Job 6 - Bible in Tzotzil de Chenalhó with Deuterocanon

La spac sutel sc'oplal li Jobe

¹ Li Jobe lic tac'ovuc, jech laj yal:

² —Tauc xich' bisel avil li jvocol xchi'uc li at-o'nton chca'ye, jmojuc chich' bisel ta kilo scotole,

³ ech'em jech yepal chloc' jech chac c'u cha'al yi' ta ti'nab, ja' yu'un tsots chic'opoj.

⁴ Yu'un li' xa mats'ajtic ta jbec'tal sflecha li Boch'o ech'em svu'ele, chanov xa ta scotol jbec'tal chca'ay li svenenoale; li vocoletic chac' Diose laj xa stsalun.

⁵ ¿Me oy bu chava'ay ch-oc' te'tical buro ti c'alal oy lec sve'ele? ¿Me oy chava'ay xme'et no'ox vacax ti c'alal oy lec jobel slo'e?

⁶ ¿Me oy boch'o tsve' ve'lil ti mu'yuc yats'amile? ¿Me oy lec smuil ta lo'el li saquil ton caxan no'oxe?

⁷ Li c'usi mu ono'ox jc'an chc'ot ta jtojole, li' ta orae ja' xa jve'el c'otem o.

⁸ Oyuc c'uxi xiyac'bun c'usi ta jc'anbe li Diose; oyuc c'uxi xiyac'bun li c'usi tsc'an co'ntone;

⁹ Oyuc c'uxi c'otuc ta yo'nton Dios slajesbun coraile; oyuc c'uxi snet'un o yalele; j'ech'el jvocol o ti jechuque.

¹⁰ Le'e ja' spatubil co'nton chc'ot, yu'un mu'yuc bu jbajojbe o smantal li Ch'ul Diose, jech xcuxet no'ox co'nton ac'o chamcun.

¹¹ ¿Bu xa ta jta jtsatsal ti xu' to ta jmalae? ¿C'u to snatil corail ti xu' to li' ta jts'ique?

¹² ¿Me yu'un stsatsal ton li jbec'tale? ¿Me yu'un bronce taq'uin jbec'talinoj?

¹³ Mu'yuc c'usi xu' cu'un ta jtuc no'ox; mu'yuc xa coltael o ta jtojol.

¹⁴ Li boch'o oy svocole xu' to chpatbat yo'nton yu'un li xchi'ile, ac'o me scomtsanoj yich'el ta muc' li Boch'o ech'em svu'ele.

¹⁵ Pero li boch'o lec jc'opan jba jchi'uque ja' no'ox chislo'laicun; ja' jechic jech chac c'u cha'al bevo' ti lec xa tsots chanov ya'lel yilele, pero ta ora no'ox ta xyal.

¹⁶ Ac'o me tatuben xa li ya'lel chjelove, ac'o me macal ta pimil bot xchi'uc ta tayo,

¹⁷ pero c'alal chq'uepe, ta x'ul; c'alal chc'uxub c'ac'ale, ta sacch'ay o batel.

¹⁸ Ja' ta scoj chlic stamic batel yan be li jtsob jxanubaletique; te chch'ayic o batel ta be, jech te chchamic o ta taqui-o'nal.

¹⁹ Li jtsob jxanubaletic liquemic tal ta Temán xchi'uc ta Sabae ja' xa te sna'ojic batel; ja' xa te spatoj batel yo'ntonic.

²⁰ Pero altic ti ja' spatoj yo'ntonic yu'une, yu'un mu'yuc c'usi la staic ti c'alal ic'otique, jech te chchibaj yo'ntonic o yu'un.

²¹ Ja' jech c'otemoxuc ta ora li vo'oxuque; c'alal laj avilic ti toj ech'em jvocole, laxi'ic yu'un.

²² Li vu'une mu'yuc c'usi la jc'anboxuc; mu'yuc laj calboxuc ti ac'o atojic ta taq'uin sventa ac'o colcune.

²³ Mu'yuc laj calboxuc ti ac'o apojicun ta sc'ob li cajcontrae, xchi'uc ti ac'o acoltaicun ta sventa li j'uts'intavanejetique.

²⁴ “Chanubtasicun ca'tic, mu'yuc xa chic'opoj li vu'une; ac'bicun jna' bu ti mu'yuc lec batem cu'une.

²⁵ Li tuq'uil tojobtasele toj jun yutsil, pero li vo'oxuque mu xca'ibe smelol li c'usi laj xa avalilanbicune.

²⁶ ¿Me chanopic ti mu'yuc stu li c'usi laj cale? ¿Me chanopic ti mu'yuc lec ya'yej slo'il li boch'o oy svocole, ti ja' no'ox jech chac c'u cha'al c'usi chcuchat batel ta iq'ue?

²⁷ Ja' no'ox oy ta avo'ntonic chavuts'intaic li boch'o mu'yuc xa stot sme'e; amacojbeic sat li boch'o lec xac'opanique.

²⁸ Q'uelicun lec avilic; q'uelic me epalc'op li c'usi chacalboxuque.

²⁹ Suteso me ac'opic, jech mu chopoluc chacomic; suteso ac'opic, ch'unic ti ja' melel c'usi laj cale.

³⁰ ¿Me oy c'usi chopol chloc' ta que? ¿Me chacuyic ti mu xca'ay me oy c'usi chopol chloc' ta quee?