Jonás 2 - Bible in Tzotzil de Chenalhó with Deuterocanon

La sc'opan Dios li Jonase

¹ Li Jonase ja' to te lic sta ta c'opanel Muc'ul Dios yu'un ti c'alal te tiq'uil ta yut xch'ut muc'ta choye,

² jech laj yal: “Muc'ul Dios, oyun ta at-o'nton; a'ibun jc'op ti li' chajc'opanote. Li' chi'avan tal ta atojol ta yut li lajele; a'ibun li jc'ope.

³ Laj atic'un ochel tal ta yutil nab, ta o'lol nab; La xpixun o ta yip li nabe. C'alal chapas ta mantal ti tsots ac'o syuq'uilan sbae, li' chvul ta sba cac'ol scotol.

⁴ Ja' yu'un la jnop ti jipbil tenbilun xa loq'uel avu'une, ti mu xa xquil o yan velta li ch'ulna avu'une.

⁵ Solel la smucun ochel o ta yut li vo'e; la xpixun o ta j'ech'el li muc'ta nabe; la sts'ot sba ta jol li yamuchale.

⁶ Liyal batel c'alal to ta yibel li vitsetique; te la smacun o, la smucun o ta j'ech'el li banamile. Pero li vo'ote, Dios cu'un, xu' chacoltaun loq'uel ta sventa li lajele.

⁷ Li' ta orae chca'ay ti ta xa xichame, ja' yu'un chajtaot ta na'el Muc'ul Dios cu'un. Ta jna' ti chc'ot c'alal ta ach'ulna li jc'ope.

⁸ Li boch'otic ja' chich'ic ta muc' c'usitic cuybil ta diosetic ti mu'yuc stue mu xa junuc yo'ntonic ta atojol.

⁹ Yan li vu'une xi'avet no'ox chlic quich'ot ta muc', chlic cac'bot amoton. Li c'usi caloj ta atojole ta jpas. Yu'un vo'ot no'ox atuc xu' avu'un chacoltaun”, xi la sc'opan Dios li Jonase.

¹⁰ Ja' yu'un li Muc'ul Diose la spas ta mantal li muc'ta choye, jech te bat xeta loq'uel ta banamil li Jonase.