Job 18 - Bible in Tzotzil de Chenalhó with Deuterocanon

Bildad laj yal c'usi tstaic li boch'o chopolique

¹ Li Bildad liquem ta Suae jech la stac':

² —¿Baq'uin to chlaj aval li epal lo'ile? A'ibo lec smelol, ja'o xu' chijlo'ilajutic.

³ ¿C'u yu'un ti chacuyuncutic ta chonbolometique, xchi'uc ti mu'yuc jtucutic ta asate?

⁴ Vo'ot ti chavuts'inta aba atuc ta sc'ac'al avo'ntone, ¿me xu' mu'yuc xa yajval chcom avu'un li banamile? ¿Me xu' chnic avu'un li muc'tic ch'ene?

⁵ Li boch'o oy smulique ta ono'ox xtu'p li sluzique; mu xa xac' xojobal o li sc'oq'uique.

⁶ Ta xtu'p o li slamparaique; mu'yuc xa xojobal luz o ta snaic.

⁷ Ta xlaj sc'oplal ti xteltun, ti xic'xun no'ox chanove; te no'ox chucul chc'ot o ta sbijil stuc.

⁸ Yu'un ta xich' ac'bel ch'ojon ta sbe, jech te yacal chc'ot o.

⁹ Chucul chc'ot ta lazu li yacane; te net'el chc'ot o ta yoquil.

¹⁰ Yu'un te mucbil ta banamil li ch'ojone; oy yoquil te t'inil ta sbe ya'yel.

¹¹ Scotol c'ac'al oy no'ox c'usi ta sibtasat cha'ay; nutsbil no'ox cha'ay ti c'alal chanove.

¹² Chlaj stsatsal ta vi'nal, xchi'uc te xa chapal tal ta sts'el li tsots vocole.

¹³ Ta xpix ta chamel li snuculile; scotol sbec'tal ta xti'at yu'un li mero sba xnich'on lajele.

¹⁴ Ta xbulbat loq'uel li xcuxetel yo'nton te ta snae; te chc'ot ta stojol li muc'ta ajvalil yu'un xi'elal lajele.

¹⁵ Ta xich' ac'bel sc'ac'al li snae, ta xich' lajesel ta azufre ti bu to'ox oye.

¹⁶ Jech ta xtaquij o li yibele; ta xtaquij o li sc'obc'obtaque.

¹⁷ Chlaj sc'oplal o ta alel; mu'yuc xa bu chich' albel o sbi.

¹⁸ Ta xich' loq'uesel ta sac osil, ta xich' jipel batel ta ic' osil, jech chloc' o batel ta banamil.

¹⁹ Mu'yuc xnich'on, mu'yuc smomnich'nab chcom o; mu'yuc xq'uexol chcom o te ta sna.

²⁰ C'alal chvinaj c'u x'elan li xchamel slajele, jun muc'ta xi'el cha'yic li boch'otic oyic ta sloq'ueb c'ac'al xchi'uc ta smaleb c'ac'ale.

²¹ Ja' jech chc'ot ta stojol li boch'o chopol yo'ntone; ja' jech tsta li boch'o chilinta Diose —xi li Bildade.