Jeremías 6 - Bible in Tzotzil de Chenalhó with Deuterocanon

Ital yich' setuel yu'un yajcontra li Jerusalene

¹ Smomnich'nab Benjamín, jatovanic loq'uel te ta Jerusalén; sa'ic ti bu xu' chanac' abaique. Jupanic oq'ues te ta Tecoa; aq'uic ta ilel ch'ayil, ja' senyail te ta Bet-haquerem, yu'un oy c'usi toj xi'bal sba, toj tsots vocol ta xlic tal ta norte.

² Ta xcules li yajvaltac Sión ti toj lec scuyoj sbaic, ti stoyoj sbaique.

³ Ta xtal yich'ic contrainel yu'un jchabichijetic xchi'uc xchijic. Te ta spas scarpanaic ta spat xocon; ta jujun tal ti bu oyique te no'ox ta stsac batel sve'elic.

⁴ Jech chalic li yajcontrataque: “Chapano abaic, bat jtsactic ta pleito; bat cac'betic ya'ay ta o'lol c'ac'al. ¡Ay!, ja' chopol ti ta xa xbat c'ac'ale, yu'un ta xa x'ic'um tal li osile.

⁵ Ja' lec bat cac'betic ya'ay ta ac'ubaltic; bat jlilinbetic o ta j'ech'el li coralton yu'une”, xiic.

⁶ Li Muc'ul Dios ti tspas ta mantal scotol te ta vinajele jech yaloj: “Ts'etic te'etic, paso amuyebic ta coralton sventa chacontrainic li Jerusalene. Yu'un li lum le'e persa tstoj smul, yu'un nojem ta sventa c'usitic chopol.

⁷ Yu'un li Jerusalene ja' jech c'otem jech chac c'u cha'al jun nio' ti te xcholchun o scotol c'ac'ale, ja' jech mu xpaj o ta spasel li c'usi chopole. Puru uts'intavanej, puru elec' ta xvinaj te ta stojol; scotol c'ac'al oy ono'ox xchamel, oy no'ox xtuch'emal o chquil.

⁸ Jerusalén, tuq'uibtaso aba, yu'un jech mu xajipot comel ta co'nton, yu'un jech mu xajc'atajesot ta xocol banamil, jech chac c'u cha'al jun banamil ti mu'yuc yajval oe.

⁹ Li Muc'ul Dios ti ja' tspas ta mantal scotol te ta vinajele jech ta xal: “Xquechet ta xich' t'unel scotol me oy to bu chcom li israeletique; ja' jech chac c'u cha'al xquechet chich' c'uxc'ultabel sat ts'usub ta jujujec sc'obe, ja' to me mu xa jbejuc chcome”, xi.

¹⁰ Li vu'une jech la jtac': “¿Me oy boch'o tsc'an cha'ay c'alal me ta jc'opane, me chcalbe jech chac le'e? Q'uelavil, pasemic o ta coc, mu xa'yic o c'opanel; ja' no'ox tsna'leic li ac'ope, mu sc'an xa'yic o.

¹¹ Muc'ul Dios, ista xa co'nton li sc'ac'al avo'ntone; mu xa xcuch cu'un chca'ay ti jech chavalbune”, xcut. Jech laj yalbun li Muc'ul Diose: “Ja' xavac'be xcuch li bic'tal queremetic te ta xoraltique; ja' xavac'be xcuch li muc'tic queremetic yo' bu stsoboj sbaique. Chucbil ac'o baticuc xchi'uc yajnilic li viniquetique, xchi'uc li mol me'eletic ti ep xa sjabilalique.

¹² Li snaic, li yosilic, xchi'uc li yajnilique ta xcac' batuc ta yan, yu'un ta xcac' jc'ob sventa ac'o yich' stojol smulic li jnaclumetic li' ta avosilalique, xichi vu'un li Muc'ul Diosune”, xi.

¹³ “Yu'un c'alal ta biq'uit ta muc' batem ta yo'ntonic sa'el li c'usi chtun yu'un stuquique. C'alal ta j'alc'opetic ta paleetic, puru lo'lavanej tspasic.

¹⁴ Lec xa chpoxtabeic xtuch'emal yilel li jteclumale, jech chalbeic ‘Lec xa oy, toj lec chbat scotol’, xutic, ac'o me toj chopol chbat yu'unic.

¹⁵ ¿Me oy ta xq'uexovic ta sventa ti toj chopol c'usi tspasique? Mu'yuc q'uexlal cha'yic o; bats'i mu sna' xq'uexovic o ta j'ech'el. Ja' yu'un c'alal chcac'be stoj smulique, chyalic o ta lum; nomtic mochajtic chc'otic jech chac c'u cha'al li yantique”, xi li Muc'ul Diose.

