Jeremías 9 - Bible in Tzotzil de Chenalhó with Deuterocanon

¹ ¡Oyuc c'uxi xc'ataj ta chupleb vo' li jole; oyuc c'uxi xc'ataj ta loq'ueb vo' li jsate, yu'un jech xu' chcoc'ta ta c'ac'al ta ac'ubal li anima jchi'iltaque!

² ¡Oyuc boch'o yac'bun cavil te ta xocol banamil, yu'un te chbat naquicun, yu'un jech xu' ta jvoc' jba batel ta stojol li jchi'iltaque! Yu'un scotolic puru jmulaviletic; yu'un puru chopol stalelic o.

³ Li yoq'uique puru epalc'op tsjip loq'uel jech chac c'u cha'al st'ilesubil flecha. Muc ja'uc laj yac'beic yipal spasel li c'usi melel li' ta cosilaltique; solel isoquic o ta j'ech'el. Ja' yu'un jech chal li Muc'ul Diose: “Solel mu sc'an xiyotquinicun o”, xi.

⁴ Q'uelo me abaic xchi'uc li achi'iltaquique. Mu me xapat avo'nton yu'un li avuts' avalalique, yu'un scotol cuts' calaltic chlo'lavanic ta sbijilic, scotol jchi'iltactic ta sa'ilanbe sba smulic.

⁵ Puru slo'lael xchi'ilic tspasic jujunic; mu'yuc boch'o melel c'usi chal. Solel nopen xa xa'yic li puru epalc'ope; ja' xa yac'oj yo'ntonic o spasel li c'usi chopole.

⁶ Ja' yu'un jech chal li Muc'ul Diose: “Ja' te tiq'uilic o ta lo'lavanej. Ta sventa ti ja' bats'i jlo'lavanejetique jech muc sc'an xiyotquinicun o.

⁷ Ja' yu'un, jech chcal vu'un li Muc'ul Diosun, vu'un ti ta jpas ta mantal scotol te ta vinajele: A'yo ava'yic, ta xcunijesic quic ta c'oc', ta jq'uelbe quic c'u x'elan yo'ntonic. ¿C'usi yan xu' ta jpas ta stojolic li jteclumale?

⁸ Li yoq'uique ja' jech chac c'u cha'al flecha ti lec ts'ubts'ub sni'e, yu'un tojtoj tuch'el chijc'ot yu'un ti c'alal chlo'lavanique. Lec xa sc'opanic yilel li xchi'ilique, pero ta yut yo'ntonique te tsnop c'usi chopol tspasbeic.

⁹ ¿Me mu'yuc ta xcac'be stoj smulic ta sventa ti jech tspasique? ¿Me mu'yuc ta xcac'be stoj li jun banamil ti ja' jech tspase?”, xi li Muc'ul Diose.

¹⁰ Ta xlic coc'ta jba ta sventa li vitsetique, ta xcat co'nton ta sventa li stenlejaltique, yu'un solel ta xyavnaijic o, me junuc mu'yuc xa boch'o te chjelov o. Mu'yuc xa chvinaj chbac' ts'unub-ovoliletic; c'alal ta mutetic, c'alal ta chonbolometic ta xi'ic, ta xjatovic o batel.

¹¹ “Ta jc'atajes ta jbus no'ox ton li lum Jerusalene; yavil oq'uiletic ta xc'ot. Li lumetic ta Judae ta jc'atajes ta xocol banamil, mu'yuc xa boch'o te nacal chcom”, xi li Diose.

¹² ¿Boch'o lec bij ti xa'ibe lec smelol le'e? ¿Me oy boch'o xu' ch-ac'bat sna' yu'un Muc'ul Dios, yu'un jech chalbe lec smelol ca'itic? ¿C'u yu'un xch'ijan icom li banamile? ¿C'u yu'un ti xco'laj xchi'uc xocol banamil icom ti mu xa junuc boch'o te chjelove?

¹³ Jech chal li Muc'ul Diose: “Yu'un muc xich'ic ta muc' li jmantaltac laj cac'beique; muc xch'unic li c'usi laj cale, muc ja'uc la spasic batel.

