Joel 1 - Bible in Tzotzil de Chenalhó with Deuterocanon

Ta xlaj ta c'ulub scotol li c'usitic oy ta banamile

¹ Li'i ja' sc'op Muc'ul Dios ti ic'opoj ta sventa li Joel xnich'on Petuele.

² Moletic, a'yo ava'yic; jnaclumetic ta scotol yosilal Judá, tuc'ulano lec ava'ay acotolic. ¿Me oy bu jech avilojic c'otem ta pasel li' ta cosilaltic xchi'uc ta stojol li amoltot ayame'ic ta vo'onee?

³ Albo ya'yic li anich'nabique; li anich'nabique ac'o yalbe ya'yic ec li xnich'nabique; li amomnich'nabique ac'o yalbe ya'yic ec li yalab xnich'nabique.

⁴ Li c'usitic icom ta lo'el yu'un li tsucume, ja' tal slajes ec li bilixe. Li c'usitic icom to ta lo'el yu'un li bilixe, ja' tal slajes ec li xc'ajbene. Ti c'u x'elan icom ta lo'el yu'un li xc'ajbene, ja' tal slajes ec li c'ulube.

⁵ ¡Jyacubeletic, cuxo avo'ntonic! ¡J'uch'poxetic, juetanic ta oq'uel, yu'un tsta yorail chapojbat ta aveic li pasem ya'lel ts'usube!

⁶ Ta xtal ven epal tsatsal soldadoetic jech chac c'u cha'al c'ulubetic, ta xtal ochicuc ta banamil cu'un. Li stanal yeique ja' jech chac c'u cha'al stanal ye león; li sts'uts'upique ja' jech chac c'u cha'al sts'uts'up me' león.

⁷ Ta xulesic comel scotol li ts'usubtic cu'une, ta slilinic comel scotol li higoetic cu'une; solel jeche' chijajtic ta scomtsanic. Ta xcho'beic c'alal ta spat; jeche' xa sac yalanic chcom yu'unic li sc'obc'obe.

⁸ Oc'anic jech chac c'u cha'al jun tseb ti ch-oc' c'alal chcham li querem ti chapal xa yu'unic chic' sbaique.

⁹ Li paleetic, li jtuneletic yu'un Muc'ul Diose ta x'oq'uic, ta xat yo'ntonic, yu'un ta xlaj sc'oplal yaq'uel li matanal, li ya'lel ts'usub te ta xch'ulna Muc'ul Diose.

¹⁰ Te ta osil banamile ch-ul scotol li c'usitic ts'unbile; solel me'on chcom o li banamile. Yu'un ch-ul o ta j'ech'el li trigoe; chtaquijan o li ts'usubtique, xchi'uc chlaj sc'oplal o ti oy aceitee.

¹¹ Jloc banamiletic, ch'ayeluc chc'ot avo'ntonic; jts'un ts'usubetic, oc'anic ta sventa li trigo xchi'uc li cebadae, yu'un ta x'ul o li c'usitic chloc' ta banamile.

¹² Ta xtaquijan o li ts'usubtique; ta xchaman o li higotique. Jech noxtoc li caranatoetic, li xanetic, xchi'uc mantsanoetique ta xtaquijan o. Scotol li te'etique ta xchaman o; chlaj sc'oplal ti xcuxet no'ox yo'nton li cristianoetique.

¹³ Paleetic, lapic ch'ixlajan c'u'il sventa at-o'nton; j'abteletic ta scajleb matanal, juetanic ta oq'uel, yu'un chlaj xa sc'oplal ti chavaq'uic matanal, ti chavaq'uic ya'lel ts'usub te ta xch'ulna Dios avu'unique.

¹⁴ Ictaic ixim, tijo aba acotolic ta muc'ta tsobajel te ta xch'ulna li Muc'ul Diose. Ac'o stsob sba scotol li moletique xchi'uc scotol li jnaclumetic ta avosilalique. C'anbeic vocol li Muc'ul Diose.

¹⁵ ¡Ay, jutuc xa sc'an sta sc'ac'alil chtal yac'bot atoj amul li Muc'ul Diose! Pero toj xi'bal sba li sc'ac'alil le'e, ja' jun muc'ta lajel chamel chtal yac' li Boch'o toj ech'em svu'ele.

¹⁶ Ta jsatic chtal yich' pojel li ve'liletic cu'untique; chlaj sc'oplal ti xcuxet no'ox co'ntontique ti tse'ej lo'ilutic no'ox ta xch'ulna Diose.

¹⁷ Li sbec' c'usi chich' ts'unele te ta xc'a' ta yut banamil. Li snail trigoe ta xich' vuq'uesel; li snail c'usitic chloq'ue ta xich' jinesel, yu'un mu'yuc xa c'usi chloc' o ta banamil.

¹⁸ Liquemic ta oq'uel li ts'unub ovolile; jeche' xjotet ta sa'el sve'elic li me' vacaxetique yu'un mu'yuc bu tstaic ts'i'laltic. Jech noxtoc li chijetique ta xa xchamic.

¹⁹ Vo'ot no'ox xivocolet ta atojol, Muc'ul Dios, yu'un ilaj ta c'oc' scotol li jamal jobeltique; imaje ta yat c'oc' scotol li te'etique.

²⁰ Li te'tical chonbolometique ta x'avanic ta atojol, yu'un itaquijan li bevo'tique, xchi'uc ic'ac' ta c'oc' li ts'i'laltique.