Job 1 - Bible in Tzotzil de Chenalhó with Deuterocanon

La spasbe poroval yo'nton Job li banquilal pucuje

¹ Oy to'ox jun vinic te ta yosilal Uz, Job sbi. Lec tuc' yo'nton, lec c'usitic la spas, lec yich'oj ta muc' Dios, svoc'oj sba o ta sventa li c'usi chopole.

² Oy vucub squeremetic, xchi'uc oxib stsebetic.

³ Oy vucmil (7,000) sme' xchij, oxmil (3,000) scamello, vo'ob ciento (500) j'abtel-vacaxetic yu'un, ta chabchab yic'oj sba. Vo'ob ciento (500) sme' sburo, xchi'uc bats'i ep smozotac. Ja' no'ox stuc ven jc'ulej te ta sloq'ueb c'ac'al yo' bu nacalique.

⁴ Li xnich'nab Jobe nopen xa'yic tspasic q'uin, chaq'uic ve'el, uch'bajel ta jujun snaic ti c'usi c'ac'alil chc'ot ta stojol jujunique. Chiq'uic ta ve'el ec li oxib stsebalique.

⁵ C'alal chcuch yu'unic spasel li q'uine, li Jobe chic'an li xnich'nabe. Sob chliquic ta yoc'omal; chchic' smoton Dios ta sventa li jujun xnich'nabe, yu'un chac' ta lecubtasel ta sventa smulic. Yu'un li Jobe jech snopoj ta yo'nton: “Oy yic'al oy bu tsta smulic; oy bu chchopolc'opojic ta stojol Dios ta yo'ntonic li jnich'nabe”, xi. Ja' yu'un ja' jech la spasilan o.

⁶ Ta sc'ac'alil c'alal ibat sva'an sbaic ta stojol Dios li yajtuneltac te ta vinajele, te nabal ibat ec li banquilal pucuje.,

⁷ Li Muc'ul Diose jech laj yalbe li banquilal pucuje: —¿Bu la'ay tal? —xut. Itac'ov li banquilal pucuje: —Ay joyibta tal, ay jxan tal scotol li banamile —xi.

⁸ Li Muc'ul Diose jech la sjac'be li banquilal pucuje: —¿Me laj avil li cajtunel Job ti mu'yuc boch'o yan jech te ta banamil jech chac c'u cha'al ti lec tuc' yo'ntone, ti lec c'usitic tspase, ti lec yich'ojun ta muq'ue, xchi'uc ti svoc'oj sba o ta sventa li c'usi chopole? —xut.

⁹ Itac'ov li banquilal pucuje: —Muc jechuc no'ox ti lec yich'ojot ta muc' li Jobe.

¹⁰ Ja' ta sventa ti lec asetuoj ta coral xchi'uc yajnil xnich'nabe xchi'uc scotol li c'usitic oy yu'une. Yu'un chavac'be lec bendición ta sventa scotol li yabtele, ja' yu'un solel i'epaj c'usitic oy yu'un ta banamil.

¹¹ Pero me chapojbe scotol li c'usi oy yu'une, te chavil me mu xlic chopolc'opojuc ta atojol —xut.

¹² Li Muc'ul Diose jech laj yalbe li banquilal pucuje: —Lec oy, scotol li c'usi oy yu'une oy ta ac'ob; ja' no'ox mu xavac' ac'ob ta sbec'tal stuc li Jobe —xut. Li banquilal pucuje iloc' batel ta stojol li Muc'ul Diose.

¹³ Ta yan c'ac'al li xnich'nab Jobe la spasic q'uin ta sna li banquilal xnich'one; te ive'ic, te i'uch'bajic.

¹⁴ Ja'o te ic'ot jun j'almantal ta stojol li Jobe, jech c'ot yalbe: —C'alal ja'o chi'abtejcutic ta loc banamil xchi'uc li vacaxetique, xchi'uc c'alal ja'o te chve'ic ta nopol ec li me' buroetique,

¹⁵ te iloq'uic tal li sabetique; laj yelc'anic batel li vacaxetique, la smilic comel ta espada li amozotaque. Jtuc xa no'ox licol tal sventa tal calbot li c'usi ic'ot ta pasele —xut.

¹⁶ Muc to chlaj yo'nton ta yalel, ic'ot yan j'almantal noxtoc, jech c'ot yal: —Iyal tal c'oc' yu'un Dios ta vinajel, ic'ac' scotol li chijetic xchi'uc li jchabichijetic avu'une. Jtuc xa no'ox licol tal sventa tal calbot li c'usi ic'ot ta pasele —xi.

¹⁷ Muc to'ox chlaj yo'nton ta yalel, ja'o ic'ot yoxibal j'almantal, jech c'ot yal: —Te ic'ot oxtsob caldeaetic, c'ot yilbajinuncutic, laj yelc'anic batel scotol li acamellotaque; la smilic ta espada li amozotaque. Jtuc xa no'ox licol tal sventa tal calbot li c'usi ic'ot ta pasele —xi.

¹⁸ Muc to chlaj yo'nton ta yalel, ic'ot yan j'almantal, jech laj yal: —C'alal te chve'ic, ch-uch'bajic ta sna banquilal anich'on li aqueremetic atsebetique,

¹⁹ iloc' tal muc'ta ic' ta xocol banamil; la syuc' ta xchanjotal xchiquin li nae. Ilom yalel ta sba yac'olic li anich'nabe, jech te ichamic o. Vu'un xa no'ox licol tal yu'un tal calbot —xi.

²⁰ Li Jobe iva'i, la sli' sc'u', yu'un toj abul sba laj ya'ay. La xjux loq'uel stsotsil sjol; la squejan sba sventa chich' ta muc' Dios,

²¹ jech laj yal: —T'analun ono'ox c'alal livoc' yu'un li jme'e, jech t'analun chisut batel noxtoc. Muc'ul Dios laj yac'bun scotol; Muc'ul Dios la spojbun sutel noxtoc. Ich'biluc ta muc' sbi li Muc'ul Diose —xi.

²² Li Jobe mu'yuc la sa' smul ta stojol Dios ta sventa ti jech ic'ot ta pasele; me jutuc mu'yuc ichopolc'opoj ta stojol li Diose.