Jeremías 7 - Bible in Tzotzil de Chenalhó with Deuterocanon

Li israeletique i'albatic yu'un Dios ti ac'o sjel stalelique

¹ Li Muc'ul Diose ital sc'opan noxtoc li Jeremiase jech laj yalbe:

² “Bat va'lan te ta sti' jch'ulna, ja' jech xaval chac li'i: Jnaclumetic ta Judá, a'yo ava'ay acotolic c'usi chal li Muc'ul Diose, vo'oxuc ti cha'ochic tal, ti chtal avich'ic ta muc' li'i.

³ Jech chal li Muc'ul Dios ti tspas ta mantal scotol te ta vinajele, ja' li Dios yu'un Israele: ‘Tuq'uibtaso li atalelique, lecubtaso li avabtelique, jech xu' chcac' naclanic o li' ta banamile.

⁴ Mu me xavich'beic ta muc' c'usi chalic li boch'otic ja' no'ox chlo'lavanic ti jech chalilanique: Li'i ja' ch'ulna yu'un Muc'ul Dios; ja' ch'ulna yu'un Muc'ul Dios, ja' ch'ulna yu'un Muc'ul Dios, ti xiique.

⁵ ‘Me chatuq'uibtas atalelic xchi'uc avabtelique, me melel, me tuc' c'usi chapasbe li achi'ilique,

⁶ me mu xavuts'intaic li yanlumetique, li me'on ololetique, li me'on antsetique, me mu'yuc chamalbeic xch'ich'al li' ta banamil li boch'otic mu'yuc smulique, me mu'yuc chbat avich'ic ta muc' li yantic diosetic ti ja' no'ox chasa' avocolic yu'une,

⁷ j'ech'el chcac' naclanic o li' ta avosilalic, ja' li banamil ti j'ech'el cac'ojbeic o li amoltot ayame'ic ta vo'onee.

⁸ ‘A'yo ava'yic, li vo'oxuque ja' no'ox chach'unic li c'usi mu meleluc, ti mu'yuc stue.

⁹ Ja' no'ox cha'elc'ajic, chamilvanic, chamulivajic; oy c'usi chavalic ta jtojol ti mu meleluque. Chachic'beic pom li Baale; ja' chbat avich'ic ta muc' li yantic diosetic ti mu xavotquinique.

¹⁰ Ts'acal chtal ava'an abaic ta jtojol li' ta ch'ulna cu'un ti bu chquich' ich'el ta muq'ue. Chavalic ti lec jun avo'ntonique, ti xu' chapasic o batel li c'usi toj chopol chquile.

¹¹ ¿Me ja' snailch'en j'eleq'uetic chavilic li ch'ulna bu chquich' ich'el ta muq'ue? Lec oy, laj xa quil scotol, vu'un jtuc li Muc'ul Diosune.

¹² Batan avilic te ta Silo ti bu ba'yuc la jpas ch'ulna pasbil ta nucul, ti ja' ba'yuc la jt'uj sventa te chi'ich'at ta muq'ue; bat q'uelavilic c'u x'elan la jpasbe ta scoj smulic li jteclumal ta vo'onee.

¹³ Ep xa ta velta te xivulvun o ta atojolic, pero mu xava'ibicun. Laj quic'oxuc, pero me jutuc muc xatac'bicun. Ta sventa ti jech laj apasic scotol chac le'e, ja' yu'un jech chcal jtuc, vu'un li Muc'ul Diosune:

¹⁴ Li ch'ulna laj cac'boxuc achi'uc amoltotic ta vo'one ti ja' li' chquich' ich'el ta muq'ue xchi'uc ti ja' spatubil avo'ntonic chava'yique, ja' jech ta jpasbe jech chac c'u cha'al la jpasbe li ch'ulna to'ox te ta Siloe.

¹⁵ Ta jloq'uesoxuc ta jtojol, jech chac c'u cha'al la jloq'ues ta jtojol li avuts' avalalic, ja' li smomnich'nabtac Efraine’, xi.

La stoy sbaic ta stojol Dios li israeletique

¹⁶ “Li vo'ote, Jeremías, mu me xac'opanun ta sventa li achi'iltac li'i; mu xac'anbun vocol ta sventaic, yu'un mu'yuc ta xca'ibot ac'op.

¹⁷ ¿Me muc chavil c'usi ta spasic ta lumetic te ta Judá xchi'uc ta xoraltic li' ta Jerusalene?

¹⁸ Li xnich'nabique ja' ta stsobic si'; li totiletique ja' ta stsanic c'oc'. Li antsetique ja' ta svots'ic arina sventa tspasic pan chac'be smotonin li sjalalme'ic ta vinajele. Ta spasic pox sventa chac'beic smotonin li yantic diosetique, pero ja' no'ox chisa'bicun sc'ac'al co'nton ti jech tspasique.

¹⁹ Mu ja'uc no'ox vu'un ti chisa'bicun sc'ac'al co'ntone; ja' stuc chuts'inta sbaic noxtoc, yu'un ja' no'ox sventa chyalic o ta q'uexlal li c'usi tspasique.

