Job 29 - Bible in Tzotzil de Chenalhó with Deuterocanon

Li Jobe it'ab ta yo'nton ti c'u to'ox x'elan ta ba'yuque

¹ Li Jobe la sts'ac batel yan velta li ya'yeje jech laj yal:

² —Oyuc c'uxi jta yan velta ti c'u to'ox xi'elan ta sliquebe, ti chabibilun to'ox yu'un li Diose,

³ ti xojoban to'ox luz ta jtojol yu'une, ti ivu' to'ox cu'un lixanov ta ic'al osile, toj lec.

⁴ C'alal queremun to'oxe, chabibilun to'ox yu'un Dios te ta jna.

⁵ Li' to'ox oy ta jts'el li Boch'o ech'em svu'ele; li' to'ox lamal ta jts'el li calab jnich'nabe.

⁶ Ta puru ya'lel xchu' vacax to'ox ta jpoc o cacan; ta ch'ut ch'en no'ox chloc' tal li aceite cu'une.

⁷ C'alal chiloc' to'ox ta ti'lume, c'alal chc'ot choticun bu stsobobbail li cristianoetique,

⁸ li queremetique tsq'uej sbaic; li moletique chlic sva'an sbaic, yu'un chiyich'icun ta muc'.

⁹ Li banquilaletique chpajic ta lo'il, tspas sc'ob ta yeic ti ac'o ch'anxiicuque.

¹⁰ Li jpasmantaletique chc'unibic ta lo'il; pac'al chcom ta spac'oic ya'yel li yoq'uique.

¹¹ Li boch'otic laj yilicune laj yalic ti toj xcuxet co'ntone; li boch'otic laj ya'yic jc'oplale toj lec jc'oplal yu'unic.

¹² Yu'un vu'un la jcoltaan li me'onetic ti c'alal xvocoletique; vu'un la jcoltaan li me'on ololetic ti mu'yuc boch'o xcoltaatic yu'une.

¹³ Li boch'o ta xa'ox xchamique la stojbicun ta vocol; li me'on antsetique vu'un laj cac'be xcuxetel yo'ntonic.

¹⁴ Li jlequile ja' jlapoj, ja' jc'u'inoj o jujun c'ac'al; li jtuq'uile ja' jnatil c'u', ja' xpix jol c'otem.

¹⁵ Vu'un satun ic'ot li ma'sate; vu'un yacanun ic'ot li coxoe.

¹⁶ Vu'un stotun ic'ot li boch'o toj abul sbaique; vu'un jpojvanejun yu'un li boch'o mu xcotquine.

¹⁷ Vu'un la jc'asbe sts'uts'upic li boch'otic chopolique; vu'un la jpojbeic li c'usi stsacojic xa'oxe.

¹⁸ La jnop ti ep c'ac'al chicuxi jech chac c'u cha'al epal yi' ta ti'nabe, xchi'uc ti jun co'nton chicham te ta jna jtuque,

¹⁹ ti ja' jechun jech chac c'u cha'al jpets te' ts'unbil ta bevo', ti lec ch-ach' ta sjob ac'ubal li sc'obc'obe.

²⁰ La jnop ti scotol ora lec ich'bilun o ta muq'ue, ti lec xu' cu'un o scotol c'ac'ale.

²¹ “Lec to'ox tuc'ulanbilun jc'op; c'alal chcal bijubtasele, ch'anxi scotolic.

²² Mu'yuc boch'o la stac'bun sutel li jc'ope; toj lec teq'uel ic'ot ta yo'ntonic.

²³ Smala-malaic xa xilo'ilaj jech chac c'u cha'al jmala-malatic xtal vo' ta yorail q'uepelal.

²⁴ C'alal laj yilic ti oy slequil co'nton ta stojolique, vocol la xch'unic; c'alal laj yilique, ja' spatubil yo'nton laj ya'yic.

²⁵ Vu'un laj calbeic c'usi lec tspasic; licom jech chac c'u cha'al banquilal yu'unic, xchi'uc jech chac c'u cha'al jun ajvalil ti te va'al ta stojol yajsoldadotaque. C'alal chat yo'ntonique, vu'un la jpatbe yo'ntonic.