Job 20 - Bible in Tzotzil de Chenalhó with Deuterocanon

Li Zofare laj yal c'usi tstaic li boch'otic chopolique

¹ Li Zofar liquem ta Naamate jech la stac':

² —Toj ep c'usi chtal ta jol avu'un chca'ay, ja' yu'un ta jtac'bot ta ora li ac'ope.

³ Laj xa ca'ay ti ep laj avutilanune, ja' yu'un oy ta co'nton ta jtac'bot sutel ta sventa jbijil.

⁴ ¿Me mu xana' ti jech ono'ox stalel ti jech ono'ox oy o ta sliqueb c'alal ipasat cristiano ta banamile?

⁵ ¿Me mu xana' ti mu jaluc xcuxet yo'ntonic li boch'otic chopolique, xchi'uc ti jliquel no'ox lec stse'inic li boch'otic mu'yuc ta yo'ntonic Diose?

⁶ Ac'o me chtoy batel c'alal to ta vinajel, ac'o me tsta c'alal to ta toquetic li sjole,

⁷ pero j'ech'el chlaj sc'oplal o jech chac c'u cha'al stso'; li boch'otic xotquinic ono'oxe jech chalic: ‘¿Bu ibat?’, xiic.

⁸ Ta sacch'ay batel jech chac c'u cha'al vaychil; ta xch'ay o ta alel jech chac c'u cha'al jvayechtic ta ac'ubaltic.

⁹ Li boch'otic laj to'ox yotquinic leque mu'yuc xa bu chilic o.

¹⁰ Li xnich'nabe ja' chlic c'uxubajuc ta yo'ntonic li me'onetique; ja' chlic sutesbeic c'usitic yelc'anoj li stotique.

¹¹ Ac'o me lec to squeremal, pero co'ol chbat ta ch'en xchi'uc.

¹² Ac'o me toj chi' laj ya'ay li c'usi chopole, ac'o me te snac'oj o ta yolon yoc' ya'yel,

¹³ ac'o me mu sc'an sloq'ues o ta sventa ti toj lec cha'ye, ac'o me bal to xa'ay te cha'yilanbe xchi'il ta spac'o,

¹⁴ pero te ta xlic socuc ta xch'ut; ta xlic c'atajuc ta svenenoal ye jti'val chon.

¹⁵ Ta xeta loq'uel ya'yel li sc'ulejal sbic'oje, yu'un ta sloq'uesbat ta xch'ut yu'un li Diose.

¹⁶ Yu'un xco'laj xchi'uc svenenoal ye chon ti tsbuts'ilane, jech ta xmilat o jech chac c'u cha'al chmilvan jti'val chon.

¹⁷ Mu'yuc xa bu tsc'upin o ya'ay li pom, li ya'lel xchu' vacax ti xcholchun no'ox chloc' jech chac c'u cha'al uc'ume.

¹⁸ Yu'un persa tsutes scotol ti c'u yepal yelc'anoje; mu'yuc bu tsbalin o, mu'yuc bu tse'ej lo'il xa xchi'uc li sc'ulejale.

¹⁹ Yu'un laj yuts'inta, laj yac'be svocol li me'onetique; la spojan naetic, ac'o me muc ja'uc spasben.

²⁰ Jech mu'yuc bu tsta jun yo'nton o; mu xcol o loq'uel ta sventa li xpich'etel yo'ntone.

²¹ Mu'yuc xa c'usi chcom ta ve'el yu'un noxtoc, mu xjalij li c'usi oy yu'une.

²² Ac'o me toj ep c'usitic oy yu'un, pero ch-ac'bat slo'il yo'nton yu'un noxtoc; scotol li yalal svocole chnet'at o yu'un.

²³ Ac'o me ta snojes lec xch'ut, li Diose ta xac' batel sc'ac'al yo'nton ta stojol; ta smalbe batel ta sba li sc'ac'al yo'ntone.

²⁴ Ac'o me chjatov batel yu'un li abtejebal pasbil ta taq'uine, pero ta xtaat ta st'ilesubil flecha ti pasbil ta bronce taq'uine.

²⁵ Li flechae ta xjelov ta jot, li sni' ti lec sts'ayayete ta xjelov ta secub. Puru xi'el ta xtal o ta stojol.

²⁶ Li sc'ulejale chch'ay o ta ic' osil scotol; ta xchic'at yu'un li c'oc' ti te tsanal oe; ta xlaj scotol li c'usitic oy yu'un ta snae.

²⁷ Ta xlic jambatuc smul yu'un li vinajele; ta xlic contrainatuc yu'un li banamile.

²⁸ C'alal ch-ilin Dios ta stojole, ta xtanij batel scotol li c'usi oy yu'une; ta xpuc batel ta buyuc no'ox.

²⁹ Ja' jech spuculal chapanbil yu'un Dios li boch'otic chopolique; ja' jech smoton ch-ac'batic yu'un li Diose —xi li Zofare.