Job 19 - Bible in Tzotzil de Chenalhó with Deuterocanon

Li Jobe la xch'un ti ja' tspas scotol stuc li Diose

¹ Li Jobe jech la stac':

² —¿Baq'uin to chlaj avo'ntonic ta yaq'uel li jvocole ti chatuch'bicun co'nton ta sventa li ac'opique?

³ Yu'un scotol c'ac'al puru chopol c'op chavalbicun; ¿me mu xaq'uexovic ti jech chapasbicune?

⁴ Ta melel ac'o me oy jmul, pero vu'un ta jcuch jtuc.

⁵ Chacuyic ti vo'oxuc toj lecoxuque, ja' yu'un chavalbicun ta jsat c'u yu'un ti jech oy jvocole.

⁶ Na'ic me ti ja' Dios la syalesun ta lume, ti ja' la xchucun ta xch'ojone.

⁷ Ta xi'avan: ‘Toj ep chquich' uts'intael’ xichi, pero mu'yuc boch'o chistac'bun; ta jc'an coltael, pero mu'yuc chapanel o.

⁸ La smacbun o li jbee, mu xa bu xijelov o. Ic' osil icom yu'un li jbee.

⁹ La spojbun o li jc'ulejale; la sloq'uesbun li scoronail jole.

¹⁰ Solel laj yulesbun o scotol, chich'ay xa o batel; la sbulbun o loq'uel c'alal ta yibel li c'usi jpatoj co'nton yu'une.

¹¹ Laj yac'bun o jcuch li sc'ac'al yo'ntone; la scuyun jech chac c'u cha'al yajcontra.

¹² Scotol yajsoldadotac li' busul ivulic ta jtojol; li' ivul set sbaic ta spat xocon jna.

¹³ “La snamajesbun batel ta jtojol li cuts' calaltaque; la scuyicun comel ta yan cristiano li boch'otic lec jc'opane.

¹⁴ La scomtsanicun, la xch'ayicun ta yo'ntonic li cuts' calaltaque xchi'uc li boch'otic lec jc'opan jba jchi'uque.

¹⁵ Li boch'otic te to'ox nacalic ta jnae xchi'uc li jquiarataque laj xa scuyicun ta yan cristiano; yan lum vinicun xa ta yo'ntonic.

¹⁶ Ac'o me chquic' to li jmozoe, mu xistac'bun; ac'o me xivocolet ta stojol.

¹⁷ Li cajnile mu xa sc'an xisnopun; li boch'otic jun jme' jchi'uque chopol xa chiyilicun.

¹⁸ C'alal xa ta ololetic chisbajicun. C'alal chitotse, chchopolc'opojic ta jtojol.

¹⁹ Li boch'otic toj lec xcotquin jba jchi'uque chisna'leicun xa; li boch'otic lec to'ox jc'anoj jba jchi'uque chiscontrainicun xa.

²⁰ Li jnuculil xchi'uc li jbec'tale laj xa spac' sba ta jbaquiltac; smelol sjam xa ti li' cuxulune.

²¹ C'uxubinicun jutuc ec, vo'oxuc ti lec jc'opan jbatique c'uxubinicun jutuc, yu'un li Diose laj yac'bun tal yalal sc'ob ta jtojol.

²² ¿C'u yu'un ti chavac'bicun jvocol ec jech chac c'u cha'al li Diose? ¿Me mu to xanojic yu'un li jbec'tal ti li' xanitlajetic o achi'uquique?

²³ “Oyuc boch'o sts'iba ta pech'pech' taq'uin li c'usi chcale oyuc c'uxi te ts'ibabil chcom oe.

²⁴ Oyuc boch'o sts'iba ta ton ta junuc cincel, ts'acal tsnojes ta plomo yo' jech te chcom o sbatel osile.

²⁵ Jna'oj ti cuxul li Jpojvanej cu'une; ta slajeb ja' chlic sva'an sba cu'un li' ta banamil.

²⁶ Ac'o me biq'uitic chlilijan yalel li jnuculile, pero ta to xquil ta jsat xchi'uc jbec'tal li Diose.

²⁷ Vu'un jtuc ta to xcotquin. Vu'un jtuc ta to jq'uel ta jsat, muc yanuc xa o boch'o ta xil. Solel ch-alub xa co'nton avu'unic

²⁸ ti c'alal jech chavalbicune: ‘¿C'u x'elan xu' ta jnet'utic lec? yu'un ja' ta scoj smul stuc ti oy svocole’, xachiic.

²⁹ Pero xi'anic me yu'un li milel chtal ta atojolique, yu'un li Diose ta milel xu' chac' jtojtic li c'usitic chopole. Na'ic me ti oy boch'o chchapanvane —xi li Jobe.