Jeremías 8 - Bible in Tzotzil de Chenalhó with Deuterocanon

¹ Jech yaloj noxtoc li Muc'ul Diose: “C'alal me ic'ot sc'ac'alil le'e, ta xich'ic jots'bel loq'uel sbaquilic ta smuquinalic li ajvaliletic ta Judae, li banquilaletique, li paleetique, li j'alc'opetique, xchi'uc scotol li jnaclumetic ta Jerusalene.

² Te no'ox tanpuc chbat ta osilaltic ta sba ta sat li c'ac'al, li u, xchi'uc li c'analetique, yu'un ja' laj yich'ic ta muc', ja' itunic yu'un, ja' la sts'aclinic o, ja' la sjac'beic li c'usi tsjaq'uique, ja' la squejan sbaic ta stojol. Mu'yuc boch'o chtal stsobbe li sbaquilique, mu'yuc boch'o chtal smuc, te no'ox chch'ay batel ta banamil jech chac c'u cha'al c'a'ep.

³ Ti c'u to yepal cuxul chcomic li chopol cristianoetic le'e, mu xa sc'an ti cuxulique, ja' xa no'ox tsc'an xchamel slajelic te ta banamil ti buyuc no'ox ta jpuquic batele. Vu'un chcal jtuc, vu'un li Muc'ul Diosun ti ta jpas ta mantal scotol te ta vinajele”, xi.

I'albatic c'u x'elan chtal svocolic li israeletique

⁴ “Jeremías, li c'usi chacalbot li'i, ja' jech xavalbe ya'yic li cu'untaque: ‘Li boch'o ta xyal ta lume ¿me mu'yuc bu tstots? Li boch'o tsoc ta bee ¿me mu'yuc chtal stam lec sbe yan velta?

⁵ Pero vo'oxuc ti li' nacaloxuc ta Jerusalene, ¿c'u yu'un ti j'ech'el atoyoj abaic o ta jtojole? ¿C'u yu'un ti chajipilanicun comel ta avo'ntonique? Ja' laj ach'unic o li c'usi mu meleluque; ja' mu xa xac'an xasutic tal o ta jtojol.

⁶ Laj xa ca'ay, laj xa jtuc'ulan lec, pero mu'yuc tuc' chac'opojic, mu'yuc boch'o tsc'an tsutes yo'nton yu'un li smule. Ja' no'ox jech chavalic: ¿C'usi ti chopol jpasoje?, xachiic. Jech ta jujuntal laj atam batel abeic ta anil jech chac c'u cha'al ca'etic ti tsjip sbaic batel ta anil ta pleitoe.

⁷ Li ciguenya mute sna'ojbe lec yorail c'usi ora tsut batel ti bu ono'ox ilic batele; li puruvoc stsue, li grulla mute, xchi'uc li xaval-eq'uenetique sna'oj lec c'usi ora tsutic batel, pero vo'oxuc li jteclumaloxuque mu xana'ic, mu xavotquinic o li mantaletic cu'une.

⁸ ¿C'u x'elan xu' jech chavalic: Li vu'uncutique lec bijuncutic, li' oy ta jc'obcutic li smantaltac Muc'ul Diose, ti xachiique? Yu'un li jts'ibajometic avu'unique laj xa stunesic ta sts'ibael puru epalc'opetic li slapisique; laj xa syanijesic ta ts'ibael li mantaletic cu'une.

⁹ Ja' yu'un li boch'o bijique ta xyalic ta q'uexlal, ta xniquic ta xi'el; ta x'ochic ta c'op-o'nton, yu'un la xa sbajic comel li jmantale. Ja' yu'un ¿bu tsta li sbijilique?

¹⁰ Li yajnilique ta xcac' ta yan viniquetic; li yosilique ta xcac' ochuc yan yajval. Yu'un c'alal ta biq'uit ta muc' ja' batem ta yo'ntonic sa'el li c'usi chtun yu'un stuquique. C'alal ta j'alc'opetic ta paleetic puru lo'lavanej tspasic.

