Job 28 - Bible in Tzotzil de Chenalhó with Deuterocanon

Li bijubtasele ja' toj ven lec ta scotol

¹ Li Jobe jech laj yal noxtoc: —Li saquil taq'uine oy yavil bu ta loq'uesel; li c'anal taq'uine oy yav bu ta lecubtasel.

² Li tsatsal taq'uine chich' loq'uesel ta banamil; c'alal chich' unijesel li tone, te chloc' li cobre taq'uine.

³ Li cristianoetique la sjamic ochel li ic' osil ta yut banamile; chyalic batel ta sa'el ta yutil to banamil li tonetique.

⁴ Nitbil, chechbil chyalic; ta sjoq'uic batel yut banamil ti bu mu'yuc xa boch'o te chjelove, ti nom xa oye, ti mu xa xc'ot cristiano tee.

⁵ Ta sba yac'ole, ja' te chloc' ve'lil, pero ta yute xco'laj xchi'uc c'aq'uem yilel.

⁶ Ja' te oy yavil li zafiro tonetique; ja' te capal ta banamil li c'anal taq'uine.

⁷ Li xiquetic, li xulemetique, ac'o me lec xc'ot satic ta nom, pero mu xilic ec.

⁸ Mu'yuc tec'bil yu'un li jti'val chon bolometique; mu'yuc jelovenic te li leonetique.

⁹ Pero li cristianoe laj yac' sc'obic ta tsatsal tonetic; la sjoc'beic yibel li vitsetique.

¹⁰ La svombeic ochel sbebe uc'umetic ta ch'entic; la sloq'uesic tal li c'usitic te nac'ajtic ti toj c'upilic sbae.

¹¹ La sa'ic yo' bu chloc' uc'umetic; la sloq'uesic tal ta ba banamil li c'usi nac'ajtique.

¹² “Pero li jbijiltique ¿bu ta tael? ¿Bu oy yavil li sjamubil jba jsatique?

¹³ Li cristianoe mu sna' c'u yepal stojol, yu'un mu jtatic li' ta banamil.

¹⁴ Li muc'ta nabe jech chal: ‘Mu'yuc li' oye’, xi; li yan nabe jech chal: ‘Mu'yuc li' quich'oj ec’, xi.

¹⁵ Mu stac' manel ta c'anal taq'uin; mu stac' manel ta saquil taq'uin.

¹⁶ Me ja'uc ta lequil c'anal taq'uin ta Ofir, mu stac' manel o, me ja'uc ta ónice ton, o me ta zafiro ton.

¹⁷ Mu xco'laj yutsil xchi'uc c'anal taq'uin, xchi'uc ton ti lec sts'ayayete; mu stac' jelel o xchi'uc c'usi pasbil ta bats'i c'anal taq'uin.

¹⁸ Li bijilile ja' xjelov slequil jech chac c'u cha'al lequil ton ti coral sbie, ja' xjelov stojol jech chac c'u cha'al lequil tonetic ti toyolic stojole.

¹⁹ Mu xco'laj xchi'uc li topacio ton te ta Etiopiae; mu xco'laj yutsil ta c'upinel xchi'uc li bats'i lequil c'anal taq'uine.

²⁰ ¿Bu chlic tal li jbijiltique? ¿Bu oy yavil li sjamubil jba jsatique?

²¹ Macal ta sba ta sat scotol li c'usitic cuxajtique; mu xotquinic scotol li mutetic ta vinajele.

²² Li lajel xchi'uc yavil lajebale jech chalic: ‘Ja' no'ox ca'yojbecutic sc'oplal ec ti oye’, xiic.

²³ “Pero li Diose sna'be bu sbelal li bijubtasele; sna' bu oy yavil.

²⁴ Yu'un li stuque yiloj c'alal to ta slajeb banamil; yiloj scotol c'usi oy ta yolon vinajel.

²⁵ C'alal la sbis c'u yalal laj yac' li iq'ue xchi'uc c'u yepal laj yac' li vo'e,

²⁶ c'alal laj yalbe mantal c'u x'elan chac' li vo'e xchi'uc c'alal laj yac'be sbein sacsevul li chauquetique,

²⁷ yotquinoj xa ono'ox li bijilile; yiloj ti lec xtune, la xchapan lec, laj yal ti lec oye.

²⁸ Jech laj yalbe li cristianoetique: ‘A'yo ava'yic, me chavich'icun lec ta muq'ue, ja' abijilic chc'ot; me chacomtsanic li c'usi chopole ja' sjamubil aba asatic chc'ot’, xi.