Joel 3 - Bible in Tzotzil de Chenalhó with Deuterocanon

Chich' chapanel yu'un Dios li yajcontra israeletic ta jujun banamile

¹ Jech ta xal noxtoc li Muc'ul Diose: “C'alal me ic'ot li sc'ac'alil, me ic'ot li yoraile, ta jcha'lecubtas li Judá xchi'uc Jerusalene.

² Ta jtsob scotol li cristianoetic ta jujun banamile; te ta xquiq'uic yalel ta soplejaltic yu'un Josafat. Te ta xlic jchapan ta scoj ti laj yuts'intaic li jteclumale, ja' li israeletic ti la spuquic batel ta yantic banamile, xchi'uc ti la spucbe sbaic li cosil jbanamile.

³ Jech noxtoc la spasic canal tajimol ta sventa li jteclumale; la xchonic bic'tal queremetic, la stojic o jmulavil antsetic. La xchonic bic'tal tsebetic, la smanic o pasem ya'lel ts'usub yuch'ic.

⁴ “Jech ec li vo'oxuque lum Tiro, lum Sidón xchi'uc scotol yosilal filistaetic, ¿c'usi tal asa'ic li' ta jtojol ec? ¿Me chac'an chapacbicun sutel? Lec me chac'an chapacbicune, jutuc xa sc'an xcac'boxuc atojic ti c'u x'elan laj apasique.

⁵ Yu'un laj avich'ic batel li saquil taq'uin, li c'anal taq'uin cu'une, xchi'uc li c'usitic toj lequic, toj c'upilic sbae; te laj atiq'uic ta sna adiosic.

⁶ Laj achonic noxtoc li israeletique, ja' li yajvaltac Judá xchi'uc Jerusalene. Ja' laj achonbeic batel li griegoetique, yu'un jech ac'o namajuc batel ta yosilalic avu'unic.

⁷ A'yo ava'yic, vu'un ta xlic quiq'uic sutel tal ti bu laj achonic batele; ta xcac'boxuc atojic ec ti c'u x'elan laj apasique.

⁸ Ta xlic jchonbe aquerem atsebic ec li judaetique; ja' xa ta xchonbeic batel ec li sabetique, ja' li jun banamil ti bats'i nome. Vu'un chcal jtuc, vu'un li Muc'ul Diosune”, xi li Muc'ul Diose.

⁹ Alic batel ta jujun banamil: Puquic batel ti ta xa xlic pleitoe. Iq'uic tal li boch'otic lec tsots yo'ntonique. Ac'o nopajicuc tal, ac'o xa talicuc li jpaspleitoetique.

¹⁰ C'atajesic ta espada li avazaronaique; c'atajesic ta lanza li ajozique. Jech ac'o yal li boch'o mu'yuc c'usi xu' yu'une: “Lec xu' cu'un”, ac'o xiuc.

¹¹ La'ic me, tsobo abaic tal acotolic lumetic ti li' nopol seteloxuque. Muc'ul Dios, taco me tal li avinictac ti lec xu' yu'unique.

¹² Chapano me abaic jujun banamil; muyanic batel ta soplejaltic yu'un Josafat, yu'un li Muc'ul Diose ja' te ta xlic xchapan scotol lumetic ti li' nopol setelique.

¹³ Yu'un ijelov ta bis ta jyalel li smulique, tuch'ic xa ta joz jech chac c'u cha'al trigo ti yijuben xae. Pech'ic xa ta teq'uel jech chac c'u cha'al ts'usub yu'un noj xa li yavil spits'ubile; ta xa xtanijan loq'uel ta sti' yaviltac.

¹⁴ Toj ep ta stsob sba cristianoetic te ta soplejaltic, ta yavil li chapanele; yu'un po'ot xa tsta yorail chac' stojol mulil te ta soplejaltic li Muc'ul Diose.

¹⁵ Li c'ac'al xchi'uc li ue ta xlic ic'ubicuc; li c'analetique mu'yuc xa chac' xojobalic noxtoc.

¹⁶ C'alal tsots chlic avanuc te ta vits Sión xchi'uc ta Jerusalén li Muc'ul Diose, ta xnic li vinajel banamile. Yan li steclumale, ja' li israeletique, ja' spatubil yo'ntonic, ja' stsatsal yo'ntonic li Muc'ul Diose.

Ta to xc'uxubinat yan velta li Judae

¹⁷ Jech chal noxtoc li Muc'ul Diose: “Chlic avotquinic ti vu'un Muc'ul Diosun avu'unic ti te nacalun ta Sione, ja' li ch'ul vits cu'une. Li Jerusalene ch'ul lum ta xcom o; mu'yuc xa chtal soquesic yan velta li yanlum cristianoetique.

¹⁸ Me la sta li sc'ac'alil le'e, te xa no'ox ta xloc' ta vitsetic li ya'lel ts'usube, te xa no'ox ta xloc' ta bic'tal vitsetic li ya'lel xchu' vacaxe. Scotol li bebevo'tic ta Judae chlic xanovuc lec ya'lel. Jech noxtoc ta xlic loc'uc jun nio' ta xch'ulna li Muc'ul Diose, ja' ta xat'es li soplejaltic Sitime.

¹⁹ Li Egiptoe yavnaijem ta xcom o, li Edome ta xcom jech chac c'u cha'al ta xocol banamil ti jeche' xch'ijan oe; ja' ta scoj ti laj yilbajinic li jnaclumetic ta Judae, xchi'uc ti la smalbeic xch'ich'al te ta yosilalic li boch'o mu'yuc smulique.

^20-21 Mu'yuc ta jts'icbe smulic li boch'o jech la spasique; ta persa ono'ox ta jpacbe ya'yic ec. Yan li Judae j'ech'el oy yajval ta xcom o; li Jerusalene j'ech'el te chnaqui o ti jayc'ol alab nich'nabetic chjelovique. Vu'un li Muc'ul Diosune te chinaqui o ta Sión”, xi li Diose.