Job 21 - Bible in Tzotzil de Chenalhó with Deuterocanon

Job laj yal ti ja' lec c'usi tstaic li boch'otic chopolique

¹ Li Jobe jech la stac':

² —A'yo lec ava'yic li c'usi ta xcale; ac'o ja'uc spatubil co'nton avu'unic ti chava'ibicun jc'ope.

³ Ts'icbicun jutuc, ta xic'opoj; c'alal me lic'opoj xa'oxe, xu' chlic ana'leicun me jech chac'anique.

⁴ Li c'op ta jpase ma'uc ta jpas xchi'uc jun vinic, ja' yu'un mu xa sts'ic cu'un.

⁵ Q'uelicun lec avilic, chlic xi'anic cu'un; macal chcom aveic o ta xi'el.

⁶ C'alal ta jnopilan ec li vu'une, ta xixi'; ta xnic ta xi'el li jbec'tale.

⁷ ¿C'u yu'un ti cuxulic to li boch'otic chopolique, ti yochel ta epajel sc'ulejalic c'alal chmalubic batele?

⁸ Ta to xilic ti lec c'usi tstaic li xnich'nabique; ta to xilic ti te setel ta sts'elic li smomnich'nabique.

⁹ Mu'yuc xi'el cha'yic te ta snaic; mu'yuc bu ch-ac'batic svocolic yu'un li Diose.

¹⁰ Li stot xvacaxique lec xnich'najic; li sme' xvacaxique lec xch'i x'alajic.

¹¹ Li bic'tal ololetic yu'unique stsobetic no'ox jech chac c'u cha'al bic'tal chijetic; li queremetique xbitlajetic no'ox chanovic.

¹² C'alal cha'yic xpujpun no'ox vob xchi'uc arpae, xq'uejinic no'ox; xcuxet no'ox yo'ntonic ti c'alal cha'yic chbac' amae.

¹³ Ep c'usi oy yu'unic o c'alal chchamic; jun yo'ntonic o c'alal chbatic ta yavil animaetic.

¹⁴ Jech chalbeic li Diose: ‘Loc'an ta jtojolcutic; mu jc'an xcotquincutic li mantaletic avu'une.

¹⁵ ¿Boch'oot ti ech'em avu'el ti chac'an chituncutic avu'une? ¿C'usi ta jtacutic ti c'alal chajc'opanotcutique?’, xutic.

¹⁶ Pero ma'uc yu'un stuquic li slequilalique; li c'usi tsnopique mu jechuc ta jnop li vu'une.

¹⁷ “¿Sjayibal xa velta itu'p slamparaic li boch'otic chopolique? ¿C'usi ora oy ital vocol ta stojolic? ¿Sjayibal xa velta abul sbaic ta scoj ti i'ilin Dios ta stojolique?

¹⁸ ¿Sjayibal velta ti cuchbilic no'ox ta ic' jech chac c'u cha'al jobele, ti mu'yuc stu ch-a'yatic jech chac c'u cha'al c'usi chcuch batel sutub iq'ue?

¹⁹ Li vo'oxuque chavalic ti ja' tstojbe smul stot sme'ic li alab nich'nabetique, pero tsc'an ja' tstoj smul stuc li boch'o chopolique, yu'un jech ac'o yotquin.

²⁰ Ac'o ya'ay lec ta sbec'tal li svocole; ac'o yuch'be lec ya'ay sc'ac'al yo'nton li Boch'o ech'em svu'ele.

²¹ C'alal me icham xae, mu'yuc xa ta yo'nton c'usi chc'ot ta pasel ta stojol li boch'otic oy yu'une.

²² ¿Me oy boch'o xu' chchanubtas yu'un ac'o bijubuc li Dios ti ja' chchapan li boch'otic oyic ta vinajele?

^23-24 “Oy boch'o lec tsotsic, xcuxet no'ox yo'ntonic, jun no'ox yo'ntonic; oy ep c'usi oy yu'unic, mu'yuc ochem xchamelic o c'alal ta xchamic.

²⁵ Pero oy boch'o ti ta vocol no'ox cuxulique, ti mu'yuc bu tstaic o jutuc xcuxetel yo'ntonic c'alal chchamique.

²⁶ Pero co'ol ono'ox chyalic batel ta ch'en; co'ol chlajic ta xuvit scotolic.

²⁷ Li vu'une jna'oj li c'usi chanopique, jna'oj li c'usi chachapanic ta jventae.

²⁸ Jech chavalic: ‘¿Bu ibat sna li banquilale? ¿Bu oy scotol c'usi oy ta sna li chopol vinique?’, xachiic.

²⁹ ¿Me mu'yuc xajac'beic li boch'otic ep xanovenique? ¿Me mu'yuc xayalboxuc

³⁰ ti c'alal tstac tal tsots vocol li Diose, mu'yuc c'usi chc'ot ta pasel ta stojol li boch'otic chopolique?

³¹ Mu'yuc ch-albat ta satic ti c'u x'elan stalelique; mu'yuc ch-ac'bat stojic ti c'u x'elan la spasique.

^32-33 C'alal chbat xa ta muquele, epal cristiano chbat xchi'in; ep boch'otic ba'yucbe chbatic, ep boch'o ta ts'acalpat chbatic. Te ta xchabibat li smuquinale; lec c'un cha'ay li banamil ti chich' but'el oe.

³⁴ Chapatbicun co'nton avalojic, pero mu'yuc stu, yu'un puru epalc'op scotol li c'usi laj avalique —xi li Jobe.