Job 7 - Bible in Tzotzil de Chenalhó with Deuterocanon

Li Jobe laj yal ti ja' lec ac'o chamuque

¹ “C'alal cuxul li cristiano li' ta banamile, ta vocol no'ox oy; li jujun c'ac'ale vocol ch-ech' jech chac c'u cha'al jun j'abtel ti vocol chnel yu'un jujun c'ac'ale,

² jech chac c'u cha'al jun mozo ti chac maluc ya'ay c'ac'al ta orae, jech chac c'u cha'al jun jsa'abtel ti smala-mala xich' stojole.

³ Ja' jech toj jal chca'ay ti oy jvocole; c'ac'al ac'ubal toj c'ux abul jba.

⁴ C'alal mocholune, toj jal chca'ay li jujun ac'ubale; te xibalet, chac sacubuc ca'ay ta ora, jech ta jnop: ‘¿Baq'uin to chitots?’, xichi.

⁵ Noj ta xuvit li jbec'tale, solel bacubenic li spat jchinale; li jnuculile cht'oman loq'uel li spojovile.

⁶ Li coraile ta anil no'ox chlaj jech chac c'u cha'al sbuc'ul jolobil; jech mu'yuc c'usi ta jta o yu'un.

⁷ “Dios cu'un, na'o me ti jliquel no'ox chicuxi jech chac c'u cha'al ta jic' co'ntoncutique, xchi'uc ti mu'yuc xa ta xquil lequilal yan velta li'i.

⁸ Li boch'otic chiyilicun li'i, mu'yuc xa bu chiyilicun o; c'alal chavac' asat ta jtojole, mu'yuc xa'ox te oyun.

⁹ Jech chac c'u cha'al toc ti ta sacch'ay no'ox batele, ja' jech li boch'o ch-och batel ta yavil animaetique; mu xa xloc' tal yan velta.

¹⁰ Mu'yuc xa tsut tal ta sna yan velta; mu'yuc xa chtal sq'uel yan velta ti bu to'ox nacale.

¹¹ Ja' yu'un mu'yuc bu ta jpajes jba ta lo'il; ta ono'ox xic'opoj yu'un toj ep li jvocole, yu'un mu xa x'ech' yipal chca'ay.

¹² ¿Me yu'un xico'laj jchi'uc muc'ta chanul nab chavil ti chuculun avu'une?

¹³ Jech ta xcal: ‘Ta xivay jech xu' ta jcux co'nton; ta ximochi ta jvayab jech xu' chpaj ta lo'il li co'ntone’, xichi.

¹⁴ Pero chlic asibtasun ta jvayel; chlic avalubtasun ta jch'ulel.

¹⁵ Ja' lec ti oyuc c'uxi tubuc quic' ta jech no'oxe; ja' lec ti chamcune, altic ti puru jbaquil xa no'ox li' oye.

¹⁶ Mu xa jc'an li' oyun, mu xa xcuch cu'un o; ac'bun xa jcux co'nton, yu'un mu jaluc ti li' cuxulune.

¹⁷ ¿C'usi stu li cristiano ti tsots sc'oplal chava'ye, ti te oy o avo'nton ta stojole,

¹⁸ xchi'uc ti jujun c'ac'al chaq'uele, ti ta jujuliquel chaq'uelbe c'u x'elan yo'ntone?

¹⁹ ¿Baq'uin to chach'ay jliqueluc asat ta jtojol? ¿Me mu xacomtsanun jliqueluc sventa ta jbic' ya'lel que?

²⁰ Me oy jmule, ¿c'usi chopol chaspasbot, vo'ot li jpamuc'tavanejot yu'un cristianoetique? ¿C'u yu'un ti vu'un chachan ac'ob ta jtojol ta flechaetic avu'une? ¿Me yu'un solel ech' xa avo'nton ta jventainel?

²¹ ¿C'u yu'un mu xats'icbun li jchopolile? ¿C'u yu'un mu xapasbun perdón ti bu jtaoj jmule? Po'ot xa sc'an ximochi ta pucuctic, ac'o me chlic to asa'un, pero mu'yuc xa'ox li' oyune —xi li Jobe.