Job 10 - Bible in Tzotzil de Chenalhó with Deuterocanon

Li Jobe toj abul sba laj ya'ay ti c'u x'elan svocole

¹ “Mu xa xnel cu'un ti li' to cuxulune; ta xcal scotol ti c'u x'elan chca'ye, ta jloq'ues scotol xc'uxul yipal li jvocole.

² Dios cu'un, mu me xach'un ti oy jmule; albun ca'ay c'usi jmul avu'un ti jech chapasbune.

³ ¿Me lec chavil ti chavac'bun jvocole, ti chavuts'inta li yabtel ac'obe, ti ja' lec chavil c'usi tsnopic li boch'otic chopolique?

⁴ ¿Me yu'un jech cha'ilvan ec jech chac c'u cha'al ch-ilvan li cristianoetique?

⁵ ¿Me yu'un ja' jech comcom avorail ec jech chac c'u cha'al li cristianoetique? ¿Me yu'un ja' jech mu'yuc nat ajabilal ec jech chac c'u cha'al li boch'o sna' xchamic

⁶ ti jech avochel sa'el bu chopol jpasoje? ¿C'u yu'un ti avochel xchajilanel c'usi jmul jtaoje?

⁷ Yu'un ana'oj ti mu'yuc jmule, xchi'uc ti mu'yuc boch'o xu' chispojun loq'uel ta ac'obe.

⁸ Yu'un vo'ot laj apasun, yabtelun ac'ob, pero li' ta orae chac'an chavulesun.

⁹ Na'o me ti ta lum laj apasune; ¿me yu'un chac'an chac'atajesun ta lum yan velta?

¹⁰ Vo'ot laj apatbun jbec'tal jech chac c'u cha'al tspat sba queso ti c'alal chich' tatubtasel li ya'lel xchu' vacaxe.

¹¹ Laj avac'bun jbec'tal, xchi'uc laj axojbun jnuculil; laj anacananbun lec li jbaquiltaque, xchi'uc laj ajal lec li jch'uxuviltaque.

¹² Laj avac'bun jcuxlejal, xchi'uc laj ac'uxubinun; laj achabiun, jech li' to cuxulun.

¹³ Ta jna' ti oy c'usi anac'oj ta avo'ntone, ti oy c'usi nopbil avu'un ta mucule.

¹⁴ Ja' chaq'uel avil me oy jsa'oj li jmule, yu'un jech oy jmul chavilun o.

¹⁵ Me ta melel oy jmule, toj abul jba; me mu'yuc jmule, ma'uc xcuxet xa co'nton o, yu'un solel laj abic'tajesun, solel mu'yuc xa jtu licom o avu'un.

¹⁶ Me ta jc'ochan muyel jole, chavac'bun jvocol jech chac c'u cha'al tspas jcot león c'alal tstsac sve'ele; chavac' ta ilel sq'uelubil atsatsal sventa chavac'bun jvocol.

¹⁷ Chavach'ubtasbun yan velta li vocol avac'ojbune; ta x'epaj sc'ac'al avo'nton ta jtojol; mu xapaj o ta yaq'uel jvocol jech chac c'u cha'al jtsob soldadoetic ti mu xpajic o ta pleito c'alal tsjelilan sbaique.

¹⁸ “¿C'u yu'un laj aloq'uesun ta yut xch'ut li jme'e? Ja' lec ti chamcun ono'oxe; mu'yuc boch'o laj yilun ti jechuque.

¹⁹ Ja' lec ti manchuc ayincun ta sba banamile; ja' lec chamenuc livoc' yu'un li jme'e, ta ora libat ta muquinal ti jechuque.

²⁰ Toj nopol xa li coraile, pajesbun to jutuc li jvocole; ac'bun to jliqueluc xcuxetel co'nton,

²¹ yu'un yo'to mu'yuc chibat ti bu mu xa xu' chisut o tale, ja' ti bu puru ic' osile, ti puru xi'elal lajele;

²² ja' li banamil ti bats'i ic'al osil te oye, ti soquem o scotole, ti puru xyaxinal chamel lajel te oye, ti mu'yuc xa smelol oe, ti bu ic'uben xa o li sac osile —xi ta stojol Dios li Jobe.