Jeremías 52 - Bible in Tzotzil de Chenalhó with Deuterocanon

I'och ta ajvalilal li Sedequiase

¹ C'alal i'och ta ajvalilal li Sedequiase, yich'oj xa'ox jun xcha'vinic (21) jabil. Buluchib (11) jabil i'abtej ta Jerusalén. Li sme'e Hamutal sbi; ja' stseb yan Jeremías liquem ta lum Libna.

² Pero toj chopol c'usi la spas ta stojol Muc'ul Dios jech chac c'u cha'al la spas li Joacime.

³ Ja' yu'un li Muc'ul Diose i'ilin ta stojol li Jerusalén xchi'uc Judae, jech lic sloq'ues ta stojol. Ts'acal to, li Sedequiase la scontrain li ajvalil ta Babiloniae.

Laj yich' jinesel li Jerusalene

⁴ Ta slajunebal c'ac'al yochel slajunebal u ta sbalunebal jabil yochel ta ajvalilal li Sedequiase, ja'o ital xchi'uc yajsoldadotac li ajvalil ta Babiloniae, tal scontrainic li Jerusalene. Ivul setuic, la spas lec scarpanaic, xchi'uc la spas stec'ubic ta coralton sventa ch-och yac'beic.

⁵ Te setuojic o c'alal to la sta buluchib (11) jabil yochel ta ajvalilal li Sedequiase.

⁶ Ta sbalunebal c'ac'al yochel xchanibal u ta xbuluchibal (11) jabile itsacatic ta vi'nal li cristianoetic te ta lume, jech mu'yuc xa c'usi tsve'ic o.

⁷ Ac'o me te setelic ta spat xocon lum li caldea soldadoetique, pero te lic svomic loq'uel li coraltone. Ja' te ijatovic loq'uel li ajvalil Sedequías xchi'uc scotol yajsoldadotaque. Te iloq'uic batel ta ac'ubaltic ta sjap yo' bu cha'c'ol coralton te ta nopol ts'unubaltic yu'un ajvalile; te ibatic ta sbelal Arabá.

⁸ Pero li soldadoetic yu'un caldeaetique la snutsic batel ta anil li ajvalil Sedequiase; te c'ot staic ta stenlejaltic ta Jericó, jech te i'ictaat comel yu'un scotol yajsoldadotac.

⁹ La xchuquic, laj yiq'uic batel ta stojol ajvalil ta Babilonia te ta lum Ribla ta yosilal Hamat. Li Nabucodonosore te laj yal c'usi ac'o spasbeic li ajvalil Sedequiase.

¹⁰ Laj yal mantal noxtoc ti te ta sat ac'o yac'be ta c'ocanbel sjol li xnich'nab xchi'uc li banquilaletic yu'un Judae.

¹¹ Jech noxtoc laj yac' ta loq'uesbel sbec' sat li ajvalil Sedequiase. Chucul ta cadena laj yiq'uic batel ta Babilonia; ja' jech te chucul o c'alal to icham.

Laj yich' jinesel ch'ulna

¹² Ta slajunebal c'ac'al yochel yo'obal u ta sbalunlajunebal (19) jabil yochel ta ajvalil ta Babilonia li Nabucodonosore, ja'o ital ta Jerusalén li Nabuzaradán, ja' li banquilal soldado yu'un Nabucodonosore, xchi'uc ja' bats'i xchi'il ta abtel.

¹³ La xchic' comel li ch'ulna yu'un Muc'ul Diose, xchi'uc li spasubmantal ajvalile, xchi'uc scotol li naetic ta Jerusalene xchi'uc li muc'tic naetique.

¹⁴ Scotol li caldea soldadoetic ti xchi'inojic batel Nabuzaradane la sjinesic scotol li coralton ta sjoylejal Jerusalene.

¹⁵ Li Nabuzaradane la xchuc batel ta Babilonia scotol li boch'otic te to comenic ta lume, xchi'uc li boch'otic laj xa yac' sbaic ta sc'ob li Nabucodonosore, xchi'uc noxtoc li boch'otic sna'ic c'usiuc no'ox abtelale.

¹⁶ Ja' xa no'ox la scomtsan li me'onetique sventa ja' ac'o stuc'ulanic li ts'usubaltique, xchi'uc ac'o yabtelanic li banamile.

¹⁷ Li caldeaetique la slilinic comel li yoyaltac ch'ulna pasbil ta broncee, xchi'uc li snaclebtaque, xchi'uc li yavil vo' pasbil ta bronce te oy ta xch'ulna Muc'ul Diose. Scotol li bronce taq'uinetique laj yich'ic batel ta Babilonia.

