Job 9 - Bible in Tzotzil de Chenalhó with Deuterocanon

Mu'yuc boch'o xu' tstac'be sutel sc'op li Diose

¹ Itac'ov li Jobe jech laj yal:

² —Ta melel jna'oj lec ti ja' jeche', pero ¿c'u x'elan xu' lec tuc' tspas sba ta stojol Dios li jun cristianoe?

³ Me oy boch'o tsc'an tstsal sbaic ta c'op xchi'uc li Diose, ac'o me jmil (1,000) ta bel c'usi chjac'bat, mu xu' yu'un staq'uel junuc velta.

⁴ Li stuque toj ep sbijil, toj ep svu'el; ¿me oy boch'o lec chbat me tstoy sba ta stojole?

⁵ Li Diose xu' ta sniques ta sc'ac'al yo'nton li vitsetique; xu' yu'un ta sjines, pero mu'yuc boch'o sna'be yorail.

⁶ Ja' tsniques li banamile; ja' tsbaq'uesbe li yoyaltaque.

⁷ Ja' tspas ta mantal ti mu me xloc' tal li c'ac'ale, xchi'uc ti mu me xac' xojobal li c'analetique.

⁸ Stuc la xlich'an li vinajele; ja' xu' yu'un tspas ta mantal li nab ti toyolic no'ox xvil ta yuc'lajetele.

⁹ Ja' la spas noxtoc li c'analetic, ja' li Osa Mayor, Orión, xchi'uc li Xonobe, xchi'uc li yantic jujutsob c'analetic ta stuq'uil sure.

¹⁰ Xu' yu'un tspas ep muc'tic sq'uelubil ti mu'yuc boch'o xa'ibe smelole; xu' yu'un tspas ep c'usi toj labalic sba.

¹¹ Me chjelov li' ta stuq'uil jsat li Diose, mu xquil; me chjelov li' ta jts'ele, mu xca'ay.

¹² Me oy c'usi ta xich' batele ¿boch'o xu' tspojbe? ¿Boch'o xu' yu'un jech chalbe: ‘¿C'u yu'un jech chapas?’, boch'o xu' xut?

¹³ Me i'ilin li Diose, mu sna' sutes sba; pech'bil ta teq'uel chcom yu'un li boch'o co'ol yo'nton xchi'uc jtoybaetique.,

¹⁴ Li vu'une ¿c'u x'elan xu' ta jtsal ta lo'il li Diose? ¿Bu ta jta lequil lo'il ti xu' ta jpoj jba ta stojole?

¹⁵ Ac'o me toj tuq'uil vinicun, mu ono'ox xu' ta jtac'be, yu'un ja' jchapanvanej cu'un; tsc'an ja' no'ox ta jc'anbe vocol ta stojol.

¹⁶ Me ta jc'anbe vocol ta stojole, me chistac'bun li jc'ope, pero mu jch'un ti laj ya'ibun li jc'ope.

¹⁷ Yu'un toj tsots jvocol yu'un; xco'laj xchi'uc bats'i tsatsal ic'al vo' ivul ta jtojol, xchi'uc laj yepajesbun jtuch'emal ta jech no'ox.

¹⁸ Mu'yuc bu chiyac'bun quich' jutuc ic'; ja' no'ox laj yepajesbun tsots jvocol.

¹⁹ Me ta jtunes jtsatsale mu'yuc stu, yu'un li stuque ja' toj ech'em stsatsal; me ta xquic' ta chapanele, ¿boch'o xu' chic' batel ta persa?

²⁰ Me ta xcal ti lec tuc'une, ta que no'ox jtuc chvinaj ti oy jmule; me ta xcal ti mu'yuc c'usi chopol jpasoje, ja' svinajeb ti chopolune.

²¹ Jna'oj ti mu'yuc jmule, pero mu xa tsotsuc sc'oplal chca'ay; yu'un ja' i'ech' xa co'nton ti li' cuxulune.

²² Co'ol no'ox sba scotol, ja' yu'un jech ta jnop: ‘Li Diose co'ol tslajes scotol c'alal ta lec, c'alal ta chopol’, xichi.

²³ Me ta anil no'ox chlaj ta tsots vocol li boch'o mu'yuc smule, li Diose ta stse'intabe li svocole.

²⁴ Li banamile ja' chac'be ta sc'ob li boch'otic chopolique; ja' tsmacbe satic li jchapanvanejetic yu'unique. Me ma'uc tspas jech li Diose, ¿boch'o jech tspas cha'e?

²⁵ “Li jc'ac'alile toj anil no'ox chbat jech chac c'u cha'al boch'o tsots ch-anilaj, jech mu'yuc chil o li xcuxetel o'ntonale.

²⁶ Ta anil no'ox chjelov jech chac c'u cha'al barco chanov ta ba vo', jech chac c'u cha'al xic c'alal tstsac sve'el.

²⁷ Me ta jnop ta jch'ay ta co'nton li jvocole, me chcac' ta ilel ta jsat ti mu'yuc xa chcat co'ntone,

²⁸ scotol li jvocole chtal ono'ox sibtasun yan velta, yu'un jna'oj li Diose mu xch'un ti mu'yuc jmule.

²⁹ Me xch'unoj o ti oy jmule, ¿c'u yu'un ta jsuj jba ta snopilanel? yu'un altic no'ox.

³⁰ Ac'o me ta jpoc jba ta ya'lel tayo, ac'o me ta jpoc lec jc'ob ta spocubil stuc,

³¹ pero li Diose chisjipun ochel ta ch'en ti bu toj ep yic'ubale; c'alal ta jc'u' jpoc' xu' chopol chiyilun o.

³² Yu'un muc cristianouc jech chac c'u cha'al vu'un, mu xu' jech chcalbe: ‘Batic jchibaltic ta stojol jchapanvanejetic’, mu xu' xcut.

³³ Oyuc jun jchapanvanej ti xu' chixchapanuncutic jchibalcutique, xu' ja' chalbe

³⁴ ti ac'o sloq'uesbun ta jtojol snucul xch'ojon li Diose, xchi'uc ac'o sloq'uesbun ta jtojol xi'el ti jechuque.

³⁵ Jech mu'yuc chixi'; xu' ta jc'opan ti jechuque, yu'un mu'yuc jmul ta stojol chca'ay.