Job 8 - Bible in Tzotzil de Chenalhó with Deuterocanon

Lic c'opojuc ec li Bildade

¹ Li Bildad liquem ta Suae jech laj yal:

² —¿Baq'uin to chlaj avo'nton ti jech chalo'ilaje? Li ac'ope ja' jech chac c'u cha'al muc'ta ic' ti toj xi'bal sbae.

³ Li Dios ti ech'em svu'ele ¿me xu' tsoques li c'usi lec ta pasele? ¿Me xu' tsoques li c'usi tuq'ue?

⁴ ¿Me yu'un la sta smulic ta stojol li anich'nabe, ja' yu'un laj yac'be stoj li smulique?

⁵ Me chasa' ta jujun c'ac'al li Diose, me chac'anbe vocol li Boch'o ech'em svu'ele,

⁶ xchi'uc me lec, me tuc' chapas aba ta stojole, ta me xlic sq'uelot, ta xlic yac'bot yan velta scotol.

⁷ Ti c'u yepal oy avu'un ta sliquebe, bats'i juteb chcom; yu'un ech'em ep chlic ata ta ts'acal.

⁸ “Jac'o ava'ay a'yej ta stojol li totil me'iletic ti jelovenic xae; te chava'ay c'usi laj yilic ec li stot sme'ique.

⁹ Yu'un li vu'utique volje to lijvulutic ya'yel, mu'yuc c'usi jna'tic o; yu'un li jcuxlejaltic li' ta banamile ja' jech chac c'u cha'al yaxinaltic ti mu xjalije.

¹⁰ Xu' ja' chaxchanubtasot li ba'yuc totil me'iletique; ep c'usi xu' chayalbot.

¹¹ ¿Me oy bu xavil chch'i puj ti me muc ach'elticuque? ¿Me oy bu xavil chch'i tut ti me mu'yuc ya'lele?

¹² Ac'o me lec yox, ac'o me mu'yuc bojbil, pero me mu'yuc ya'lele ja' ba'yuc chtaquijic yu'un li yantic ts'i'laletique.

¹³ Ja' jech chc'ot ta stojolic li boch'otic chch'ay ta yo'ntonic Diose; ja' jech chch'ay batel li c'usi oy ta yo'nton tsmalaique.

¹⁴ Yu'un li c'usi oy ta yo'ntonique, li c'usi spatoj yo'ntonic yu'une, ja' jech c'otem jech chac c'u cha'al na om ti c'un ta tuch'ele.

¹⁵ Ac'o me tsc'an tsquican sbaic te, pero mu xcuch yu'un; ac'o me tsc'an tsts'uyan sbaic te, pero chtuch' ta ora.

¹⁶ Ja' jechic noxtoc jech chac c'u cha'al ts'i'lal ti lec yox ta xojobal c'ac'ale, ti tspuc sba batel ta scotol ts'unubaltique,

¹⁷ ti tsjalan lec batel yibel ta baba tone, ti chpix lec ta yisim li tontique.

¹⁸ Pero me oy boch'o tsjol loq'uele, mu'yuc xa boch'o sna' me te to'ox oy.

¹⁹ Jech te chlaj sc'oplal o ti lec to'ox jun yo'nton te ch'ieme; ti bu to'ox yavile yan xa ts'i'lal te chlic ch'iuc.

²⁰ “Li Diose mu'yuc tsbaj li boch'o tuc' c'usi tspase; mu'yuc tscolta li boch'o chopol c'usi tspase.

²¹ Li Diose chlic to yac' lec tse'inan; chlic to yac' avetan ta xcuxetel avo'nton.

²² Li boch'otic chasna'leicote chlic yalicuc ta q'uexlal; li boch'otic chopolique j'ech'el chch'ay o li snaique —xi li Bildade.