Job 41 - Bible in Tzotzil de Chenalhó with Deuterocanon

¹ “¿Me xu' chanit loq'uel ta nitubil choy li muc'ta Leviatane?, ¿Me xu' chachucbe ch'ojon ta yoc' sventa chanit loq'uel?

² ¿Me xu' avu'un chaxojbe ch'ojon ta sni', me xu' avu'un chaxojbe jelovel staq'uinal scov?

³ ¿Me xvocolet xa ta atojol yu'un ac'o ac'uxubin? ¿Me biq'uit xa xac' sba ta atojol?

⁴ ¿Me xu' chachapan achi'uc yu'un ac'o comuc ta amozo ti jayib c'ac'al cuxule?

⁵ ¿Me xu' chachi'in ta tajimol jech chac c'u cha'al mut? ¿Me xu' chachuc yu'un ac'o yixtan avunin tsebetic?

⁶ ¿Me xu' chich' chapanbel stojol yu'un ac'o yich' manel? ¿Me xu' chich' bic'tal bojilanel sventa chich' chonel?

⁷ ¿Me xu' avu'un chavombe ta ts'ubts'ubni' taq'uin li snuculile? ¿Me xu' avu'un chavombe ta lanza li sjole?

⁸ Me chavac' ac'ob ta sbae, chayac'bot lec avocol, mu xch'ay ta avo'nton o; mu xa xac'an xapas jech ta yan velta.

⁹ Li boch'o tsnop ti tstsal yu'une altic, yu'un ja' no'ox me laj yile, chi' ta ora.

¹⁰ Me oy boch'o tsa'ilanbe sjole, ta x'ilin; mu'yuc boch'o xu' chnopaj ta stojol.

¹¹ ¿Me oy boch'o oy c'usi laj yac'bun ba'yuc ti ja' xa no'ox ta jpac sutel tale? Scotol li c'usi oy ta yolon vinajele ja' cu'un scotol.

¹² “Ta xcalbe sc'oplal noxtoc yoc sc'ob li Leviatane, xchi'uc li slomoe, xchi'uc ti toj yan o c'u x'elan pasbil ti mu'yuc boch'o jech xco'laj xchi'uque.

¹³ ¿Boch'o xu' yu'un tsloq'uesbe li snuculile? ¿Boch'o xu' yu'un chnopaj batel sventa chac'be sfreno?

¹⁴ ¿Boch'o xu' yu'un chjach'be ye ti cholol no'ox stanale, xchi'uc ti toj xi'bal sbae?

¹⁵ Yu'un li snuculile lec tsots jech chac c'u cha'al macubbail; lec xch'ijch'un stsatsal, lec pixil o li sbec'tale.

¹⁶ Lec stsacojan sba; me jutuc mu xjelov ic'.

¹⁷ Lec tsots pac'ajtic ta sbec'tal; mu xu' chich' cho'el.

¹⁸ C'alal ch-at'isaje, xco'laj xchi'uc sacsevul yilel; li sate xojoban jech chac c'u cha'al c'alal chloc' c'ac'al.

¹⁹ Ta yee chloc' yat c'oc', xchi'uc nich c'oq'uetic yilel.

²⁰ Ta sni'e chloc' ch'ayil jech chac c'u cha'al bin ti c'alal chvocane.

²¹ Li yic'al yee tstsan yu'un li ac'ale; chloc' ep c'oc' ta ye.

²² Li snuq'ue bats'i tsots; scotol li boch'o chilique ta xi'ic yu'un.

²³ Ti bu c'unic sc'oplale, tsatsuben o jech chac c'u cha'al tsatsal taq'uin.

²⁴ Li yo'ntone mu sna' xnic jech chac c'u cha'al jbej ton; lec tsots jech chac c'u cha'al cho'.

²⁵ C'alal chcotie, ta xi'ic li boch'otic tsots svu'elique; c'alal chbaq'ue, ta xjatovic batel ta anil.

²⁶ Mu xu' chich' milel ta espada, ta lanza, ta flecha, o me ta biq'uit lanza ti oy lec sni'e.

²⁷ Li taq'uine xco'laj no'ox xchi'uc jobel cha'ay; li broncee xco'laj no'ox xchi'uc c'a'te' cha'ay.

²⁸ Mu xjatov yu'un li flechae; me chich' ac'bel tone, xco'laj xchi'uc taqui jobel cha'ay.

²⁹ Me chich' majel ta te'e, xco'laj no'ox xchi'uc c'ajben cha'ay, stse'in no'ox c'alal cha'ay xjubet xa batel li taq'uin ti lec ts'ubajtic sni'e.

³⁰ Ta xch'ute chincultic sba; joc'bil chcom banamil yu'un ti c'alal chpatie.

³¹ Li natil nabe chvocan yu'un jech chac c'u cha'al bin; chvocan jech chac c'u cha'al vo' ti c'alal chich' ac'bel xpoxile.

³² Ta spate chvocan comel li vo' yu'une; sac jisan chcom yu'un jech chac c'u cha'al saquil jolal.

³³ Mu'yuc c'usi yan chanul ti xco'laj xchi'uque; ja' no'ox stuc jech pasbil ti mu sna' xi'e.

³⁴ Mu'yuc stu chil li yantic chonetic ti tsots yo'ntonique; ja' ajvalil yu'un scotol li chonbolometic ti bats'i simaronique —xi li Muc'ul Diose.