Job 39 - Bible in Tzotzil de Chenalhó with Deuterocanon

¹ “¿Me xana'be yorail c'usi ora chvoc' yol li te'tical tentsunetique? ¿Me oy aviloj c'u x'elan chvoc' yol li te'tical chijetique?

² ¿Me ana'oj c'usi ora chlic ayinuc xch'ut, xchi'uc ta jayib to u chbat voc'uc li yole?

³ C'alal tsvoq'ues li yolique, ta slot'an sbaic, jech ta xvoc' yu'unic.

⁴ Li yolique lec tsots chbat, te ta xch'iic o ta te'tic; ts'acal chloq'uic batel, mu xtal xchi'in o li sme'ique.

⁵ “¿Boch'o la scolta batel li te'tical buroe? ¿Boch'o laj yac' ti colem batel ta te'tique?

⁶ Vu'un laj cac'be snain li soplejtic ti bu mu'yuc xa boch'o te chnaquie, xchi'uc li banamil ti bu mu xa c'usi xch'i oe.

⁷ Yu'un li stuquique mu sc'anic ti xvochlajet no'ox cristianoetic ta lumetique; mu xich'ic ta muc' c'alal ch-avan li yajval arieroe.

⁸ Ja' no'ox te chanovic ta vitsetic, tsa'ic sve'elic; te tsa'ic c'usitic lec yoxic slo'ic.

⁹ “¿Me chanop ti chch'un abtel avu'un li tot te'tical vacaxe, xchi'uc me chanop ti xu' chavac' vayuc ta snail avacaxe?

¹⁰ ¿Me xu' avu'un chachucbe yabtejeb ta snuc' yu'un chaslocbot li avosile? ¿Me chanop ti te xna'pnun batel ta apat chch'un amantale?

¹¹ ¿Me xu' chapat avo'nton ch-abtej avu'un? ¿Me xu' chapat avo'nton ta sventa ti tsots slomoe?

¹² ¿Me chanop ti xu' chascoltaot ta xcuchel li c'usi chloc' avu'une, xchi'uc ti tscoltaot ta sloq'uesel sbec' li atrigoe?

¹³ “¿Me vo'ot laj avac'be st'ujumal xic' xchi'uc sc'uc'umal li avestruz mutetique?

¹⁴ Le'e tsmuc comel ta yi'tic li stone yu'un jech te ac'o q'uixnajuc ta c'ac'al.

¹⁵ Mu snop me xu' ch-ech' t'usatuc ta teq'uel; mu snop me xu' ch-ech' tec'atuc ta te'tical chonbolometic.

¹⁶ Toj simaron tspas sba ta stojol li yole, mu scuy ta yol yilel; mu'yuc ta yo'nton me altic ch-ech' li yabtele.

¹⁷ Yu'un mu'yuc ep sbijil laj cac'be; mu'yuc laj cac'be lec snopubil yu'un.

¹⁸ Pero c'alal chlic sjapu tsots anile, mu xtaat yu'un li ca'etic xchi'uc li boch'otic cajajtique.

¹⁹ “¿Me vo'ot laj avac'be stsatsal li ca'etique? ¿Me vo'ot laj avac'be li sbonoc' ta snuq'uique?

²⁰ ¿Me vo'ot chavac' ti xbitic no'ox jech chac c'u cha'al c'ulubetique? ¿Me vo'ot chavac' ti xpiet no'ox sni', ti xi'bal xa sba ta q'uelele?

²¹ Yu'un xjot'jun xa ta banamil tspas, xcuxet no'ox yo'nton ti lec xu' yu'un cha'ye; sjip no'ox sba batel ta anil sventa pasc'op.

²² Me jutuc mu'yuc xi'el ta yo'nton; mu sna' xi' sutel ta sventa li espadae.

²³ Ac'o me xchac'lajet no'ox li yavil flechaetique, ac'o me sts'aylajet no'ox li lanzaetic xchi'uc li yantic taq'uinetic ti lequic sni'e, pero mu xi' o.

²⁴ Ta scotol yip xchi'uc ta sc'ac'al yo'nton ch-anilaj batel; mu xa sventauc c'alal chbac' li oq'uese.

²⁵ Sts'ijts'un no'ox tstac' c'alal cha'ay chbac' li oq'uese; ta nom no'ox chjuch'ta batel li pasc'ope, yu'un cha'ay ti x'avlajetic no'ox ta pasmantal li banquilal soldadoetique, xchi'uc ti xvochetic no'oxe.

²⁶ “¿Me vo'ot ta abijil chvil batel li xiquetic ti te chbatic ta stuq'uil sure?

²⁷ ¿Me vo'ot chapas ta mantal ti chbatic ta toyole, xchi'uc ti chac' stasic ta toyole?

²⁸ Le'e te nacalic o ta ch'entic; te sa'oj lec snac'ubbailic ta mero jol ch'entic.

²⁹ Te to chlic sq'uel tal ta nom li sve'ele yu'un lec xc'ot satic ta nom.

³⁰ Li yalabtaquique ja' sve'elinojic li ch'ich'e; te chbatic ti bu chmilbat sve'elique.