¹⁸ Laj yich'ic batel noxtoc li yavil tane, li palaetique, li xtuch'ubil xmechail candiletique, li muc'tic tazaetique, li cucharaetique xchi'uc scotol li c'usitic pasbilic ta bronce sventa chtun ta stojol Diose.

¹⁹ Jech noxtoc laj yich'ic batel li c'usitic pasbilic ta c'anal taq'uin, ta saquil taq'uine, ja' li yaviltac pome, li muc'tic tazaetique, li bisetique, li candiletique, li yavil ac'ale, li yavil tane, xchi'uc li cucharaetique.

²⁰ Jech noxtoc laj yich'ic batel li chib oyetique, xchi'uc li jun yavil vo'e, xchi'uc li lajchab (12) sloc'obal vacaxetic pasbil ta sventa snaclebtac yavil vo' ti la spas li Salomón ta sventa xch'ulna Muc'ul Diose. Li bronce laj yich'ic batele mu xlaj ta bisel jayib kilo ta scotol.

²¹ Yu'un li jujubej oye ech'em ta vaxquib metro snatil, ja' o'lol svaquibal metro li syijil ta joyobe. Li yute vomol, xchi'uc jpach'lej spimil.

²² Jech noxtoc li jujubej oye oy to yan ac'bil jcoj svolvolil sjol pasbil ta bronce; li jujune ech'em ta chib metro snatil, xchi'uc macbil ta chajchajtaq'uin ta joyob. Ja' pasbil ta bronce, xchi'uc pasbil sloc'obal caranatoetic sventa st'ujumal; ja' co'ol pasbil ta xchibal li oye.

²³ Li sloc'obal sat caranatoetic ta chajchajtaq'uine ja' vo'vinic (100) ta bej yich'oj, pero ja' no'ox vaclajuneb yo'vinic (96) ta bej ti lec xvinaje.

Sc'oplal c'alal chucbil ibatic ta Babilonia li judaetique

²⁴ Li banquilal soldado yu'un ajvalil ta Babiloniae la xchuc batel noxtoc li banquilal pale Seraiase xchi'uc li Sofoniase, ja' li xchibal banquilal palee, xchi'uc li oxib viniquetic ti tsots yabtelic ta xchabiic ch'ulnae.

²⁵ La xchuc batel noxtoc jun banquilal soldado te ta lum, xchi'uc vucub viniquetic ti ja' tscoltaic ta snopel c'usi tsc'an tspas li ajvalile, xchi'uc jun jts'ibajom ti ja' tstsacbe sbi li boch'otic ch-ochic ta soldadoile, xchi'uc yan oxvinic (60) banquilaletic te ta lum.

^26-27 Te laj yic' batel ta stojol ajvalil ta Babilonia ti te oy ta lum Ribla ta yosilal Hamate. Li ajvalil ta Babiloniae te lic yal mantal ti ac'o smilique. Ja' jech laj yich'ic o chuquel loq'uel ta yosilalic li judaetique.

²⁸ Ta svucubal jabil yochel ta ajvalilal li Nabucodonosore ja' la xchuc batel ta Babilonia oxmil xchi'uc oxib xcha'vinic (3,023) ta scotol li judaetique.

²⁹ Ta vaxaclajuneb (18) jabil yochel ta ajvalile ay xchuc loq'uel ta Jerusalén vaxquib ciento xchi'uc lajchab xcha'vinic (832) noxtoc.

³⁰ C'alal oxib xcha'vinic (23) jabil xa'ox yochel ta ajvalile, li Nabuzaradán banquilal jchabivanej yu'une ay xchuc batel vucub ciento xchi'uc vo'ob yoxvinic (745) li judaetique. Ti c'u yepal ic'ot ta scotole ja' chanmil xchi'uc vaquib ciento (4,600).

Li Joaquine iloq'uesat ta chuquel, xchi'uc i'ich'at ta muc' te ta Babilonia

³¹ C'alal vuclajuneb xcha'vinic (37) jabil xa'ox xchuquel batel li Joaquín ajvalil ta Judae, ja'o i'och ta ajvalilal ta Babilonia li Evil-merodaque, ja' ta vo'ob xcha'vinic (25) c'ac'al xa'ox stsacoj li xlajchabal ue. Li ajvalil Evil-merodaque la xc'uxubin li ajvalil Joaquine; la sloq'ues ta chuquel.

³² Lec laj yil sbaic xchi'uc; ja' cajal yabtel ic'ot yu'un ta scotol li yantic ajvaliletic te ta Babiloniae.

³³ La sjelbe li sc'u' ti slapoj to'ox c'alal tiq'uil ta chuquele, xchi'uc laj xchi'in o ta ve'el ti jayib c'ac'al cuxule.

³⁴ Scotol c'ac'al i'ac'bat yu'un ajvalil li c'usitic chtun yu'un ti jayib c'ac'al cuxule xchi'uc c'alal to icham.