Joel 2 - Bible in Tzotzil de Chenalhó with Deuterocanon

¹ Jupanic oq'uesetic te ta vits Sión; avananic te ta ch'ul vits yu'un li Diose. Xi'anic acotolic jnaclumetic ta banamil, yu'un ta xtal sc'ac'alil li Muc'ul Diose; jutuc xa sc'an sta yorail.

² Ja' sc'ac'alil ic' osil, ja' yorail ac'ubaltic; ja' sc'ac'alil chtal but'ulaltic, ja' yorail chtal yaxinaltic. Jech chac c'u cha'al chtal saquil osil ta vitsetic c'alal tsacub tale, ja' jech ta xtal ven epal c'ulubetic ti toj tsots xu' yu'unique. Mu'yuc ono'ox bu jech c'otem ta pasel, xchi'uc mu'yuc jech chc'ot ta pasel ta ts'acal ti jayc'ol alab nich'nabetic chtalic toe.

Ta slajes scotol c'usitic oy li c'ulubetique

³ Ja' jech chac c'u cha'al c'oc' ti chchic' batel ta jujujote. Ac'o me ja' to'ox jech chac c'u cha'al ts'unubaltic ta Edén, pero ja' jech chcom yu'unic jech chac c'u cha'al xocol banamil; mu'yuc c'usi chcol comel yu'unic.

⁴ Xco'laj xchi'uc ca'etic ta q'uelel; ja' jech x'anilajic jech chac c'u cha'al boch'o cajajtic ta ca'.

⁵ Ja' jech xbaq'uic jech chac c'u cha'al caretaetic ti xbitlajetic ta anil ta vitsetique; xc'ulet no'ox jech chac c'u cha'al tocalte' ti c'alal chchic' batel taqui jobeltique, xchi'uc ja' jech chac c'u cha'al jun ta lum cristianoetic ti lec chapal chbatic ta pasc'ope.

⁶ Ta xi'ic yu'un scotol li cristianoetique; ta saclich'tajic ta scoj xi'el.

⁷ Li c'ulubetique ja' jech ta x'anilajic tal jech chac c'u cha'al simaron soldadoetic. Tuc' ta xvul muyicuc ta ba coralton ti bu chc'otique; mu'yuc bu ta to sjoyilan sbeic.

⁸ Muc teuc no'ox tsnet'ilan sbaic xchi'uc xchi'iltaquic; tuc' st'unoj batel sbeic jujunic. Ac'o me oy c'usi ch-ac'batic yu'un yajcontraic, pero mu stani sbaic o.

⁹ Tuc' chbatic ta lum, ch-anilajic ta ba coralton; chmuyic ta baba naetic, ch-ochic ta ventanaetic jech chac c'u cha'al j'eleq'uetic.

¹⁰ Ta xnic yu'unic li banamile, xchi'uc ta xnic li vinajele; ta x'ic'um li c'ac'al xchi'uc li ue, li c'analetique mu xa xac' xojobal noxtoc.

¹¹ Li Muc'ul Diose tsots chalbe mantal li soldadoetic yu'une. Toj ep ta jyalel li soldadoetic yu'une; toj tsotsic ta jyalel li boch'otic ta xch'unbat smantal yu'une. ¡Toj ven xi'bal sba sc'ac'alil li Muc'ul Diose! ¿Boch'o xcuch yu'un?

C'uxubinel yu'un Muc'ul Dios

¹² Ja' yu'un jech chal li Muc'ul Diose: “Sutanic tal ta jtojol ta scotol avo'ntonic; ictaic ixim, oc'anic, ato avo'ntonic.”

¹³ Ja' li'o li avo'ntonique; mu ja'uc xali' li ac'u'ique. Suteso avo'ntonic ta stojol li Muc'ul Dios avu'unique, yu'un li stuque toj lec yo'nton, ja' jc'uxubinvanej. Toj vocol chlic sc'ac'al yo'nton, ja' toj muc' li c'uxubinel yu'une; toj vocol cha'ay ti chac' stojol mulile.

¹⁴ Oy yic'al mu xayac'boxuc atoj li amulique; xu' ja' chlic stacboxuc tal li bendicione, ja' li ya'lel ts'usub xchi'uc li yantic matanal chavaq'uic ta stojol Muc'ul Dios avu'unique.

¹⁵ ¡Jupanic oq'ues te ta vits Sión! Tijo abaic ta muc'ta tsobajel acotolic, ictaic ixim.

¹⁶ Tsobic scotol li achi'iltaquique, ac'o abaic ta lecubtasel; tsobic li moletique, tsobic li queremetique xchi'uc li boch'otic ta to xchu'unique. Ac'o to scomtsan sna li querem ti ja' to i'och ta nae; ac'o to scomtsan sna li tseb ti ja' to inupi its'aquie.

