Job 31 - Bible in Tzotzil de Chenalhó with Deuterocanon

Li Jobe laj yal ta jamal ti mu'yuc smule

¹ “Li vu'une calojbe co'nton o ti mu'yuc ta jpich'-o'nta tsebetique.

² ¿C'usi jtojol chiyac'bun tal ta toyol li Diose? ¿C'usi chiyac'bun yalel tal li Boch'o ech'em svu'ele?

³ ¿Me mu ja'uc oy ta sventaic vocol li boch'otic chopolique? ¿Me ma'uc oy ta sventaic c'usi c'ux li jpasmuliletique?

⁴ ¿Me mu yilojuc Dios scotol li c'usi ta jpase? ¿Me mu sq'uelojuc li jujujet cacan chixanove?

⁵ “Me oy bu li'epalc'opoje, me oy boch'o la jlo'lae,

⁶ ac'o sbisbun ta ora li cabtele; te chil ti ta melel tuc' co'ntone.

⁷ Me oy bu itselbuj ta xocon be li cacane, me oy la xjochun batel li jsate, me oy c'usi la stsac li jc'obe,

⁸ yan boch'o ac'o sve'ic li c'usi jts'unoje; ac'o yich' bulel loq'uel li c'usitic jts'unoje.

⁹ “Jech noxtoc me oy lo'labil co'nton yu'un antse, me oy tete jsat me chcom stuc yajnil li jchi'il ta nacleje,

¹⁰ ac'o bat smac'lin yan vinic li cajnile; ac'o c'upinatuc ta yan viniquetic.

¹¹ Yu'un le'e toj chopol, toj q'uexlal sba; tsc'an chaq'uic stojol mulil li jchapanvanejetique.

¹² Yu'un li mulil le'e ja' jech chac c'u cha'al c'oc' ti chmilvane, ti chchic' scotol li c'usi oy cu'une.

¹³ “Me oy mu'yuc stu laj quil jmozo, jquiara ti c'alal tal sc'anic parteale,

¹⁴ ¿c'usi xu' ta jpas ta stojol li Diose? C'alal chisjac'bune, ¿c'usi ta jtac'be?

¹⁵ Yu'un jun no'ox li Dios ti la spasun jchi'uque; jun no'ox li boch'o la xchapanuncutic ta yut xch'ut jme'cutique.

¹⁶ “Mu'yuc bu la jquechan xc'uxubinel li boch'otic abul sbaique; mu teuc no'ox jq'ueloj chchamic ta vi'nal li me'on antsetique.

¹⁷ Mu'yuc baq'uin jtuc no'ox la jve' li jve'ele; laj ono'ox jvoc'be li me'on ololetique;

¹⁸ Ta yololalic ono'ox la jcuy jba ta totil yu'un li me'on ololetique; vu'un ono'ox la jcolta li me'on antsetique.

¹⁹ C'alal laj quil chcham xa li boch'o mu'yuc sc'u'e, xchi'uc li boch'o mu'yuc xaquita sventa sique,

²⁰ la jq'uixnajesic ta stsotsil jchij, jech ep la stojbicun ta vocol.

²¹ Mu'yuc bu la jye' jc'ob ta stojol li me'on ololetique, ac'o me jna'oj ti ch'unbilun ca'yej yu'un li jchapanvanejetique.

²² Me mu jechuc la jpase, ac'o c'asuc li ste'el jc'obe; ac'o loc'uc o c'alal ta jnecub.

²³ Li vu'une xi'emun ono'ox yu'un li stojol mulil chac' Diose; mu xu' cu'un ta jtsalbe li smuc'ul stsatsale.

²⁴ “Muc ja'uc xa jpatoj co'nton yu'un li c'anal taq'uin oy cu'une. ‘Vo'ot smuc'ul co'ntonot’, mu'yuc xcut.

²⁵ Ma'uc xcuxet xa co'nton ti c'alal ch-epaj li jc'ulejale, xchi'uc ti c'alal lec ta jpas canale.

²⁶ C'alal laj quil xojoban xa loq'uel tal c'ac'ale, xchi'uc c'alal toj c'upil xa sba sepet li ue,

²⁷ mu'yuc bu laj quich' ta muc' ta mucul; mu'yuc bu jts'uts' xa jc'ob senyail ti ta jts'uts' muyele.

²⁸ Ti jechuque ja' xa jmoton li stojol mulile yu'un ja' la jva'lupatin comel li muc'ul Dios ta vinajele.

²⁹ “Mu'yuc bu xcuxet xa co'nton c'alal oy svocol li boch'o chopol chiyilune; mu'yuc bu xitse'in xa ti c'alal la sta svocole.

³⁰ Mu'yuc bu la jc'anbe ti ac'o taluc tsots vocol ta stojole; mu'yuc bu la jc'an ti ac'o chamuque.

³¹ Mu'yuc bu jech laj yalic li boch'otic te oyic ta jnae: ‘Mu sta co'ntontic ta ti'bol yu'un’, mu'yuc xiic.

³² Li jxanubaletique mu'yuc bu te jq'ueloj ivayic ta osilaltic; persa la jam jna, laj quic' ochel.

³³ Mu yu'unuc ta jnac' jmul jech chac c'u cha'al tspasic li yantique. Mu'yuc ta jmuc ta co'nton c'usi chopol jpasoj

³⁴ ta scoj chixi' yu'un li epal cristianoetique, xchi'uc ta scoj chisna'leicun li cuts' calaltaque. Mu'yuc bu jnac'oj xa jba; mu xa xiloc' o ta sti' jna.

³⁵ Lec ti oyuc boch'o cha'ay c'usi chcale. Tsots co'nton chcal, xu' ac'o stac'bun li Boch'o ech'em svu'ele; ac'o yich' ts'ibael lec ta vun li c'usi jmule.

³⁶ Xu' ta jcajan batel ta jnecub li svunale; xu' ta jxoj batel ta jol sventa jcorona.

³⁷ Xu' ta xcalbe ta jamal c'usitic jpasoj li Diose; mu'yuc c'usi chal co'nton, xu' ta jva'an jba ta stojol.

³⁸ “Me oy xvocolet ta sc'anel parteal li cosiltac ta scoj quelc'anoje, me oy x'oc'oletic li banamil ta scoj pojbil cu'une,

³⁹ me oy elc'anbil no'ox la jpas li c'usi la jve'e, me oy bu laj cac'be svocol li yajvale,

⁴⁰ ac'o ch'iuc ch'ixetic ta xq'uexol li jtrigoe; ac'o ch'iuc chopol vomoletic ta xq'uexol li cebada cu'une. Li' ilaj yo'nton ta lo'il li Jobe.