Job 17 - Bible in Tzotzil de Chenalhó with Deuterocanon

¹ “Ta xtu'p xa batel quic' chca'ay; comcom xa li coraile, te xa chismalaun li muquinale.

² Mu'yuc boch'o yan li' jchi'uc, puru jlabanvanejetic no'ox; ja' te batem co'nton yu'unic li c'usi toj tsots chiyalbicune.

³ “Dios cu'un, c'opojan atuc ta jventa, ac'o vo'ocot jpojubbailot chac'ot; mu'yuc boch'o yan xu' chcalbe ti ac'o c'opojuc ta jtojole.

⁴ Yu'un vo'ot laj xa avovijesbe sjolic li jchi'iltac li'i, ja' yu'un mu me xavac' stsalicun.

⁵ Li boch'otic ta xaq'uic ta c'abal xchi'ilic ta scoj no'ox smotonique ta xlaj yip satic ta ora li xnich'nabique.

⁶ “Laj xa avac' ti vu'un sbel yeicun li cristianoetique; solel yixtolicun xa lic'ot.

⁷ Imac xa jsat ta xc'uxul li jvocole; li coc jc'obe xco'laj xa xchi'uc nac'ubalil.

⁸ Li boch'o tuq'uique ch'ayel chc'ot yo'ntonic ti c'alal chiyilicune; li boch'o mu'yuc smule chlic sjol ta scoj li boch'o chopolique.

⁹ Pero li boch'o tuc' yo'ntone chac' ono'ox persa batel; li boch'o mu'yuc smule yantic ta stsatsub batel.

¹⁰ La'ic li'i, c'opojanic yan velta, yu'un mu'yuc to quiloj boch'o bij avu'unic.

¹¹ “Xquechet no'ox batel li coraile; te xa chlaj sc'oplal o li c'usi chapal cu'une xchi'uc li c'usi oy ta co'ntone.

¹² Vo'oxuque chavalic ti sac osil ti c'alal ja' ac'ubaltique, xchi'uc chavalic ti ta xa sacub tal ti c'alal ic' to osile.

¹³ Li vu'une ja' xa no'ox ta jmala chbat jnain li yavil animaetique, ti chbat mochicun ta ic' osile.

¹⁴ Ja' xa jtot jme', ja' xa jchi'iltac ta voq'uel chc'ot li c'a'ele xchi'uc li xuvitetique.

¹⁵ ¿Bu to oy li c'usi jpatoj co'nton yu'une? ¿Boch'o xu' chil li jlequilal ti sc'oplal ta jtae?

¹⁶ Le'e co'ol chiyal batel ta yavil animaetic jchi'uc; co'ol chbat jcux ta pucuctic jchi'uc —xi li Jobe.