Job 23 - Bible in Tzotzil de Chenalhó with Deuterocanon

Li Jobe laj yal ti ja' tspas stuc c'usi tsc'an li Diose

¹ Itac'ov li Jobe jech laj yal:

² —Li vu'une tsots chic'opoj ta sventa xc'uxul li jvocole, yu'un li Diose laj yac'bun scotol li yalal sc'ob ta jbae, ac'o me ep chi'oc' chi'avan.

³ Oyuc boch'o xiyalbun bu ta tael li Diose, xu' chbat jc'opan ti bu to nacale.

⁴ Te ta xc'ot calbe scotol jvocol ti jechuque, yu'un li' nojem ta que scotol li c'usi ta jc'an ta xcalbee.

⁵ Chac jna' ca'ay c'u x'elan chistac'bun li stuque; lec ta xca'ibe c'usi chiyalbun ti jechuque.

⁶ Li stuque mu van xisjipun ta stsatsal; ta van xistuc'ulanbun li jc'ope.

⁷ Cha'ibe van smelol c'alal chcalbe ti mu'yuc jmule, jech xu' chal ta jamal ti mu'yuc jmul ti jechuque.

⁸ Me ta jsa' ta jujujot ta sloq'ueb c'ac'ale, mu jta o; me ta jsa' ta smaleb c'ac'ale, mu xquil bu oy.

⁹ Me chac' ta ilel stsatsal ta stuq'uil nortee, mu xquil me te oy noxtoc; me chjelov batel ta stuq'uil sure, mu xquil noxtoc.

¹⁰ Li stuque ja' xotquin scotol ti c'u xi'elane; me chispasbun porovale, lec ta xiloc' jech chac c'u cha'al c'anal taq'uin.

¹¹ Yu'un ja' la jts'aclin o batel; mu'yuc bu la jcomtsan o li be yu'une.

¹² Mu'yuc la jbajbe li smantaltaque; ja' toj tsots sc'oplal laj ca'ibe li sc'ope; ja' xcom laj ca'ay li jve'ele.

¹³ Pero me oy c'usi la snop tspase, mu'yuc boch'o xu' tsmac ta be, me jech la sc'ane tspas o.

¹⁴ Ja' yu'un tspas o li c'usi snopoj ta jtojole; oy to ep yantic c'usi snopoj tspas ta jtojol.

¹⁵ Ja' yu'un li vu'une chixi' yu'un; c'alal ta jnope, chinic ta xi'el yu'un.

¹⁶ Yu'un la slajesbun stsatsal co'nton; laj yac'bun xi'el ta co'nton li Boch'o ech'em svu'ele.

¹⁷ Pero mu teuc ch'anxi chicom o ta scoj li ic' osil ital ta jtojole; mu teuc macal chcom que o ta scoj li ac'ubale.