al yo'nton ta jtojoltic, jech mu xijchamutic o”, xiic.

¹⁰ C'alal laj yil Dios li c'usi la spasique, ti la sutes yo'ntonic ta sventa li c'usitic chopol tspasique, jech lic lecubuc yo'nton ta stojolic, muc spasbe o li c'usi snopoj xa'ox tspasbee.