Job 14 - Bible in Tzotzil de Chenalhó with Deuterocanon

Li Jobe laj yal ti comcom li jcuxlejaltic li' ta banamile

¹ “Li boch'o voq'uem no'ox ta antse comcom no'ox yorail, xchi'uc ta vocol no'ox chcuxi.

² Ja' jech chac c'u cha'al nichim ti ta ora no'ox tsmats'e; chjelov no'ox batel jech chac c'u cha'al yaxinaltic.

³ ¿C'u yu'un te oy asat ta stojol li cristiano ti ja' jech oye? ¿Me chavic' batel ta chapanel ta atojol ti va'ay x'elan oye?

⁴ ¿Boch'o xu' tslecubtas li cristiano ti chopol ono'oxe? ¡Mu'yuc!

⁵ Yu'un li yoraile chlaj no'ox; atbil no'ox avu'un jayib u cuxul; ch'acbil no'ox sc'ac'alil avu'un, mu xu' chjelov.

⁶ Ja' yu'un comtsano jutuc, ac'o xcux jutuc; ac'o to sc'upin ya'ay jayibuc c'ac'al jech chac c'u cha'al jsa'abtel ti tsbalin to li stojole.

⁷ “C'alal ta xich' ts'etel jbej te'e, xu' to chq'uelumaj; xu' to chloc' yan ach' sq'uelum.

⁸ Ac'o me maluben xa li yibele, ac'o me chc'a' xa batel li xchumante'ile,

⁹ pero c'alal ch-ach' ta vo'e, chyaxub yan velta; chloc' lec ach' sq'uelum jech chac c'u cha'al ti bu ch'ium te' toe.

¹⁰ Pero c'alal chcham li cristianoe, j'ech'el ibat o. ¿Bu chbat ti c'alal chchame?

^11-12 “C'alal chcham li cristianoe, mu xa xcha'tal yan velta; mu xa xtal o c'alal to chlaj li vinajele; mu xa xvic' satic o ta vayel. Jech chac c'u cha'al c'alal ch-ul ya'lel li nabe c'alal chtaquij li uc'umetique, j'ech'el chbat o.

¹³ Oyuc c'uxi xanac'un ta yavil animaetique yu'un ac'o jelovuc ba'yuc li sc'ac'al avo'ntone; xu' chavac'be yorail ti c'usi ora chlic to ana'une.

¹⁴ C'alal me icham li cristianoe, ¿me ta to xcuxi yan velta? Li vu'une ja' no'ox ta jmala scotol c'ac'al c'usi ora ch-ech' li jvocole.

¹⁵ Xu' chavic'un, vu'un ta jtac'bot; lec chavilun ti jechuque, yu'un yabtelun ac'ob.

¹⁶ Ja'uc aq'uelbun lec li jujujet cacan chixanove; ja' mu xa chaq'uelbun li jmule.

¹⁷ Ja' xach'aybun o ta avo'nton li c'usi chopol jpasoje; xu' chapocbun loq'uel scotol li jchopolile.

¹⁸ “Li muc'tic vitse ta soc o ti c'alal chjeme; li ch'entique xu' chloc' ta yavilic.

¹⁹ Li tonetique ta xlajic ta yip li uc'ume; jech noxtoc li ts'u'ilume ta xcuchat batel ta vo'; ja' jech chalajesbe sc'oplal c'usi spatoj o yo'nton li cristianoetique.

²⁰ Yu'un vo'ot tsotsot o sbatel osil, li stuque j'ech'el chbat o; j'ech'el chch'ay o sc'oplal avu'un, yu'un j'ech'el chavac' batuc o.

²¹ Ac'o me lec ich'bilic ta muc' chbat li xnich'nabe, pero li stuque mu xa sna' o; me toj abul sba chbat li xnich'nabe, li stuque mu xa xa'ay.

²² Ja' xa no'ox cha'ibe xc'uxul ta sbec'tal stuc li svocole; ja' xa no'ox chat yo'nton ta sventa xch'ulel stuc —xi itac'ov li Jobe.