Job 34 - Bible in Tzotzil de Chenalhó with Deuterocanon

Li Eliue laj yal ti ja' tuc' yo'nton stuc li Diose

¹ Jech laj yal noxtoc li Eliue:

² —Vo'oxuc ti bijoxuque, a'yo ava'yic c'usi ta xcal; vo'oxuc ti lec chanubtasbiloxuque, tuc'ulanbicun ava'yic li ca'yeje.

³ Yu'un li jchiquintique xa'ay me lec li c'usi chcaltique, jech chac c'u cha'al lec xa'ay me mu ve'lil li jpac'otique.

⁴ Ja' jech li vu'utique ac'o jt'ujtic ec ti bu tuq'ue; ac'o cotquintic ti bu leque.

⁵ Yu'un li Jobe jech laj yal: ‘Li vu'une tuc' co'nton; ja' no'ox Dios muc xac' vinajuc ti mu'yuc jmule.

⁶ Me chcal ti oy jmule chi'epalc'opoj; ac'o me mu'yuc c'usi chopol jpasoj, pero mu xcol o li jbec'tale’, xi.

⁷ Mu'yuc boch'o yan jech chac c'u cha'al li Job ti mu tsotsuc ta labanel cha'ay Dios jech chac c'u cha'al vo' ti mu vocoluc ta uch'ele.

⁸ Jech noxtoc toj lec cha'ay chchi'in li boch'otic chopol c'usi tspasique; co'ol chanov xchi'uc li boch'otic chopolique,

⁹ xchi'uc chal ti mu'yuc c'usi tsta li boch'o tsa' c'u x'elan lec ch-ilat yu'un Diose.

¹⁰ “Vo'oxuc ti oy abijilique, a'yic lec li c'usi ta xcale. Li Diose mu snop c'usi chopol; li Boch'o ech'em svu'ele mu spas c'usi mu'yuc lec.

¹¹ Yu'un ja' chac'be stojol jujun cristiano ti c'u x'elan la spasique; ja' jech chac'be ti c'u x'elan lec xtojolin yabtelique.

¹² Ta melel li Diose mu sna' spas c'usi chopol; li Boch'o ech'em svu'ele mu spas c'usi mu'yuc tuc'.

¹³ Mu'yuc boch'o i'ac'bunuc yabtel ti ja' sventainoj li banamile, ti ja' la xchapan lec scotole.

¹⁴ Me tsc'an tsmacbe yo'nton, me tsc'an tstu'pbe yic' li cristianoetique,

¹⁵ ta ora chchamic scotolic; chc'atajic ta pucuc yan velta.

¹⁶ “Me bijote, a'yo lec; tuc'ulano lec li c'usi chcale.

¹⁷ ¿Li boch'o chopol chil c'usi tuq'ue me xu' tsventain scotol? ¿C'u yu'un ti chatic'be smul li boch'o bats'i tuc' yo'ntone?

¹⁸ Me chil ti chopol li ajvaliletique, me mu'yuc lec yabtelic li banquilaletique, chalbe ta sat: ‘Toj chopoloxuc, mu'yuc atuic’, xut.

¹⁹ Li stuque mu'yuc tst'uj boch'o chc'uxubin, ma'uc tscolta li banquilaletique, ma'uc ech'em chich' ta muc' li jc'ulejetique, ma'uc tsjip li me'onetique; co'ol tspasbe, yu'un ja' spasoj scotol.

²⁰ Li cristianoetique ta jliquel no'ox xu' chchamic; ta o'lol ac'ubal no'ox xu' chch'ayic batel; li boch'otic tsots svu'elique muc ta stsatsaluc cristiano chchamic.

²¹ Yu'un li Diose yiloj scotol c'usi tspas li cristianoetique; sq'ueloj scotol li jujujet yacan chanovique.

²² Mu'yuc bu ta tael bats'i ic' osil ti mu xa xvinaj, ti xu' te tsnac' sbaic li boch'otic chopol c'usi tspasique.

²³ Li Diose mu persauc chal c'usi ora chic' ta stojol cristiano sventa tsq'uelbe c'u x'elan li yabtelique.

²⁴ Xu' tsbic'tajes li boch'o muc' yabtelique; mu persauc tsjac' ba'yuc c'u x'elan yabtelic, jech chlic stic'be yan xq'uexol.

²⁵ Yu'un xotquin scotol li c'usitic tspasique; me tsc'an tsoques ta junuc ac'ubale, j'ech'el mu'yuc stu chcomic o.

²⁶ Ta satilal lec chac'be stoj smul ta scoj li xchopolilique,

²⁷ yu'un la sva'lupatinic comel li Diose; muc ja'uc la spasic li c'usi yaloje.

²⁸ Laj yac'beic ya'ay Dios yoq'uel yavanelic li me'onetique, xchi'uc li boch'otic abul sbaique, li Diose laj ya'ay.

²⁹ Pero me mu'yuc c'usi chal li Diose, ¿boch'o xu' tstic'be smul? Me tsnac' sat li Diose, ¿boch'o xu' tsq'uel? yu'un ja' stuc sq'ueloj jujun lum xchi'uc jujun cristiano.

³⁰ Ja' chal ti mu xu' ch-och ta pasmantal li chopol vinique, yu'un jech mu soques o li slumale.

³¹ “Ta jna' ti tsc'an jech chavalbe li Diose: ‘Laj xa quich'be stojol li jmule; mu'yuc xa ta jpas yan velta.

³² Ac'bun quil li c'usi mu xquile. Me oy la jpas c'usi chopole, mu'yuc xa ta jpas yan velta’, tsc'an xachi ta stojol.

³³ ¿Me yu'un chac'an ja' chaspasbot li c'usi lec chava'ay atuque? yu'un li vo'ote laj abajbe li c'usi la spasbote. Vo'ot tsc'an chat'uj, muc vu'cun chacalbot; alo ca'itic c'usi chac'an.

³⁴ “Li boch'otic bijic ti cha'ibeic smelol c'usi ta xcale, xchi'uc li boch'o oy c'usi lec sna'ique, jech chlic yalbicun:

³⁵ ‘Li Jobe mu'yuc stu li c'usi chale; mu'yuc smelol o li sc'ope.

³⁶ Tsc'an chich' a'yel lec c'u x'elan chlo'ilaj li Jobe, yu'un ti c'u x'elan chtac'ove ja' jech chac c'u cha'al chtac'ov jun chopol vinic.

³⁷ Ma'uc xa no'ox oy smul; ja' jtoyba noxtoc, yu'un xt'ax no'ox sc'ob ta jtojoltic, xchi'uc toj ep xa ijelov ye ta stojol li Diose’, xi chlic yalbicun —xi li Eliue.