Job 35 - Bible in Tzotzil de Chenalhó with Deuterocanon

¹ Jech to laj yal li Eliue:

² —¿Me chacuy ti toj tuc' li c'usi laj avale? ¿Me chanop ti vo'ot xjelov atuq'uil jech chac c'u cha'al li Diose?

³ Yu'un jech laj aval: ‘Mu sventauc Dios me ta jsa' jmule; mu'yuc c'usi lec ta jta noxtoc me mu'yuc ta jsa' jmule’, xachi.

⁴ Vu'un chajtac'bot sutel li ac'ope, xchi'uc sc'opic li achi'iltac li' oyique.

⁵ Q'uelo muyel avil li vinajele; q'uelo lec avil li toquetique ja' toyol oy avu'un.

⁶ Me chasa' amule, mu ja'uc tsoc avu'un li Diose; ac'o me ep chasa' li amule, mu'yuc c'usi chc'ot ta pasel ta stojol avu'un.

⁷ Me tuc' c'usi chapase, ma'uc oy c'usi lec tsta avu'un noxtoc; ma'uc tsta slequilal avu'un li Diose.

⁸ Li cristiano jech chac c'u cha'al vo'ote ja' tsoc ti c'alal chopol c'usi chapase; ja' chlecubic noxtoc ti c'alal lec c'usi chapase.

⁹ “Ta scoj tsots uts'intael ch-avan li cristianoetique; ta scoj ilbajinel yu'un jpasmantaletic ch-oq'uic ta sc'anel vocol.

¹⁰ Pero mu'yuc jech chalic: ‘¿Bu oy li Diose?, ja' li Boch'o la spasutique, ti chijyac'butic xcuxetel co'ntontic c'alal xco'laj xchi'uc ic' osil chquiltique,

¹¹ ti xjelov to jbijiltic chijyac'butic jech chac c'u cha'al li chonbolometique, ti ech'em chisabaltajesutic jech chac c'u cha'al mutetique’, mu'yuc xiic.

¹² Ac'o me ch-avanic, pero mu xtac'batic yu'un li Diose, yu'un chopol yo'ntonic, xchi'uc jtoybaetic.

¹³ Li Diose mu xich' ta muc' li c'usi mu'yuc stue; li Boch'o ech'em svu'ele li c'usi mu'yuc stue mu sc'an sq'uel, mu sc'an xa'ay.

¹⁴ ¿C'u x'elan xu' tstuc'ulan ti c'alal chaval ti mu'yuc chavil c'usi tspas li Diose? Scotol ti c'u xa'elane te xa oy ta stojol; malao no'ox ava'ay.

¹⁵ Chaval ti mu x'ilin, ti mu xac'be stojol li c'usi chopole, xchi'uc ti mu sventauc li muliletique.

¹⁶ Pero li c'usi chavale Job, mu'yuc stu; li epal lo'il chapase mu'yuc smelol o.