Job 22 - Bible in Tzotzil de Chenalhó with Deuterocanon

Elifaz laj yal ti ja' ta scoj smul chich' vocol li Jobe

¹ Li Elifaz liquem ta Temane jech laj yal:

² —¿Me xu' chcoltaat yu'un jun vinic li Diose? Mu xu'; ac'o me toj bij li vinique, ja' no'ox xu' tscolta sba stuc.

³ ¿Me mu'yuc amule, c'usi tsta o ta aventa li Boch'o ech'em svu'ele? ¿C'usi stu yu'un me toj lec scotol c'usi chapase?

⁴ ¿Me yu'un ja' ta scoj toj tuc'ot ti jech chayac'bot avocol, ti jech chaxchapanot li Diose?

⁵ Ja' ta sventa toj ep amul, yu'un mu'yuc spajebal o li c'usi chopol apasoje.

⁶ Yu'un mu'yuc smelol c'u x'elan laj ac'anbe prentail li achi'iltaque; laj apojbe sc'u', jech mu'yuc sc'u' icom avu'un.

⁷ Muc xavac'be yoxo' yuch' li boch'o taquin yo'ntone; muc xamac'lin li boch'o chvi'naje.

⁸ Yu'un lec xu' avu'un, lec ich'bilot ta muc', jech laj avu'unin ep banamil.

⁹ Jeche' xmeymun sc'ob isut avu'un li me'on antsetique; toj ep laj avuts'inta li me'on ololetique.

¹⁰ Ja' yu'un chucbilot xa ta jujujot; toj ep xa xi'el chava'ay.

¹¹ Ic' osil chavil o, mu xa xu' chaq'uel jutuc osil; chamuc xa o batel ta vo' ya'yel.

¹² “Li Diose ta bats'i yutil vinajel oy; li c'analetic ti toyol oyique ja' olon xcom yu'un.

¹³ Ja' yu'un jech chaval: ‘¿C'usi sna' li Diose? ¿Me yu'un xu' chchapan ti c'alal te nacal ta spat ic'al toque?

¹⁴ Li Diose mu xil, yu'un chmacat ta pimil toc, yu'un te no'ox ta xanov ta yutil vinajel’, xachi.

¹⁵ ¿Me yu'un ja' chac'an chatambe batel li poco' be, ti stamojic batel li boch'otic chopolique?

¹⁶ Le'e tuch'bil no'ox yorail ichamic; ta anil no'ox cuchbil ibatic ta nojelal uc'um ya'yel.

¹⁷ Yu'un jech laj yalbeic li Diose: ‘Mu xatal li' ta jtojolcutic. Ac'o me toj ech'em avu'el, ¿c'usi xu' chapasbuncutic?’, xutic.

¹⁸ Ac'o me jech chalic, pero ja' i'ac'batic scotol li c'usitic oy yu'unique. ¡Li vu'une mu jechuc co'nton jech chac c'u cha'al le'e!

¹⁹ Li boch'o tuc' yo'ntonique xcuxet no'ox yo'ntonic ti c'alal chilique; li boch'otic mu'yuc smulique stse'inic no'ox, jech chalic:

²⁰ ‘I'ulesatic xa li cajcontratique; ic'ac' ta c'oc' scotol li sc'ulejalique’, xiic.

²¹ “Ja' lec sutan tal ta stojol Dios yan velta, jech chata jun avo'nton; jech chata yan velta li alequilale.

²² Ich'o ta muc' li chanubtasel chayalbote; ac'o ta avo'nton li smantaltaque.

²³ Me chasut tal ta stojol li Boch'o ech'em svu'ele, chlic toyan yan velta. Me chaloq'ues li c'usi chopol te ta anae,

²⁴ me ja' jech chlic avil chac c'u cha'al lum li c'anal taq'uin avu'une, xchi'uc me ja' jech chavil chac c'u cha'al tontic ta bevo' li c'anal taq'uin avu'un ti liquem tal ta Ofire,

²⁵ ja' mero epal c'anal taq'uin chc'ot avu'un li Boch'o ech'em svu'ele, xchi'uc ja' epal saquil taq'uin chc'ot avu'un.

²⁶ Ja' mero xcuxetel avo'nton chc'ot, jech jun avo'nton xu' chatoy asat ta stojol.

²⁷ Xu' chac'opan; chaya'ibot ac'op, jech xu' chlic apas li c'usi avaloj ta jamal ta stojole.

²⁸ Jech lec chbat avu'un scotol li c'usi chapase; xojoban no'ox abe chaxanov.

²⁹ Yu'un li Diose tsbic'tajes li jtoybaetique; ja' tscolta li boch'o biq'uit chac' sbaique.

³⁰ Ja' tscolta li boch'o mu'yuc smulique, jech chascoltaot ec me mu'yuc c'usi chopol apasoje —xi li Elifaze.