Job 33 - Bible in Tzotzil de Chenalhó with Deuterocanon

Li Eliue toj bij la scuy sba ta stojol li Jobe

¹ “Ja' yu'un ta jc'an chava'ibun li jc'ope; a'yo lec ava'ay scotol li c'usi chcale.

² Li' ta orae ta jam que ta atojol; ta jbaq'ues jutuc li c'oq'ue xchi'uc li jnuq'ue.

³ Ta yutsil co'nton chcal li c'usi oy ta co'ntone; puru melelic li c'usi ta xloc' ta quee.

⁴ Yu'un pasbilun ta stsatsal Dios, ta yic'al ye Boch'o ech'em svu'el licuxi.

⁵ “Tac'bun tal me xu' avu'une; chapano lec c'usi chaval, jva'lebin jbatic ta c'op.

⁶ Yu'un co'olutic ta stojol Dios; pasbilun ta ts'u'ilum ec li vu'une.

⁷ Ja' yu'un mu'yuc xi'bal jba; muc vu'cun xa ech'em xu' cu'un ta jpas jba ta atojol.

⁸ Laj ca'ay lec ta jchiquin li c'usi laj avale; laj ca'ay lec ti jech iloc' ta avee:

⁹ ‘Li vu'une lec oyun, mu'yuc jmul; mu'yuc c'usi chopol jpasoj, mu'yuc mulil ta co'nton.

¹⁰ Pero li Diose ja' la sa' c'u x'elan la sa'bun jmul; laj xa scuyun ta yajcontra.

¹¹ Laj xa slats'bun ta lats'ubte' ya'yel li cacane; solel sq'uelojbun li jujujet cacan bu chixanove’, xachi.

¹² “Pero li c'usi laj avale mu'yuc lec, yu'un li Diose ja' toj ech'em smuc'ul ta scotol li cristianoetique.

¹³ ¿C'u yu'un ti tsots chatsac ta c'op li Diose? Yu'un chaval ti mu'yuc xastac'bot li c'usi chajaq'ue.

¹⁴ Yu'un li Diose oy ep ta chop c'u x'elan chc'opoj, pero li cristianoe mu xa'ibe smelol.

¹⁵ Oy chisc'opanutic ta jvayechtic, ta jch'uleltic; oy chisc'opanutic c'alal ja' to no'ox ch-och jvayeltic, xchi'uc c'alal ja'o batem lec jvayeltic.

¹⁶ Jech chlic tsc'opan li cristianoetique, tstaq'ui, tsibtas,

¹⁷ yu'un jech ac'o scomtsan li c'usi chopol tspase; ac'o svoc' sba ta sventa li toybaile.

¹⁸ Yu'un jech mu xbat ta muquinal ta ora, jech chcol ta sventa lajel.

¹⁹ “Jech noxtoc xu' chac'be stoj smul ta chamel; xu' chti'van scotol li sbaquiltaque.

²⁰ Ta xac' ibajuc xa'ay li ve'liletique; ac'o me lec li ve'lile, mu xa sc'an yo'nton.

²¹ Chlic yaluc li sbec'tale; chlic vinajanuc li sbaquiltaque.

²² Ta ti'ch'en xa oy batel; sve'el xa chamel lajel c'otem.

²³ Pero me chtal c'opanatuc yu'un jun yaj'almantal Dios ti t'ujbil chloc' tal ta epal mil j'almantaletique, me ja' chalbe ta jamal Dios ti ta melel tuc' yo'nton li vinique,

²⁴ me jech chlic yalbe li Diose: ‘C'uxubino li vinique; coltao xa, yu'un jech mu xbat ta ch'en, yu'un laj xa jtabe xq'uexol sventa smul’, me xute,

²⁵ li sbec'tale chlic lecubuc yan velta; chlic sta jech chac c'u cha'al ta squeremal ono'ox.

²⁶ Xu' chlic sc'opan li Diose, ta xlic c'uxubinatuc; xcuxet no'ox yo'nton chich' ta muc', yu'un la sta yan velta ti c'u cha'al ono'ox oye.

²⁷ Jech chlic yal: ‘La jta jmul; muc jpas c'usi tuc', pero li Diose muc xiyac'bun jtoj.

²⁸ La spojun jech muc xibat ta ch'en, jech li' to ta jq'uel saquil osil yu'un’, xi chlic yal.

²⁹ “Ja' jech ch-abtej jayibuc velta ta stojol cristiano li Diose.

³⁰ Xu' chlic scolta ta sventa lajel, jech ta to xac'be yil saquil osil.

³¹ Job, a'ibun li jc'ope; ch'anchan ava'ay, ta xic'opoj.

³² Me oy to stac'ubil avu'une, tac'bun me; c'opojan, yu'un ta jc'an ac'o vinajuc me ta melel mu'yuc amule.

³³ Me mu'yuc chac'opoje, a'ibun jc'op li vu'une; ch'anchan ava'ay, chajchanubtasot c'u x'elan chabijub, xi.