Job 5 - Bible in Tzotzil de Chenalhó with Deuterocanon

¹ “Job, avanan ca'tic; jq'ueltic me oy boch'o chastac'bot. ¿Boch'o junucal banquilal te ta vinajel chac'opan?

² Ta melel li bol cristianoe ta xmilat yu'un li sc'ac'al yo'ntone; ta xmilat yu'un li c'usi batem ta yo'nton tsc'upine.

³ Li vu'une laj quil ti oy jun chopol vinic lec ibat yu'un scotole, pero ta ora no'ox ital j'ilc'op ta sna.

⁴ Li xnich'nabe mu'yuc xc'uxubinelic me jutuc; pech'bil ta teq'uel icomic c'alal laj yich'ic chapanel, me jutuc mu'yuc spojelic.

⁵ Li c'usitic sts'unoje ja' ive'bat yu'un li jvi'naletique. Ac'o me ta ch'ixtic oy, laj ono'ox sloq'uesic; li c'usitic oy yu'une ja' i'ich'bat yu'un li jtaquiti'iletique.

⁶ Li vocole muc ta banamiluc chloc' tal; li uts'intaele mu jechuc no'ox chjav loq'uel tal.

⁷ Ja' stuc cristiano tsvoq'ues li vocol jech chac c'u cha'al li nich-c'oc' ti stalel o chcuchat muyel ta iq'ue.

⁸ Ti vu'cun jech oy jvocole, ja' ta jsa' li Diose; chcac'be ta sc'ob scotol li jvocole.

⁹ Yu'un ja' xu' yu'un tspas ep muc'tic sq'uelubiltac; xu' tspas tsotsic sq'uelubiltac ti mu stac' atel c'u yepale.

¹⁰ Ja' chac' tal vo' ta banamil; ja' chat'es li osil banamile.

¹¹ Ja' tstoy liquel li boch'o biq'uit ch-ilatique; ja' chchabi li boch'o toj ep svocolique.

¹² Ja' tsoquesbe c'usi snopoj tspas li boch'o toj bij scuyoj sbae, jech mu'yuc c'usi chc'ot ta pasel o yu'un.

¹³ Ja' chac' ti te chucul ac'o c'otuc ta sventa sbijil li boch'otic bij scuyoj sbaique; ja' tsmacbe ta be c'usi chopol xchapanojic li boch'otic chopolique.

¹⁴ Ta sac osile tsbosi yacanic jech chac c'u cha'al chanovic ta ic' osil; ta o'lol c'ac'ale jeche' xmachlajet chanovic jech chac c'u cha'al ta ac'ubaltic.

¹⁵ Ja' tscolta ta milel ta espada li me'onetique; ja' tscolta ta sventa yeic li boch'otic chopolique; ja' tscolta loq'uel ta sc'obic li jsa'c'opetique.

¹⁶ Ja' te spatoj yo'ntonic o li boch'otic mu'yuc stsatsal yo'ntonique; ja' tsmacbe yeic li boch'otic chopolique.

¹⁷ “Xcuxet no'ox yo'nton li boch'o chich' tuq'uibtasel yu'un Diose, ja' yu'un mu me xabaj li nucul chayac'bot Boch'o ech'em svu'ele.

¹⁸ Me oy bu chtuch' yu'une, ja' chpix lec; ja' tsyayijes, ja' chpoxta noxtoc.

¹⁹ Ta jujucoj avocole chascoltaot ono'ox; mu xac' stsacot o li c'usi chopole.

²⁰ Ja' chascoltaot ta yorail vi'nal, jech mu xacham; ja' chascoltaot, jech mu xacham ta espada ta yorail pasc'op.

²¹ Ja' chaspojot ta sventa c'usiuc no'ox cha'albat; mu'yuc c'usi chaxi'be ti c'alal chvul tsots vocol ta atojole.

²² Xats'ein no'ox ta yorail vi'nal, xchi'uc ta yorail vocol; mu'yuc chaxi' yu'un li te'tical chonbolometique.

²³ Li tonetique mu'yuc ta smaquic li avosile; li chonbolometic ta te'tique mu'yuc chayilbajinicot.

²⁴ Lec chbat avu'un scotol te ta ana; c'alal chaq'uel li c'usitic oy avu'une, mu'yuc c'usi sc'an.

²⁵ Jech noxtoc chavil ti bats'i ep chbol li amomnich'nabe; bats'i ep chbat jech chac c'u cha'al ts'i'laletic.

²⁶ Lec ataoj amalubel chacham jech chac c'u cha'al jchuc trigo ti lec staoj syijil chich' tuch'ele.

²⁷ Le'e quilojtic xa lec, ta jna'tic ti ja' melele; a'yo lec ava'ay ec li vo'ote, nopo lec aba ava'ay —xi li Elifaze.