Job 4 - Bible in Tzotzil de Chenalhó with Deuterocanon

Li Elifaze lic xchi'in ta lo'il li Jobe

¹ Li Elifaz liquem ta Temane jech lic yalbe li Jobe:

² —Job, ta jna' ti uts'intael chava'ay me chajc'opanotcutique, pero ¿boch'o xu' yu'un ti mu xc'opoj o jbeluque?

³ Q'uelavil, li vo'ote ep boch'otic laj achanubtas; vo'ot laj atsatsubtasbe yo'nton li boch'otic mu'yuc stsatsal yo'ntonique;

⁴ vo'ot laj anit liquel li boch'o iyalic ta lume; vo'ot laj avico li boch'otic ta xa'ox xbalch'ujique.

⁵ Pero c'alal ital ta atojol atuc li c'usi chopole, chchibaj xa avo'nton; c'alal nabal xa ta abec'tale, chlo'ilaj avo'nton.

⁶ ¿Me mu'yuc apatoj avo'nton ti lec avich'oj ta muc' li Diose? ¿Me mu'yuc apatoj avo'nton ti lec tuc' c'usitic chapase?

⁷ Nopo lec ava'ay li c'usi chacalbote. ¿Me oy bu aviloj ich'ay batel li boch'o mu'yuc smule? ¿Me oy aviloj laj yich' milel li boch'o tuc' yo'ntone?

⁸ Li vu'une ja' no'ox quiloj li boch'otic tsts'unic c'usi chopole, li boch'otic tsts'unic c'usitic mu'yuc leque ja' ono'ox ta sc'ajic li c'usi sts'unojique.

⁹ Jech ta xlajic ta yic'al ye li Diose; ta xchamic ta sc'ac'al yo'nton li Diose.

¹⁰ Ac'o me tsots xu' yu'unic, me x'avetic no'ox jech chac c'u cha'al bolom ti x'avet, ti xlaquet no'oxe, pero ta spajesatic yu'un Dios, ta sc'asbat stanal yeic yu'un li Diose.

¹¹ Ta xchamic jech chac c'u cha'al mol león ti mu'yuc bu tsta sve'ele, jech tanpuc ta xbat yol li me' leone.

¹² “Oy c'usi laj ca'ay ta mucul; jutuc svisvun laj ca'ay ta jchiquin.

¹³ Ta ac'ubaltic c'alal ja'o yorail chvay scotol cristianoetique, oy c'usi tsots laj quil ta jch'ulel.

¹⁴ Pero toj xi'bal sba, solel linic yu'un; la sniquesbun c'alal ta jbaquiltac.

¹⁵ Laj ca'ay oy c'usi xjublej jelovel yic'al ta jsat; solel tsaval to jtsotsil ic'ot yu'un.

¹⁶ Laj quil te va'al ta stuq'uil jsat xco'laj xchi'uc nac'ubalil yilel, pero muc xcotquin boch'o. Te ch'anxi oy; ts'acal laj ca'ay jech laj yal:

¹⁷ ‘¿Me oy boch'o solel tuc' ta stojol li Diose? ¿Me oy boch'o toj lec jech chac c'u cha'al li Jpasvanej yu'une?

¹⁸ Li yajtuneltac te ta vinajele mu'yuc ono'ox spatoj yo'nton yu'un, yu'un oy ono'ox c'usi mu'yuc lec staojbe ec li yaj'almantaltaque.

¹⁹ ¡Buuc xa li boch'o pasbilic ta lum ta ach'el jech chac c'u cha'al na pasbil ta ach'el, ti vuchul ta ba pucuctique, ti c'unic ta voch'el jech chac c'u cha'al c'usi ochem xjoch'e!

²⁰ Ta jun no'ox c'ac'al xu' lajem scotolic; j'ech'el chbatic o sbatel osil, mu'yuc xa boch'o tsna' o.

²¹ Li xcuxlejalique mu'yuc stu jech chac c'u cha'al ch'ojon ti tuch'em xae, jech mu'yuc staoj sbijilic o c'alal chchamic’, xi laj ca'ay.