Job 27 - Bible in Tzotzil de Chenalhó with Deuterocanon

Job laj yal ti ta ono'ox stoj smulic li boch'otic chopolique

¹ Li Jobe jech laj yal noxtoc:

² —Ta xcal ta jamal ta stojol Dios ti ech'em svu'ele, ja' li Boch'o muc xac' cal ta jamal ti mu'yuc jmule, ti laj yac'bun ep svocol co'ntone.

³ Ta xcal ta jamal ti jayib xa c'ac'al licuxi tale, ti c'u xa yepal c'ac'al laj yac'bun quich' ic' li Diose.

⁴ Mu'yuc bu chloc' ta que epalc'op; mu'yuc bu chilo'lavan jchi'uc li coq'ue.

⁵ Mu'yuc bu xcal ti yu'un lec xana'beic smelol ti jech chatic'bicun jmule; mu'yuc ta jcomtsan o c'u x'elan co'nton c'alal to chicham.

⁶ Mu'yuc ta jquechan o yalel ti tuc' co'ntone yu'un jech tuc' co'nton o ti jayib c'ac'al cuxulune, mu xu' chiyalbun co'nton ti mu jechuque.

⁷ “Li cajcontrae xchi'uc li boch'otic chopol yo'ntonic ta jtojole, ac'o comicuc jech chac c'u cha'al li boch'otic chopolique.

⁸ Li boch'otic chopolique ¿c'usi tspat yo'ntonic c'alal chtuch'bat yorailic yu'un li Diose?

⁹ ¿Me ch-a'ibat yoq'uel yavanelic ti c'alal chtal tsots svocolique?

¹⁰ ¿Me xu' tsta xcuxetel yo'nton ta stojol li Boch'o ech'em svu'ele? ¿Me xu' to xvocolet ta stojol Dios jliqueluc?

¹¹ Ta xcal ava'yic c'u x'elan smuc'ul stsatsal li Diose; mu'yuc ta jmucboxuc c'usi snopoj li Boch'o ech'em svu'ele.

¹² Li vo'oxuque avilojic xa, pero ¿c'u yu'un ti solel mu'yuc stu c'usi chavalique?

¹³ “Li j'uts'intavanejetic ti toj chopolique, ja' jech li smotonic chich'ic yu'un Diose:

¹⁴ Ac'o me ep yol xnich'onic, pero ja' no'ox sventa espada, ja' no'ox sventa chchamic ta vi'nal.

¹⁵ Li boch'otic cuxul to chcomique ta xmilatic yu'un lajel; mu'yuc bu ta x'oc'taatic yu'un li antsetic chcom yu'unique.

¹⁶ Ac'o me toj ep saquil taq'uin yu'unic jech chac c'u cha'al pucuc, ac'o me busul no'ox sc'u' spoq'uic jech chac c'u cha'al yi'tic,

¹⁷ ac'o me lec chapal sc'u' spoq'uic, pero ja' tstunes li boch'o tuc' yo'ntone. Li saquil taq'uine ja' yu'un chc'ot li boch'o mu'yuc smule.

¹⁸ Li snae ja' jech chac c'u cha'al na om; ja' jech chac c'u cha'al xlechupat boch'o chchabi xchob.

¹⁹ C'alal chvaye, jc'ulej to'ox, pero c'alal chlique, ja' to chil mu'yuc xa c'usi oy yu'un o.

²⁰ Ta xmucat ta xi'el jech chac c'u cha'al c'usi chmuc ta vo'; ta xcuchat batel ta sutub ic' ta ac'ubaltic.

²¹ Ta xcuchat batel yu'un li tsatsal ic' chtal ta sloq'ueb c'ac'ale; ta tsatsal ic'al vo' chloc' batel ti bu nacale.

²² Ch-ac'bat xcuch scotol yu'un Dios, mu'yuc xa ts'icumal; mu xu' tscolta sba o loq'uel ta sc'ob.

²³ Tspac' sc'obic ta stojol; xpilajet no'ox xchi'uquic ti bu to'ox nacale —xi li Jobe.