Job 2 - Bible in Tzotzil de Chenalhó with Deuterocanon

¹ Ta yan c'ac'al ibat sva'an sbaic ta stojol Muc'ul Dios yan velta li yajtuneltac Diose. Te nabal ibat noxtoc li banquilal pucuje.

² Li Muc'ul Diose jech laj yalbe li banquilal pucuje: —¿Bu la'ay tal? —xut. Itac'ov li banquilal pucuje: —Ay joyibta tal, ay jxan tal scotol li banamile —xi.

³ Li Muc'ul Diose jech laj yalbe li banquilal pucuje: —¿Me laj avilbun li cajtunel Job ti mu'yuc boch'o yan jech te ta banamil lec tuc' yo'nton, lec c'usitic tspas, lec yich'ojun ta muc', xchi'uc ti svoc'oj sba o ta sventa c'usi chopole? Ac'o me chac'an ox chajip ta lum ta jech no'ox, pero staoj yav jun yo'nton o; mu'yuc bu la sa' smul ta jtojol —xut.

⁴ Itac'ov li banquilal pucuje: —Xu' chac' c'usitic yan ta sventa chc'uxubin sbec'tal stuc. Yu'un li cristianoe xu' chac' scotol c'usi oy yu'un, ja' no'ox venta me cuxul chcom stuque.

⁵ Pero picbo avil li sbaquil xchi'uc li sbec'tal stuque; te chavil me mu xlic chopolc'opojuc ta atojol —xut.

⁶ Itac'ov li Muc'ul Diose: —Lec oy, oy ta ac'ob li sbec'tale, pero mu xamil —xut.

⁷ Li banquilal pucuje iloc' batel ta stojol li Muc'ul Diose, bat yac'be svocol li Jobe. Laj yac' tsacatuc ta jun chopol ch'inin. Ilic ta yacan, iloc' c'alal ta sjol.

⁸ Li Jobe ibat xchotan sba ta tantic; la stsac svoc'olil bin, la xjux sba o.

⁹ Jech i'albat yu'un li yajnile: —¿Me yoquel to staoj yav jun avo'nton o? Tuch'o ta utel li Diose, chaman xa —xut.

¹⁰ Itac'ov li Jobe: —Li vo'ote chac'opoj jech chac c'u cha'al jun bol ants. ¿C'usi lec ta jpastic? Me lec laj ca'itic c'alal laj yac'butic c'usi lec li Diose, ¿c'u yu'un mu lecuc chca'itic noxtoc c'alal chijyac'butic c'usi chopole? —xut. Li Jobe mu'yuc bu la sa' smul ta stojol Dios ta sventa li c'usi iloc' ta yee, ac'o me toj ep li svocole.

Li Jobe i'ay vu'lanatuc yu'un boch'otic lec sc'opan sba xchi'uc

¹¹ Li Jobe oy oxib viniquetic lec sc'opan sba xchi'uc. Ja' Elifaz liquem ta Temán, Bildad liquem ta Súa, xchi'uc Zofar liquem ta Naamat. C'alal laj ya'yic ti toj ep svocol li Jobe, iloq'uic tal yo' bu nacalic jujunic, yu'un la xchapanic ti jmoj chtal spatbeic yo'ntone, xchi'uc chtal xchi'inic ta ich' vocol.

¹² C'alal nom to xtalique, la sq'uelic batel li Jobe, pero muc xa xotquinic, jech tsots lic oq'uicuc. La sli' sc'u'ic jujunic; la sjipic muyel pucuc ta sjolic.

¹³ Te vul xchi'inic ta chotlej ta banamil li Jobe; vucub c'ac'al, vucub ac'ubal te xchi'inojic. Me junuc mu'yuc boch'o ic'opoj yu'unic, yu'un toj xi'bal sba laj yilbeic li svocole.