¹⁴ Ja' no'ox la spasic li c'usi ital ta yo'nton stuquique; ja' laj yich'ic ta muc' li baaletic jech chac c'u cha'al ichanubtasatic yu'un li stot sme'ique.

¹⁵ Ja' yu'un jech chcal vu'un li Muc'ul Diosune, vu'un ti jventainoj scotole, vu'un li Diosun yu'un Israele: Li lum le'e ta xcac'be slo'ic ch'ail vomol, ta xcac'be yuch'ic vo' ti oy svenenoale.

¹⁶ Ta jpuquic batel ta yantic banamil ti mu xotquinique, ti muc ono'ox xotquinic ec li stot sme'ique. Ta xcac' lajicuc ta milel ta espada, ja' to me mu xa junuc cuxul icomique”, xi li Diose.

Yoc'tael lum Jerusalén

¹⁷ Li Muc'ul Dios ti ja' tspas ta mantal scotol te ta vinajele, jech chal: “A'yo ava'yic. Taquic ta iq'uel li antsetic ti lec sna' x'oc' x'avanique, ti ja' yabtelic oe”, xi.

¹⁸ Lec oy, iq'uic me tal ta ora. Ac'o tal yoc'tautic; ac'o tal yaq'uic oc'cutic; ac'o tal yaq'uic loc'uc ya'lel jsatic.

¹⁹ Yu'un te ta Sione chvinaj tal tsots oq'uel avanel: ¡C'uxi ti yantic xa chij'ul batele! Solel lijyal ta q'uexlal ta jyalel, yu'un la jcomtsantic o li cosil jbanamiltique, iyavnaij xa o li jna jc'ulebtique.

²⁰ Antsetic, a'yo ava'yic c'usi chal li Muc'ul Diose; tuc'ulano lec ava'yic li c'usitic chloc' tal ta yee. Chanubtasic ta oq'uel, ta at-o'nton li atsebique, chanubtasic ta oq'uel avanel li achi'iltaquic ta antsile. Jech chavalic chac li'i:

²¹ “Li lajele i'och xa ta jna jc'ulebtic, ic'ot xa c'alal ta pasubmantaletic; ja' tal yules scotol li ololetic cu'untic te ta xoraltique, xchi'uc li queremetic te ta cuxub-o'ntonaletic yu'un lume.

²² Li sbec'talic boch'otic ichamique jeche' te telajtic icomic ta ba banamil jech chac c'u cha'al c'a'ep ti mu'yuc stue, mu'yuc boch'o chtal stsob o, jech chac c'u cha'al chbajan comel trigo yu'un li jtuch'trigoe”, chianic.

Li cristianoe ta sventa sbijil Dios ti oy c'usi xu' yu'une

²³ Jech chal li Muc'ul Diose: “Mu me stoy sba ta sventa sbijil li boch'o lec bije; mu me stoy sba ta sventa lec xu' yu'un li boch'o lec tsotse, xchi'uc mu me stoy sba ta sventa sc'ulejal li boch'o lec jc'uleje.

²⁴ Li boch'o tsc'an lec muc' sc'oplale ja' ac'o muc'uc sc'oplal chc'ot ta sventa ti xiyotquinune, ti sna' ti vu'un jtuc Muc'ul Diosun, ti jc'uxubinvanejune, ti tuc', ti lec scotol c'usi ta jpas li' ta banamile, yu'un ja' toj lec chquil li boch'o jech tspase”, xi li Muc'ul Diose.

²⁵ Jech chal li Muc'ul Diose: “Ta to sta sc'ac'alil ta xcac'be stoj smulic li boch'otic yich'ojic circuncisión xchi'uc li boch'otic mu'yuc yich'ojique,

²⁶ ja' li Egiptoe, li Judae, li Edome, li Amone, xchi'uc li Moabe, xchi'uc scotol li boch'otic te nacalic ta xocol banamil ti chjux stsotsil sjolique. Yu'un scotolic ta jujun banamil mu'yuc yich'ojic circuncisión. Jech ec li israeletique mu'yuc yich'ojic circuncisión ta yo'ntonic ec”, xi.