Job 13 - Bible in Tzotzil de Chenalhó with Deuterocanon

Li Jobe laj yal ta jamal ti jun yo'ntone

¹ “Scotol le'e quiloj lec ta jsat jtuc; jna'oj lec, ca'yoj lec ta jchiquin jtuc.

² Jech chac c'u cha'al xana'ic li vo'oxuque, ja' jech jna'oj ec; mu'yuc bu tsalbilun avu'unic.

³ Li vu'une ja' ta jc'an chic'opoj jchi'uc li Boch'o ech'em svu'ele; ja' ta jc'an ta jtsac ta lo'il li Diose.

⁴ Yu'un li vo'oxuque ja' chanaq'uic c'usitic melel ta sventa ti puru epalc'op chapasique; jpoxtavanejoxuc acuyoj abaic, pero mu'yuc c'usi chapoxtaic me jutuc.

⁵ Ja'uc apajes abaic ta lo'ile; oy to boch'o chal bijoxuc ti jechuque.

⁶ “A'yo ava'yic li c'usi ta xcale; tuc'ulano ava'yic lec li c'usi chloc' ta quee.

⁷ ¿Me xu' cha'epalc'opojic yu'un li Diose? ¿Me xu' chalo'lavanic ta sventa li Diose?

⁸ ¿Me xu' chanopic ti ta sventa Dios chavalic boch'o chc'uxubinate? ¿Me yu'un vo'oxuc chac'opojic sventa chacoltaic ta lo'il li Diose?

⁹ ¿Pero c'usi chc'ot ta pasel c'alal tsjac' c'u x'elan avo'ntonic li Diose? ¿Me xu' avu'un chalo'laic jech chac c'u cha'al jun cristiano?

¹⁰ Me jech no'ox chapasic ti ta sventa Dios chavalic li boch'o chc'uxubinate, ta me xayac'boxuc tsots utel.

¹¹ Li smuc'ul stsatsal Diose chaxi'ic yu'un; li xi'elal stuque xu' te chcom o ta atojolic.

¹² Li ac'opique mu'yuc stu jech chac c'u cha'al tanil c'oc'; li yoyal coralton chapasique puru ta lum pasbil.

¹³ “Ch'anchanic, a'yic c'usi ta xcal, ta xic'opoj; me oy c'usi chtal ta jtojole, ac'o taluc.

¹⁴ ¿C'u yu'un ta jpoj li jbec'tale? ¿C'u yu'un ta jc'an ta jtsac lec ta jc'ob li jcuxlejale?

¹⁵ Me chismilun stuc li Diose, mu c'usi xal co'nton; ja' no'ox venta me la jpoj jba ta stojol ti mu'yuc jmule.

¹⁶ Ti xu'uc ta jva'an jba ta stojol li Diose, ja' coltael chc'ot, yu'un ta stojol Diose mu xu' ch-och li jpasmuliletique.

¹⁷ A'yo lec ava'yic li c'usi chacalboxuque; tuc'ulano lec ava'yic li c'usi ta xcale.

¹⁸ Li' ta orae oy c'usi ta xcal sventa ta jpoj jba o, yu'un jna'oj lec ti mu'yuc jmule.

¹⁹ Me ja' chal stuc Dios ti oy jmule, mu'yuc xa c'usi ta xcal; ja' lec ac'o xa chamcun.

²⁰ “Ja' no'ox chib c'usi ta jc'anbot ta atojol, Dios cu'un, jech mu'yuc bu ta jnac' jba ta atojol sventa chachapanun:

²¹ Loq'ueso xa li yalal ac'ob ta jtojole, xchi'uc mu xa xavac'bun tal ep li xi'ele.

²² C'opanun me, xu' chajtac'bot, o me vu'un ba'yuc chajc'opanote, tac'bun me ec.

²³ ¿C'u yepal li jmul, li jchopolil ta atojole? Albun c'usi li jtoyobbail, c'usi li jmul ta atojole.

²⁴ ¿C'u yu'un ti chanac' asat ta jtojole? ¿C'u yu'un ti acuyojun xa jech chac c'u cha'al avajcontrae?

²⁵ ¿C'u yu'un ti j'ech'el chavoch' li jlic yanal te' ti cuchbil ta iq'ue? ¿C'u yu'un ti chavuts'inta li jobel ti taquin xae?

²⁶ ¿C'u yu'un laj xa aval ti tsots jmul jtaoje? ¿C'u yu'un ti chat'ab to ta avo'nton li jmul ta jbic'tale?

²⁷ Laj axojbun ta lats'ubte' cacan ya'yel; xchi'uc aq'ueloj o scotol c'ac'al ti c'usiuc no'ox ta jpase; lec chaq'uel batel ta jujujet li cacan chixanove.

²⁸ Li jbec'tale ta xlaj batel jech chac c'u cha'al c'usi ch-och xjoch', jech chac c'u cha'al c'u'il ti chich' c'uxel ta chile.