Job 12 - Bible in Tzotzil de Chenalhó with Deuterocanon

Li Jobe laj yal c'u x'elan svu'el, c'u x'elan sbijil li Diose

¹ Itac'ov li Jobe jech laj yal:

² —Ta melel li vo'oxuque toj lec bijoxuc; c'alal me lachamique, te chcham o ec li bijilile.

³ Pero li vu'une oy jbijil ec jech chac c'u cha'al li vo'oxuque; muc toj tsalbilucun avu'unic. ¿Me yu'un chacuyic ti mu'yuc xa boch'o xjelov jutuc ta lo'ile?

⁴ Li vu'une na'lebilun yu'un li boch'otic lec jc'opan jba jchi'uque, vu'un ti tuc' co'nton, ti mu'yuc jmule, ti lec to'ox la stac'bun c'op c'alal la jc'anbe vocol li Diose.

⁵ Li boch'o jun yo'nton cha'ye tsna'le li boch'o oy svocole; mu sventauc me yolbaj tsnet'ic batel li boch'o chbalch'uj xa batele.

⁶ Li j'eleq'uetique mu'yuc c'usi xtal ta yo'ntonic te ta snaic; li boch'o mu sc'anic Diose jun yo'ntonic, tsnopic ti ja' oy ta sc'obic li Diose.

⁷ “Jac'bo ava'yic li chonbolometic xchi'uc li mutetique; xu' ja' chayalboxuc, xu' ja' chaxchanubtasoxuc.

⁸ C'opanic noxtoc li c'usitic ch'iem ta banamile, xu' chayalboxuc ec; xu' chac'opanic noxtoc li choyetic ta nabe, xu' ja' chasjamboxuc lec smelol.

⁹ ¿Me oy c'usitic, me oy boch'otic mu sna'ic ti ta sc'ob Muc'ul Dios la spas scotole?

¹⁰ Ja' oy ta sc'ob xcuxlejal scotol li c'usitic cuxajtique; ja' sventainojbe yorail scotol li cristianoetique.

¹¹ Li chiquinile ja' cha'ay c'u x'elan li boch'o chc'opoje; li jpac'otique ja' cha'ibe smuil li c'usi mue.

¹² “Li jbijiltique te ta jtatic ta stojol li moletique; li sjamubil jba jsatique te ta jtatic ta stojol li boch'otic jal xa xch'ielique.

¹³ Pero li mero jbijiltic, li mero jtsatsaltique, te oy ta stojol Dios; ja' yu'un stuc li tojobtasele xchi'uc li bijubtasele.

¹⁴ Me tslajesbe sc'oplale, mu'yuc boch'o xu' chac' tal yan velta; me chchuc jun cristianoe, mu'yuc boch'o xu' tscolta.

¹⁵ Me tspajes noxtoc li vo'e, chtaquij scotol; me chac' tal scotol noxtoque, chmuc ta vo' li banamile.

¹⁶ Ja' te oy ta stojol stuc li svu'ele xchi'uc li sbijile; ja' oy ta sc'ob noxtoc li jlo'lavaneje xchi'uc li boch'o lo'labile.

¹⁷ Ja' chac' ch'ayuc sbijilic li jbijubtasvanejetique; ja' tsvovijesbe sjolic li jchapanvanejetique.

¹⁸ Ja' chtuch'be yabtelic li ajvaliletique; xu' chac' ti t'anal chich'ic chuquel batele.

¹⁹ Xu' tspojbe yabtel li paleetique; xu' tsyales li boch'otic tsots yabtelique.

²⁰ Xu' tspajes ta lo'il li boch'o chalic ti lec xu' yu'unique; xu' tspojbe sbijil li moletique.

²¹ Xu' chac' ti mu'yuc xa stu ch-ilatic li banquilaletique; xu' tspojbe stsatsalic li boch'otic toj tsotsique.

²² Xu' chac' ta ilel li c'usi oy ta ic'al osile, xu' chac' ta sac osil li c'usi nac'al ta ic' osile.

²³ Xu' yu'un chepajes li muc'tic lumetique, xu' yu'un chules noxtoc; xu' tspucbe batel yajvaltac li jujun banamile, xu' tstsob sutel tal noxtoc.

²⁴ Xu' tspojbe sbijilic li banquilaletic ta jujun lume; xu' chac' ch'ayicuc o batel ta be ta xocol banamil.

²⁵ Xu' jeche' xmachlajetic batel yu'un jech chac c'u cha'al c'alal ic' osil ti mu'yuc luze, xchi'uc xu' chac' ti jeche' xtamlajet chanovic jech chac c'u cha'al jyacubeletique.