Job 37 - Bible in Tzotzil de Chenalhó with Deuterocanon

¹ “C'alal chca'ay ti chtal xa tsots chauquil vo'e, xbitbun no'ox liquel li co'ntone, chloc' xa ta yav ya'yel.

² A'yo lec ava'ay c'u x'elan tsots chbac' sc'opojel li Diose, xchi'uc li chauc cht'om loq'uel ta yee.

³ Sjislajet to batel yu'un ta scotol vinajel; chvinaj c'alal to ta jujujot sti' banamil.

⁴ Ta jliquel ja'o chca'ibetic yech'al c'alal tsots chlic c'opojuc li Diose. Ac'o me laj yich' a'yel li sc'ope, pero mu xpaj o li chauque.

⁵ C'alal tst'omes loq'uel sc'opojel li Diose, ep c'usitic muc'tic chc'ot ta pasel ti mu xca'ibetic smelole.

⁶ Ja' tspas mantal ti ac'o yaluc ta banamil li tayoe; ja' tspas ta mantal ti tsots yip ac'o taluc li chauquil vo'e.

⁷ Yu'un jech ac'o maquicuc ta abtel li cristianoetique; jech ac'o yotquinic ti ja' tspas mantal li Diose.

⁸ Li chonbolometique ch-och ta xch'enic; te tsnac' sbaic o.

⁹ Ta stuq'uil sur chloc' tal li muc'ta sutub iq'ue; ta norte chlic tal li siquil iq'ue.

¹⁰ Ta yic'al ye Dios no'ox ta x'ayin li tayoe, jech ta xlic spat sba li vo'etique.

¹¹ Ts'acal chlic yac'be xcuch batel li toquetique; ja' xa chlic scocan yalel tal, capal ta sacsevuletic chac' tal.

¹² Li toquetique xvalc'uj sutbijic no'ox; ja' chch'unic c'usi ch-albatic yu'un li Diose; ja' jech tspasic ta sbejel banamil.

¹³ Scotol le'e xu' tstunes sventa chac'be stoj o smul cristianoetic li Diose, xchi'uc sventa chac'be o yil slequil yo'nton.

¹⁴ “Job, a'yo lec ava'ay; nopilano lec ava'ay ti xch'ay co'ntontic yu'un yabtel li Diose.

¹⁵ ¿Me xana' c'u x'elan tspas scotol li Dios le'e, xchi'uc c'u x'elan chut ti tstsan ta toc yu'un li sacsevule?

¹⁶ ¿Me xana' c'u x'elan ti jech no'ox joc'ol ta ic' li toque? Ja' svinajeb ti toj labal sba c'u x'elan sbijil li Diose.

¹⁷ ¿Me xana' c'u x'elan ti toj q'uixin chava'ay ac'u' c'alal chvul li' ta banamil li ic' chlic tal ta sure?

¹⁸ ¿Me vo'ot laj acolta ta xlich'anel vinajel li Dios ti jech lec tsots icom jech chac c'u cha'al lechlech taq'uine?

¹⁹ Albuncutic me oy c'usi stac' chcalbetic li Diose. Li vu'uncutique mu jna' c'usi chcalcutic; mu xu' toj ep chic'opojcutic ta stojol.

²⁰ Li vu'une mu'yuc chcalbe ti oy ca'yej ta stojole; me oy c'usi chcale yu'un xa no'ox ta jc'an ti ac'o yulesun oe.

²¹ “Q'uelavil, mu xu' ta jq'ueltic c'ac'al ti c'alal chbut'e; pero c'alal me chtal tsots iq'ue tsacubtas lec scotol.

²² Ta stuq'uil nortee chquiltic batel jech chac c'u cha'al xojobal c'anal taq'uin; toj yan to sba yutsil slequilal li Dios chvinaje.

²³ Yu'un toj ech'em svu'el, mu jna'tic c'u x'elan; toj ech'em stsatsal, tuc' c'usi tspas, mu'yuc boch'o ta jech no'ox chac'be svocol.

²⁴ Ja' yu'un scotol cristiano xi'bal sba cha'yic, yu'un li stuque mu xich' ta muc' li boch'otic tsnop ti oy lec sbijilique —xi li Eliue.