Job 11 - Bible in Tzotzil de Chenalhó with Deuterocanon

Lic c'opojuc ec li Zofare

¹ Li Zofar liquem ta Naamate jech lic yal:

² —Li epal lo'il laj xa yich' alele tsc'an stac'ubil. Li boch'o toj ep chlo'ilaje ma'uc to te chvinaj o ti ja' melel c'usi chale.

³ ¿Me chanop ti chipajcutic o ta lo'il ti ep c'usi chavovil ale? ¿Me chanop ti mu'yuc boch'o xu' chastsalot ta sventa li na'leel chavaq'ue?

⁴ Chaval ti lec tuc' c'usi ach'unoje, xchi'uc chaval ti mu'yuc amul ta stojol Diose.

⁵ Tauc sjam ye ta atojol li Diose; tauc xasc'opanote,

⁶ ja' chayac'bot ana' li c'usitic mucul smelol ta sventa sbijile, ti ep ta chop c'u x'elan chca'ibetic smelole. Jech chana' o ti muc ts'acaluc chayac'bot atoj amul ti jechuque, ti mu sta jech yepal chatoj jech chac c'u cha'al stojol tsc'ane.

⁷ “¿Me yu'un xu' avu'un chana'be c'usi mucul oy ta yo'nton li Diose? ¿Me xu' chana'be c'usi tsnop ta yo'nton stuc li Boch'o ech'em svu'ele?

⁸ ¿C'usi xu' avu'un? yu'un li c'usi oy ta yo'nton Diose ja' xjelov to stayalil jech chac c'u cha'al li vinajele. ¿C'usi xana' li vo'ote? yu'un ja' xjelov to smuc'ul jech chac c'u cha'al li yavil animaetique.

⁹ Yu'un ja' xjelov smuc'ul jech chac c'u cha'al li banamile; ja' xjelov sjamalil jech chac c'u cha'al li muc'ta nabe.

¹⁰ Me ital li Diose, me ichucvane, me ch-ic'van ta chapanele, ¿boch'o xu' yu'un tspajes?

¹¹ Yu'un ja' xotquin li boch'o mu'yuc stu c'usi chale; xotquin li boch'o oy smule. ¿Me chacuy ti mu sna'e?

¹² Li bol cristianoe ja' to chbijub c'alal me ic'ataj ta cristiano li te'tical buroe.

¹³ Me chatuq'uibtas avo'nton ta stojol li Diose, me chatoy ac'ob ta stojol sventa chac'anbe vocole,

¹⁴ me chajip loq'uel scotol li amul acuchoje, me mu xavac' ochuc c'usi chopol ta anae,

¹⁵ jech jun avo'nton xu' chatoy asat ta stojol yu'un mu'yuc amul; oy stsatsal avo'nton, mu'yuc c'usi chaxi'be.

¹⁶ Jech chch'ay ta avo'nton li avocole; ja' jech chch'ay batel jech chac c'u cha'al ch-ul batel vo'.

¹⁷ Li acuxlejale ja' xjelov slequil chvinaj jech chac c'u cha'al xojobal c'ac'al ta o'lol c'ac'al; li ic' osil bu to'ox oyote tsacub jech chac c'u cha'al tsacub ta jujun sob.

¹⁸ Jech chmuq'uib avo'nton, jun avo'nton cuxulot; chavil ti chabibilot yu'un Diose, jech jun avo'nton chavay.

¹⁹ C'alal chamochie, mu'yuc boch'o chasibtasot; ep boch'o chtal sc'anic coltael ta atojol.

²⁰ Yan li boch'otic chopolique tsa'ic coltael, pero altic, mu staic bu xu' tsnac' sbaic; ja' xa no'ox oy ta yo'nton tsmalaic li c'usi ora chlaj yorailique —xi li Zofare.