Job 26 - Bible in Tzotzil de Chenalhó with Deuterocanon

Li Jobe laj yal ti toj ech'em smuc'ul li Diose

¹ Itac'ov li Jobe jech laj yal:

² —¡Ja' no'ox ta'looxuc o! ¡Toj lec chacoltaic li boch'o mu'yuc stsatsale! ¡Toj lec c'uxubinel chavac'beic li boch'o ch-alub xae!

³ ¡Toj lec xana'ic scoltael, lec xana'ic sbijubtasel li boch'o mu'yuc sbijil chavilique!

⁴ ¿Boch'o scoltael li c'usi laj avale? ¿Boch'o ic'opoj ta avo'nton ti jech laj avale?

⁵ “Li animaetique chniquic ta xi'el te ta yolon nabetic ta yutil nabetic.

⁶ Li yavil animaetique jamal ta stojol li Diose; li yavil lajebale mu'yuc macal ta sat.

⁷ Li Diose ja' la xlich'an batel vinajel ti bu xocole; ja' la st'uyan ta jech no'ox li banamile.

⁸ Ja' te la xchupan ta toquetic li vo'e; li toquetique mu xli' ta yalal li vo'e.

⁹ Ja' tsmacbe o sat li ue; ja' te tslaman batel li toquetic yu'une.

¹⁰ Ta jot to sti' muc'ta nab laj yac'be spajeb ta joyob yilel li banamile; laj yac'be sts'aquil yilel li sac osil xchi'uc ic' osile.

¹¹ Li muc'tic vits ti ja' yoyal vinajel c'otem yilele chniquic; ta xi'ic ti c'alal tsots chc'opanatic yu'un li Diose.

¹² Ta svu'el tspas ta mantal li nabe; ta sbijil la stsal li smuc'ta chanul nabe.,

¹³ Ta yic'al ye la sq'uepes li osile; ta sc'ob la smil li quiletel chone.

¹⁴ Scotol le'e sti'ti' no'ox yabtel chca'ibetic; mu'yuc ep li yabtel laj ca'itique. ¿Boch'o xu' yu'un cha'ibe smelol scotol li smuc'ul stsatsale? —xi li Jobe.