Job 40 - Bible in Tzotzil de Chenalhó with Deuterocanon

¹ Li Muc'ul Diose jech to laj yalbe li Jobe:

² —¿Me ja' jech bijot ti chatsaquilan ta c'op li Boch'o ech'em svu'ele? ¿Me xu' to avu'un chataq'uilanbun li c'usi la jac'bote? —xut.

³ Itac'ov li Jobe:

⁴ —¿C'usi xu' chajtac'bot li vu'une yu'un toj biq'uitun ta atojol? Ja' lec ta jmac o li quee.

⁵ Oy xa jayibuc velta lic'opoj, pero li' ta orae mu'yuc xa c'usi chcal o —xi li Jobe.

Ic'opoj yan velta li Diose

⁶ Li Muc'ul Diose ic'opoj tal yan velta ta sutub ic', jech laj yalbe li Jobe:

⁷ —Li' ta orae chuco lec avex jech chac c'u cha'al vinic; tac'bun tal li c'usi chajac'bote.

⁸ ¿Me chac'an chaval ti mu'yuc tuc' c'usi ta jpase? ¿Me chac'an chatic'bun jmul yu'un jech ac'o vinajuc ti mu'yuc amul li vo'ote?

⁹ ¿Me tsots avu'el jech chac c'u cha'alun? ¿Me xco'laj xchi'uc chauc xac'opoj jech chac c'u cha'al li vu'une?

¹⁰ Lapo ta ora jech chac c'u cha'al ac'u' li amuc'ul atsatsale; pixo lec aba quic ta avutsil xchi'uc ta axojobal.

¹¹ Q'uelo avil scotol li jtoybaetique; malbo batel ta stojolic li sc'ac'al avo'ntone, bic'tajeso o ta j'ech'el.

¹² Mu'yuc stu ac'o comicuc o ta asat; pech'bil ta teq'uel ac'o comicuc avu'un ta buyuc no'ox oyic li boch'otic chopolique.

¹³ Mucul ac'o comicuc ta pucuctic avu'un scotol; macbo satic, ac'o batel ta ic' osil.

¹⁴ Jech xu' chaquich'ot ta muc', yu'un ta jna' ti xu' avu'un chacolta abae.

¹⁵ “Q'uelavil li muc'ta Behemot ti vu'un jpasoj jech chac c'u cha'alote; ts'i'laletic ta slo' jech chac c'u cha'al vacaxetic.

¹⁶ Pero toj tsots yipal, bats'i tsots li slomotaque.

¹⁷ Li snee ja' jech chac c'u cha'al ch'ut te'; li xch'uxuviltaque solel lec jalbilic.

¹⁸ Li sbaquiltaque lec tsotsic jech chac c'u cha'al bronce taq'uin; scotol li yoc sc'obe xco'laj xchi'uc stsatsal balbal taq'uin.

¹⁹ Le'e ja' yabtel coc jc'ob; ja' no'ox vu'un yajvalun ti xu' cu'un ta jmile.

²⁰ Ja' te chch'i sve'el ta vitsetic yo' bu xpaxajebic li chonbolometique.

²¹ Ts'acal chbat patluc ta yaxinaltic; chbat suban sba ta ajtic ti bu t'uxul no'oxe.

²² Li te'etic ti oy lec sc'obc'obe lec tsmaquic ta xyaxinalic; li sauce-te'etic ta ti' uc'ume te setelic ta spat xocon.

²³ Ac'o me chnoj li uc'um jech chac c'u cha'al Jordane, mu'yuc xi'bal sba chil; ac'o me chc'ot c'alal ta ye li snojelale, jun yo'nton te mochol o.

²⁴ ¿Me oy boch'o xu' yu'un tstsac ti c'alal lec viq'uil sate? ¿Me oy boch'o xu' yu'un chojbe xch'ajanul sni'?