¹¹ Lec xa chpoxtabeic xtuch'emal yilel li jteclumale, jech chalbeic: Lec xa oy, toj lec chbat scotol, xutic, ac'o me toj chopol chbat yu'unic.

¹² ¿Me oy ta xq'uexovic ta sventa ti toj chopol c'usi tspasique? Mu'yuc q'uexlal cha'yic o; bats'i mu sna' xq'uexovic o ta j'ech'el. Ja' yu'un c'alal chcac'be stoj smulique, chyalic o ta lum; nomtic mochajtic chc'otic jech chac c'u cha'al li yantique’, uto”, xi li Muc'ul Diose.

¹³ Jech chal li Muc'ul Diose: “Ta jtuch'ic loq'uel scotolic. Mu xa jbejuc sat sts'usub chcom ta ts'usubtic; mu xa jbejuc sat higo chcom ta higoaltic, xchi'uc chlilij scotol li yanale. Jelovel no'ox chjelov li c'usi laj cac'beic oxe”, xi.

¹⁴ Jech chlic yalic li yu'untac Diose: “¿C'u yu'un ti li' no'ox chotolutique? Batic jcotoltic, ochcutic ta lumetic ti lec setbilic ta coraltone; te ac'o lajcutic o ta milel. Yu'un li Muc'ul Dios cu'untique laj xa yac'utic ta lajel, ja' xa laj yac' cuch'tic o li vo' ti oy svenenoale, yu'un ep xa la jsa' jmultic ta stojol.

¹⁵ La jmalatic c'usi ora ta jtatic jun co'ntontic, pero mu'yuc c'usi lec ital ta jtojoltic. La jmalatic li poxtaele, pero ja' no'ox ital jvocoltic.

¹⁶ ¡Tal xa li cajcontratique! Taj to ta Dan xvinaj xjuch'te-juch'te tal yic'al sni' li sca'ique. Chnic xa scotol banamil yu'unic li yech'al ye sca'ic ti sts'ijlajetic no'ox tale. Ja' xa tal soquesic li banamil xchi'uc scotol li c'usitic oye; tal soquesic li lumetic xchi'uc scotol li boch'otic te nacajtique”, xiic.

¹⁷ Jech chal li Muc'ul Diose: “Ta jtacboxuc tal orachonetic xchi'uc yantic jti'val chonetic, sventa chtal sti'oxuc; mu'yuc boch'o xu' yu'un tspajes”, xi.

Li Jeremiase toj c'ux svocol laj ya'ay ta scoj li xchi'iltaque

¹⁸ Li xc'uxul jvocole mu x'ech' o; ta xa xtu'p co'nton yu'un chca'ay.

¹⁹ A'yo ava'ay, xvinaj to x'avetic tal ta oq'uel li jchi'iltac te ta namal banamile: “¿Me yu'un mu'yuc xa te oy ta Sión li Muc'ul Diose? ¿Me yu'un mu'yuc te oy li ajvalil yu'une?”, xiic. Li Muc'ul Diose jech chal: “¿C'u yu'un ti la sa'bicun sc'ac'al co'nton ta sventa ti ja' la yich'ic ta muc' li yan diosetic ti mu'yuc stue?”, xi.

²⁰ Jech chal noxtoc li jchi'iltaque: “Ijelov xa yorail li c'aoje, ijelov xa yorail li q'uepelaltique, pero mu'yuc la jtatic o li coltaele”, xiic.

²¹ Toj ep jvocol ta sventa svocol li jchi'iltaque; ep at-o'nton, ep xi'el chca'ay ta jyalel.

²² ¿Me mu'yuc poxil te ta Galaade? ¿Me mu'yuc jpoxtavanej te? ¿C'u yu'un ti mu'yuc bu tsta xpoxilic li jchi'iltaque?