¹⁷ Ac'o oq'uicuc te ta yochebal ch'ulna li paleetique; ac'o oq'uicuc te ta sts'el scajleb matanal li yajtuneltac Diose. Jech ac'o yalic: “Muc'ul Dios, pasbo perdón li ateclumale, mu me xavac' lajicuc ta labanel li ateclumale; mu me xavac' lajicuc ta tsalel yu'un li yantic banamile. Mu me xavac' jech chalic li yanlum cristianoetique: ‘¿Bu oy li Dios yu'unique?’, mu me xiuc jc'oplalcutic yu'unic”, ac'o xiicuc.

¹⁸ Jech chlic c'uxubajuc ta yo'nton yosil sbanamil li Muc'ul Diose, jech chlic spasbe perdón li steclumale.

¹⁹ Li Muc'ul Diose ta stac'be sc'opic li steclumale, jech ta xalbe: “A'yo ava'yic, ta jtac tal trigo, ya'lel ts'usub, xchi'uc aceite, jech lec chnoj ach'utic. Mu'yuc xa chcac'oxuc ta labanel yan velta yu'un li yanlum cristianoetique.

²⁰ Ta jloq'ues batel ta atojolic li c'ulubetic iliquic tal ta nortee; ta jtac batel ta xocol banamil, ta taqui banamil. Te ta xcac' jic'oicuc ta Nab Muerto li boch'o ta ba'yucbe oyique; te ta xcac' chamuc ta Nab Mediterráneo li boch'o ta ts'acalpat oyique. Te ta xcac' c'a'icuc, te ta xcac' tuibicuc, yu'un toj tsotsic c'usitic la spasic”, xi li Diose.

²¹ Banamil, mu me xaxi'; junuc avo'nton, cuxetuc no'ox avo'nton, yu'un li Muc'ul Diose ta spas muc'tic sq'uelubil stsatsal.

²² Chonbolometic ta te'tic, mu xavat avo'ntonic, yu'un li ts'i'laltic ta xocol banamile ta xlic yaxubuc tal. Li te'etique ta xlic satinicuc; li higotic xchi'uc li ts'usubtique ta xlic yac' sat.

²³ Jnaclumetic ta Sión, cuxetuc avo'ntonic; tse'inanic no'ox ta sventa li Muc'ul Dios avu'unique. Yu'un ja' chayac'boxuc tal li sba yalelal vo' c'alal tsta yoraile; chayac'boxuc tal vo' ti sob chyale xchi'uc ti ts'acal chyale. Ja' jech ta spas jech chac c'u cha'al ta spasboxuc ono'oxe.

²⁴ Li yavil smajubil trigo avu'unique ta xnoj ta trigo; li yavil spits'ubil ts'usub avu'unique ta xnoj ta ya'lel ts'usub; li yavil spasubil aceite avu'unique ta xnoj ta aceite.

²⁵ Jech chal noxtoc li Diose: “Ta jq'uextaboxuc scotol ti jayib jabil ilaj ta lo'el ta tsucum, ta bilix, ta xc'ajben, xchi'uc ta c'ulube, ja' li epal soldadoetic cu'un la jtacboxuc tal ta atojolique.

²⁶ Jech lec chave'ic, lec noj ach'utic; jech xu' chavalbicun jlequilal, vu'un li Muc'ul Diosun avu'unic, ta sventa ti toj muc'tic sq'uelubil jtsatsal la jpas ta atojolique. Jech mu'yuc xa ta xcac'oxuc ta q'uexlal yan velta, vo'oxuc li jteclumaloxuque.

²⁷ Jech chlic ana'ic ti te oyun ta atojolic, vo'oxuc li israeloxuque, xchi'uc chlic avotquinic ti vu'un Muc'ul Diosun avu'unique, ti mu'yuc yane. Jech mu'yuc xa chayalic o ta q'uexlal yan velta, vo'oxuc li jteclumaloxuque.

Li Diose ta stac tal espíritu yu'un

²⁸ “C'alal me i'ech' scotol le'e, ta xcac' tal espíritu cu'un ta stojol scotol li cristianoetique. Jech li querem tsebetic avu'unique chlic yalic c'usi chc'ot ta pasel; li moletic avu'unique oy c'usi chlic yil ta xvayechic; li queremetic avu'unique oy c'usi chlic yil ta xch'ulelic.

²⁹ Jech noxtoc li amozoic, li aquiaraique ta xcac'be yich'ic espíritu cu'un c'alal me la sta li sc'ac'alil le'e.

³⁰ Ta xcac' ta ilel muc'tic sq'uelubil jtsatsal ta vinajel xchi'uc ta banamil; ja' ch'ich', c'oc' xchi'uc ch'ayil.

³¹ Ta x'ic'um li c'ac'ale, ta stsajub li ue., Le'e muc to ja'uc smuc'ta c'ac'alil Muc'ul Dios ti toj xi'bal sbae”, xi li Muc'ul Diose.

³² Scotol li boch'otic ta sc'anbeic vocol li Muc'ul Diose ja' ta xcolic. Jech chac c'u cha'al yaloj ono'ox li Muc'ul Diose: “Oy coltael ta vits Sión xchi'uc ta Jerusalén, xchi'uc ja' no'ox ta xcolic comel li boch'otic t'ujbilic cu'une”, xi.