Job 16 - Bible in Tzotzil de Chenalhó with Deuterocanon

Li Jobe la stac'be sutel sc'op li Elifaze

¹ Li Jobe jech lic stac':

² —Ep xa ta velta laj ca'ay ti jech lo'il chac le'e; chapatbicun co'nton avalojic, pero yolbaj no'ox chavac'bicun jvocol.

³ ¿Me mu xlaj ta alel avu'unic li lo'il ti mu'yuc stue? ¿C'usi c'ux laj ava'yic ti jech chatac'bicune?

⁴ Ti vo'coxuc c'otem ta atojolic jech chac c'u cha'al c'otem ta jtojole, xu' chajc'opanoxuc ec jech chac c'u cha'al chac'opanicun ti jechuque; xu' ta jbusanboxuc ta alel c'usiuc no'ox stac' alel ec ti jechuque; xu' ta jimilan jol ta atojolic ec ti jechuque.

⁵ Pero ti vu'cune ta lequil c'op chajc'opanoxuc; chajmuq'uibtasboxuc avo'ntonic, chajpatboxuc avo'ntonic ta sventa avocolic ti jechuque.

⁶ “Me chic'opoje, mu xpaj o li c'usi c'ux chca'ye; me chich'anije, mu x'ech' o li jvocole.

⁷ Yu'un laj xa yalubtasun li Diose; laj xa yulesbun scotol li jchi'iltaque.

⁸ Laj xa sot'ibtasbun li jnuculile; ja' testigo cu'un ti yavinicun xae; ac'o sva'an sba, ac'o yal ta jsat ti ja' melele.

⁹ Solel i'ilin ta jtojol, la scontrainun; biq'uitic libat yu'un ya'yel, la xc'ux ye ta jtojol; te oy o sat ta jtojol jech chac c'u cha'al cajcontra.

¹⁰ Ep boch'otic la xch'oban yeic ta jtojol, ep la stsob sbaic ta jcontrainel; ituch' ta majel xocon jsat yu'unic.

¹¹ Li Diose laj xa yac'un ta sc'ob li j'epalc'opetique; li'och xa ta sc'ob li boch'otic chopolique.

¹² Toj jun to'ox co'nton, pero la spec'tsanun yalel; la sjipun yalel ta lum, biq'uitic libat yu'un ya'yel; la scuyun ta xchanubil c'abal sventa flecha.

¹³ Li' xa setel ta jpat jxocon li flechaetic yu'une; ijelovan ta jch'ut, mu'yuc abul jba laj yilun; imal xa ta banamil li ya'lel quiche.

¹⁴ Solel mu'yuc xa sjam xtuch'emal li jbec'tale; tal snet'uun jech chac c'u cha'al jpasc'op.

¹⁵ “Toj c'ux jvocol laj ca'ay, la jlap c'u'il ti ch'ixlajan ta lapele; la jmuc ta pucuctic li jole.

¹⁶ Itsajub xa ta oq'uel sbejlijil li jsate; xmaclajet xa osil chquil noxtoc.

¹⁷ Pero mu'yuc chopol c'usi jpasoj; toj lec jc'op la jc'opan li Diose.

¹⁸ “Banamil, mu to xabut'bun li jch'ich'ale; mu me teuc macal xcom li chapanel ta jc'an ta stojol Diose.

¹⁹ Li testigo cu'une te oy ta vinajel; li Jc'opojel cu'une te oy ta toyol.

²⁰ Li boch'otic lec jc'opane ja' no'ox ta slabanicun, ja' yu'un ja' ta jmal ya'lel jsat ta stojol li Diose.

²¹ Toj lec ti oyuc boch'o sva'an sba ta jcoltael ta stojol li Diose jech chac c'u cha'al li boch'o tscolta xchi'ile.

²² Pero li jabile xquechet no'ox batel; po'ot xa chibat ti bu mu xa xisut o tale.