Job 15 - Bible in Tzotzil de Chenalhó with Deuterocanon

Li Elifaze tsots la sc'opan li Jobe

¹ Li Elifaz liquem ta Temane, jech laj yal:

² —Li boch'o bije ¿me xu' ti mu'yuc stu li c'usi chloc' ta yee? ¿Me xu' tsnojes ye ta sventa li c'usi mu'yuc stu jech chac c'u cha'al q'uixin iq'ue?

³ ¿Me xu' ti c'upil cha'ay li c'opetic ti mu'yuc stue, ti mu'yuc c'usi ta jtatic o yu'une?

⁴ Jech ec li vo'ote chasoquesbe sc'oplal li Diose; chac'an chalajesbe sc'oplal sc'opanel li Diose.

⁵ Yu'un li avee tsvinajes xa ti chopolote, yu'un ja' laj atunes li c'op ti ja' no'ox chlo'lavane.

⁶ Muc vu'cun chajtic'bot amul, ta ave atuc chvinaj; ja' testigo avu'un li avee.

⁷ “¿Me chanop ti vo'ot ba'yuc lavoc' yu'un li Adane? ¿Me yu'un oyot xa'ox ti c'alal mu'yuc to'ox vitsetique?

⁸ ¿Me vo'ot xava'ibe smelol li c'usi mucul smelol yu'un Diose? ¿Me yu'un vo'ot no'ox atuc ti oy abijile?

⁹ ¿C'usi xana' vo'ot ti mu jna'cutic li vu'uncutique? ¿C'usi xavotquin ti mu xcotquincutic li vu'uncutique?

¹⁰ Yu'un oy moletic cu'uncutic ti saquic xa sjolique, ti ja' xjelov xa smalubelic jech chac c'u cha'al li atote.

¹¹ ¿Me mu xu' o chava'ay ti chasmuq'uibtasbot avo'nton li Diose, xchi'uc ti lec ta c'unil c'op chajc'opanotcutic ec li vu'uncutique?

¹² ¿C'u yu'un ti chastsalot li c'usi oy ta avo'ntone? ¿C'u yu'un ti xcucayin no'ox asat chaq'uelvane?

¹³ ¿C'u yu'un ti cha'ilin ta stojol li Diose? ¿C'u yu'un ti ep c'usitic chaval ta stojole?

¹⁴ Me junuc cristiano mu'yuc boch'o tuc' ta stojol Dios; me junuc boch'o voq'uem ta jun ants ti mu'yuc smul ta stojol Diose,

¹⁵ me ja'uc yaj'almantaltac ti solel lec xa chile, me ja'uc vinajel ti lec xa oy ta stojole.

¹⁶ Jech ¡buuc xa li cristiano ti bats'i chopol, ti boliben o stalele, ti ja' yuch'um o c'otem li c'usi chopol jech chac c'u cha'al chuch' vo'e!

¹⁷ “A'yo ava'ay, ta xcac' lec ana'; ta xcalbot ava'ay li c'usi quiloje.

¹⁸ Ja' li c'usi yalojbun li boch'otic bijique, ti cholbilic comel yu'un ec li smoltotaquique.

¹⁹ Ja' li smoltotaquic ti i'ac'batic comel li banamile, ti mu'yuc bu la scap sbaic xchi'uc yanlumetique.

²⁰ “Li jpasmulil cristianoe ta puru vocol oy ti jayib c'ac'al cuxule; li jsa'c'op cristianoe mu xlaj sc'oplal o ta vocol ti jayib jabil cuxule.

²¹ Toj xi'balic no'ox sba c'usi cha'ay ta xchiquin; c'alal toj jun yo'ntone, ja'o chtal elc'anbatuc scotol c'usitic oy yu'un.

²² Mu xch'un ti xu' chcol loq'uel ta tsots vocole; ja' no'ox te malabil ta espada ya'yel yu'un ac'o chamuc.

²³ Sq'uelanoj xa no'ox ta sve'el xulemetic li sbec'tale, yu'un sna'oj ti persa ono'ox ta xchame.

²⁴ Puru xi'el, puru vocol xa ta x'alubtasat yu'un; tsacbil xa cha'ay jech chac c'u cha'al li boch'o tsacbil xa ta c'op yu'un jun ajvalile.

²⁵ Ja' ta scoj ti la stoy sba ta stojol Diose, ti toj muc' la spas sba ta stojol li Boch'o ech'em svu'ele.

²⁶ Cuchul xa snuc' la spas sba batel ta stojol li Diose; ba'yuc be xa batel yu'un li spimil macubbaile.

²⁷ Ac'o me lec xa juben li sate, me pixem xa ta xepu li xocone,

²⁸ pero chlic naquiuc ta lumetic ti bu mu'yuc yajvale, ti yavnaijem xae, xchi'uc ti puru ton xa te busule.

²⁹ Ja' yu'un mu'yuc tsbalin li sc'ulejale, muc jaluc tstunes; j'ech'el ta xch'ay o sc'oplal ta banamil.

³⁰ Mu xcol o ta tsots vocol; chtaquij o ta c'oc' li sq'uelumtaque; ta yic'al ye Dios no'ox ta xcuchat batel li xniche.

³¹ Ja' lec ti mu spat yo'nton yu'un li c'usi mu'yuc stue, yu'un ja' no'ox puru lo'lael ta sta o.

³² Yu'un ta xich' ts'etel ti c'alal muc to yorailuque; mu'yuc xa bu chyaxub o yan velta li sc'obc'obtaque.

³³ Ja' jech chc'ot jech chac c'u cha'al ts'usub ti mu xyijub sate, jech chac c'u cha'al oliva ti chlilij xniche.

³⁴ Li boch'otic chopolique mu'yuc smomnich'nabtac chcom o; chlaj o ta c'oc' li sna ti pasbil ta slo'labil taq'uine.

³⁵ Ja' jechic jech chac c'u cha'al boch'o chchi'in yol, puru chopol c'usi la svoq'uesic; yu'un puru lo'lavanej c'usi oy ta yo'ntonic —xi li Elifaze.