Job 3 - Bible in Tzotzil de Chenalhó with Deuterocanon

Li Jobe la xchopolc'opta li sc'ac'alil c'usi ora ivoq'ue

¹ Ts'acal to li Jobe lic c'opojuc, lic xchopolc'opta li c'usi ora ivoq'ue;

² tsots ic'opoj jech laj yal:

³ —Toj chopol li jun ac'ubal c'usi ora lina'p ta xch'ut jme'e; toj chopol li c'ac'al ti c'usi ora livoq'ue.

⁴ Ja' lec ti ic' osil comuc o li jun c'ac'al le'e; ja' lec ti manchuc sventain li Dios ta toyole, jech muc sacub ti jechuque.

⁵ Ja' lec ti lajuc yich' pixel o ta pimil ic'al osile; ja' lec ti lajuc yich' maquel ta pimil ic'al toque; ja' lec ti imacuc li c'ac'al ti chac' ep xi'ele.

⁶ Toj lec ti lajuc yu'unin o li ic'al osile, jech mu'yuc tsacal icom ta atel ta sc'ac'alil jujun jabil ti jechuque; mu'yuc tsacbil ta atel ta sc'ac'alil jujun u ti jechuque.

⁷ Ja' lec ti manchuc yac' voc'cun li jun ac'ubal le'e; ja' lec ti mu'yucuc boch'o xcuxet yo'nton li jun ac'ubal le'e.

⁸ Toj lec ti lajuc soquesic li jtuch'-oraetique, ja' li boch'o yich'oj svu'elic ta stojol li Leviatane.,

⁹ Ja' lec ti mu'yucuc xac' xojobal li c'analetic iloc' tal ta sacubbale; ja' lec ti mu'yucuc xtal li sac osil laj yich' malaele; ja' lec ti mu'yucuc laj yilic ichacpojtaj tal li yibel vinajele.

¹⁰ Yu'un toj chopol li jun ac'ubal le'e, yu'un muc smacbe xch'ut li jme' ti bu to'ox tiq'uilune. Ti lajuc snac'une, mu'yuc li' chquich' tsots vocol ti jechuque.

¹¹ ¿C'u yu'un mu teuc licham ta yut xch'ut li jme'e? ¿C'u yu'un muc xicham ta ora ti c'alal ja' to no'ox livoq'ue?

¹² ¿C'u yu'un ti oy jol acanil te la scajanicun c'alal livoq'ue? ¿C'u yu'un ti oy chu'il te lichu'un tale?

¹³ Ja' lec ti chamcun ono'oxe, jun co'nton chivay ti jechuque; jun co'nton telelun ta jcux

¹⁴ jech chac c'u cha'al li ajvaliletic, li jbijubtasvanejetic ta banamil ti lec muc'tic na pasbil bu mucajtique,

¹⁵ o jech chac c'u cha'al banquilaletic ti la snojes lec snaic ta c'anal taq'uin, ta saquil taq'uine.

¹⁶ ¿C'u yu'un muc laj quich' ono'ox muquel jech chac c'u cha'al yalemal olol, o jech chac c'u cha'al olol ti chamen chvoq'ue?

¹⁷ Te ta ch'ene chlaj sc'oplal c'usi oy ta yo'nton li boch'otic chopolique; te chc'ot xcux yo'ntonic li boch'otic lajem xa stsatsalique.

¹⁸ Te chc'ot xcuxic noxtoc li jchuqueletique; mu'yuc xa cha'yic xc'aq'uet yajvalic yu'un li capuraletique.

¹⁹ Te oyic c'alal ta biq'uit, ta muc'; te oyic noxtoc li mozoetique, colemic xa ta sc'ob li yajvalique.

²⁰ “¿C'u yu'un ti li' to ch-ac'bat yil saquil osil li boch'o oy svocole? ¿C'u yu'un ti li' to ch-aq'ue cuxuluc li boch'o toj c'ux abul sbae?

²¹ ¿C'u yu'un ti li' to cuxul li boch'o ja' xa no'ox tsmala ac'o chamuc ti mu xchame, ti solel tsa'ilan xchamel jech chac c'u cha'al li boch'o tsa'ilan sc'ulejale

²² ti ja' toj xcuxet yo'nton, toj jun yo'nton cha'ay c'alal me ibat ta ch'ene?

²³ ¿C'u yu'un ti li' to ch-aq'ue cuxuluc li boch'o mu xa sna' bu chbate, ti macbil xa sbe ta jujujot yu'un li Diose?

²⁴ “Ja' xa jve'elinoj o li puru jic' o'ntone, li ayetel ta scoj xc'uxul jvocole mu xpaj o jech chac c'u cha'al chloc' vo' ti xcholchun no'oxe.

²⁵ Yu'un li' xa oy ta jtojol li c'usi toj xi'bal ono'ox sba chca'ye; ivul xa ta jtojol li c'usi xi'emun ono'ox yu'une.

²⁶ Mu'yuc bu ta jcux co'nton o, mu'yuc yutsil jujun c'ac'al chca'ay; mu'yuc bu jun co'nton, puru slo'il no'ox co'nton oy —xi li Jobe.