Li israeletique muc xch'unic chanubtasel yu'un li Diose

¹⁶ Li Muc'ul Diose jech chalbe noxtoc li yu'untaque: “Va'ano abaic ta be, q'uelo lec avilic. Jac'o c'u x'elan li beetic ta vo'onee; jac'o ava'yic bu li tuq'uil bee. Ja' xat'unic batel, jech cux xi avo'ntonic”, xut. Pero li stuquique jech chalic: “Mu jc'an te xibatcutic”, xiic.

¹⁷ La jva'an jq'uel-osiletic noxtoc, jech laj yalboxuc: “A'yo ava'yic, ta xa xich' jupanel oq'uesetic”, xayutoxuc. Pero jech laj avalic: “Mu jc'an xca'icutic”, xachiic.

¹⁸ Ja' yu'un li Muc'ul Diose jech chal: “A'yo ava'yic cristianoetic ta jujun banamil; q'uelavilic c'usi chc'ot ta pasel ta stojol li cu'untaque.

¹⁹ Banamil, a'yo ava'ay: Ta xcac' taluc vocol ta stojol li jun lum li'i, ja' stojol li c'usi chopol la spasique. Yu'un muc xch'unic li c'usi laj cale; la sbajic li chanubtasel cu'une.

²⁰ ¿C'usi stu cu'un ti chiyich'bicun tal li pom liquem tal ta Sabá xchi'uc li c'usitic toj muic yic' liquem tal ta namal banamile? Li matanal chixchic'bicune mu stac' tsaquel; li milbil matanal chiyac'bicune mu'yuc stu chquil”, xi.

²¹ Ja' yu'un li Muc'ul Diose jech chal: “Ta xcac' sbosiubil yacanic, jech ta xyalic ta lum, co'ol chchamic o c'alal ta totil me'iletic, c'alal ta alab nich'nabetic, c'alal ta boch'otic nopol nacajtic xchi'uquic, xchi'uc c'alal ta boch'otic lec sc'opan sba xchi'uquic”, xi.

²² Jech chal li Muc'ul Diose: “Q'uelavil, ta xtal epal cristianoetic ta stuq'uil norte; ta xtal sjunul lum ta jot to sti' banamil.

²³ Toj ven simaronic, me jutuc mu'yuc c'uxubinel yu'unic o; ta flecha xchi'uc ta jich'il taq'uinetic lec ts'ubajtic sni' ta xmilvanic o. C'alal ch-avanique, ja' jech chac c'u cha'al nab ti xvo'et no'oxe. Cajajtic lec ta ca' chtalic, chapalic tal lec ta sventa chtal stsacoxuc ta pleito, vo'oxuc ti yalab xnich'naboxuc lum Sione”, xi.

²⁴ Li cristianoetic ta Jerusalene jech chalic: “Laj xa ca'ibetic sc'oplal, jech chij'alub xa ta scoj xi'el. Toj tsots at-o'nton xchi'uc c'ux vocol chca'itic jech chac c'u cha'al jun ants ti ta xa xcuxe.

²⁵ Mu xa me xaloq'uic batel; mu xa me xaxanovic ta bebetic, yu'un xi'balic no'ox sba ta jujujot, yu'un li cajcontratique chapalic xa sventa chismilutic”, xiic.

²⁶ Jchi'iltac, lapic c'u'il sventa at-o'nton ti ch'ixlajan ta lapele. Balo abaic ta tan, ato avo'ntonic, oc'tao abaic, jech chac c'u cha'al li boch'o chcham xnich'on ti c'ajumal jun xnich'on oye, yu'un ta xa me xtal li jmilvanej ta jtojoltique.

²⁷ Jech laj yalbun ec li Muc'ul Diose: “Ta jva'anot ta sq'uelel, ta spasbel preva li jteclumal jech chac c'u cha'al chich' q'uelel me oy saquil taq'uin ta tone. Ja' yu'un otquino lec avil li c'usi tspasique.

²⁸ Ja' mero jbajmantal scotolic, ven jlo'iltavanejetic; toj ven tsots yo'ntonic, solel ja' xchi'ilic bronce taq'uin xchi'uc tsatsal taq'uin.

²⁹ Ac'o me tsots chich' jubel ta sjububil li c'oc' sventa chich' chic'bel loq'uel yic'ubal li tone, pero altic no'ox ti tsots ta xich' jubel li c'oq'ue, yu'un mu x'ul o li boch'otic toj chopolique.

³⁰ “Sjipbenal saquil taq'uin”, xi sbi chc'otic, yu'un jipbilic, bajbilic xa yu'un li Muc'ul Diose.