²⁰ Ja' yu'un jech chcal vu'un li Muc'ul Diosune, vu'un li Ajvalilune: Li sc'ac'al co'nton ta jmal li' ta banamile, ta jmal ta sba yac'ol cristianoetic, ta sba yac'ol chonbolometic, ta te', ta aq'uetic, xchi'uc ta sba yac'ol scotol li c'usitic chloc' li' ta banamile. Ta stsan jech chac c'u cha'al jun muc'ta tocalte', mu stac' tubel o”, xiyutun li Muc'ul Diose.

I'albatic yu'un Dios ti tstoj smul ta scoj stoyobbail li Judae

²¹ Li Muc'ul Dios ti tspas ta mantal scotol te ta vinajele, ja' li Dios yu'un Israele, jech chal: “Aq'uic ti c'u yepal chic'bil matanal xchi'uc milbil matanal chac'anique; li sbec'tale ti'anic.

²² Ta sc'ac'alil c'alal la jloq'uesic tal ta Egipto li amoltot ayame'ic ta vo'onee, mu'yuc c'usi laj calbeic ta sventa li milbil matanal xchi'uc li chic'bil matanale.

²³ Ja' no'ox jech laj calbeic chac li'i: Ch'unic me li c'usi chacalboxuque, jech vu'un Diosun o avu'unic, jech vo'oxuc jteclumaloxuc o chac'otic ec. Ja' me pasic scotol li c'usi laj calboxuque yu'un jech lec chabatic, xcutic.

²⁴ Pero muc xch'unbicun, muc xich'bicun ta muc'; ja' ono'ox la spasic batel li c'usi tsc'an yo'ntonique. Ta scoj no'ox toj tsots yo'ntonic ep sbolil yo'ntonic ti jech lic sva'lupatinicun comele.

²⁵ Ja' ono'ox jechic o c'alal la jloq'uesic tal ta Egipto li amoltotic ayame'ic ta vo'one; ja' jechoxuc o c'alal to tana. Scotol ora la jtacboxuc tal j'alc'opetic ta atojolic, ja' li cajtuneltaque.

²⁶ Pero muc xavich'ic ta muc', muc xach'unbeic li c'usi laj yalboxuque. Solel laj atsatsubtas avo'ntonic; ech'em to labatic jech chac c'u cha'al li amoltotaquique.

²⁷ “Li vo'ote, Jeremías, albo ya'yic scotol li c'usi laj cale, ac'o me mu sc'an xch'unic; tsots xavapta, ac'o me mu xa stac'boxuc.

²⁸ Jech xaval: ‘Li jun banamil li'i mu sc'an xich'beic ta muc' sc'op li Muc'ul Dios yu'unique; muc sc'anic o tojobtasel yu'un. Solel ich'ay o ta yeic li c'usitic leque, li c'usitic melele’, chian”, xiyutun li Muc'ul Diose.

Laj yich'ic ta muc' yan diosetic te ta Jerusalén

²⁹ ¡Jerusalén, seto loq'uel li stsotsil ajole, jipo batel! ¡Bat oc'tao aba ta toyol vitsetic, yu'un li Muc'ul Diose laj xa sbaj, laj xa sjip li jnaclumetic avu'une; ilinem xa o ta stojolic!

³⁰ Jech chal li Muc'ul Diose: “Q'uelavil, li smomnich'nabtac Judae toj chopol c'usi la spasic ta jsat, yu'un te laj yaq'uic ta jch'ulna li c'usi toj chopol chquile, ja' li sdiosique; solel la sbolibtasic o ti bu chquich' ich'el ta muq'ue.

³¹ La sva'anic noxtoc toyol scajleb matanal, Tofet, te ta stenlejaltic Ben-hinom, sventa te la xchic' squerem stsebic. Ja' la spasic li c'usi mu jechuc calojbeique, ti mu'yuc jech loq'uem ta jol ta co'ntone.

³² Ja' yu'un vu'un chcal jtuc ti ta to sta sc'ac'alil mu'yuc xa jech chich' alel Tofet, o me Stenlejaltic Ben-hinom, mu'yuc xa boch'o xi; Stenlejaltic Milubbailtic, xi xa sbi chc'ot. Li Tofete ja' xa muquinaltic chc'ot, yu'un mu'yuc bu tstaic yavil bu xu' chich'ic muquel li boch'o chchame.

³³ Li sbec'talic li jun ta lum cristianoetic li'i ta xtal ti'aticuc ta mutetic xchi'uc ta chonbolometic; me jutuc mu'yuc boch'o ta sibtas batel.

³⁴ Ta xcac' lajuc sc'oplal ta lumetic li' ta Judá xchi'uc ta xoraltic ta Jerusalén ti xvochetic no'ox, ti stse'inic no'ox ta xcuxetel yo'ntonique. Chlaj sc'oplal ti oy boch'o chmalij, ti oy boch'o tsa' yajnile, yu'un xch'ijan chcom o cu'un”, xi li Muc'ul Diose.