Jeremías 51 - Bible in Tzotzil de Chenalhó with Deuterocanon

Ic'ot ta pasel ijin li Babiloniae

¹ Li Muc'ul Diose jech chal: “A'yo ava'yic, ta jtac batel jmilvanej ic' ta Babilonia xchi'uc li jnaclumetic yu'une, yu'un la scontrainicun.

² Ta jtac batel boch'o chbat ic'avanicuc, yu'un jech ac'o cuchaticuc batel ta ic', jech xocol chcom o li yosilalique; yu'un ta buyuc xa no'ox ta xtal yajcontraic c'alal me la sta sc'ac'alil chich'ic vocole.

³ Chapano aflechaic, vo'oxuc ti chavaq'uic flechaetique, ac'o lec li amaquique. Mu me xapasbeic perdón li queremetic yu'un Babiloniae; milic me scotol li soldadoetic yu'une.

⁴ Toj ep boch'otic ta xcham ta yosilal li caldeaetique; te lamal chcomic ta xoraltic.

⁵ Yu'un li Israel xchi'uc Judae mu'yuc jipoj o ta co'nton, vu'un li Muc'ul Diosun ti ta jpas ta mantal scotol te ta vinajele, vu'un li Ch'ul Diosun yu'un Israele, ac'o me solel noj ta mulil li yosilalique, ac'o me toj ep la sta smulic ta jtojol.

⁶ “¡Jatovanic loq'uel ta stojol li Babiloniae, pojo abaic ta milel, yu'un jech mu teuc capal xalajic ta milel ta scoj smulic! Yu'un ja' yorail ta xcac'be spacol, vu'un li Muc'ul Diosune; ja' xa yorail ta xcac'be stojolic ti c'u x'elan stojol tsc'ane.

⁷ Li Babiloniae ja' to'ox jech oy ta jc'ob jech chac c'u cha'al jun bis pasbil ta c'anal taq'uin, iyacubic yu'un li cristianoetic ta banamile; li yantic lumetique laj yuch'beic li sbele, jech ivovij sjolic yu'un.

⁸ Pero ta anil no'ox ta xlom li Babiloniae, toj lilijel chc'ot. Oc'anic, avananic ta stojol. Ich'beic tal jutuc xpoxil ti bu tuch'emique; oy yic'al ta to xcol”, xi li Muc'ul Diose.

⁹ Laj xa cac'betic xpoxil li Babiloniae pero muc xcol. Comtsanic xa, batic ta jlumaltic li jujunutique, yu'un c'otem c'alal to ta toquetic li c'usi chopol spasoje; ic'ot c'alal to ta vinajel li smule.

¹⁰ Ja' la scoltautic, laj xa yac' ta ilel ti lec chijyilutic li Muc'ul Diose. La'ic, bat caltic ta Sión c'u x'elan yabtel li Muc'ul Dios cu'untique.

¹¹ ¡Meltsanic lec li aflechaique; chapanic lec li amaquic sventa pleitoe, yu'un li Muc'ul Diose tsc'an ta xules o li Babiloniae! Laj xa stijbe yo'nton noxtoc li ajvaliletic ta Media ti ac'o oyuc ta yo'nton chulesic ec li Babiloniae. Ja' spacol chac' stuc li Muc'ul Diose; ja' tspacbe sutel sc'oplal c'usi laj yich' pasbel li ch'ulna yu'une.

¹² ¡Toyo abanderaic sventa sq'uelubil ti ac'o xa yich' jinesel li coralton yu'un Babiloniae! ¡Tsatsubtasbeic lec yo'nton li soldadoetique! ¡Va'anic jq'uel osiletic ta toyol! ¡Paso lec anac'ubbailic! Yu'un ta xc'ot xa ta pasel c'usi xchapanoj Muc'ul Dios ta sventa li jnaclumetic ta Babiloniae.

¹³ Babilonia, vo'ot ti setelot lec ta muc'tic uc'umetique, ti toj ep ac'ulejale, li' no'ox c'alal ta xlaj avorail; li' no'ox c'alal chlaj ac'oplal xchi'uc li c'usitic oy avu'une.

¹⁴ Li Muc'ul Dios ti tspas ta mantal scotol te ta vinajele, ta sventa sbi stuc jech chal: “Li avajcontrae noj ta xvul ta atojol jech chac c'u cha'al c'ulubetic; x'avlajetic no'ox ta atojol ti c'alal chvul scontrainicote”, xi.

Q'ueoj ta sventa Dios

¹⁵ Li Muc'ul Diose ta svu'el imeltsaj yu'un li banamile; ta sventa sbijil la xchapan lec, la snacan lec, xchi'uc ta sventa sbijil la xlich'an batel li vinajele.

¹⁶ Ta sc'op no'ox ti tsots xc'ululet tspas li vo' ta vinajele. Ja' ta xac' muyuc ta toyol li toquetic ti oy ta jujujot sti'il banamile; ja' ta xac' noxtoc li sacsevuletic c'alal chac' vo'e; ja' ta sloq'ues tal noxtoc li iq'uetic te ta yavil yu'une.

¹⁷ Li cristianoetique muc bijicuc, bol cristianoetic no'ox. Li boch'otic tspasic sloc'obal sdiosique ta xyalic ta q'uexlal, yu'un puru lo'lael li c'usi spasojique, yu'un mu cuxuluc.

¹⁸ Jech mu'yuc c'usi stu o; ja' no'ox sventa labanel li yabtelique. C'alal yorail chapanele, chch'ayic o batel.

¹⁹ Mu jechuc li Dios yu'un Jacobe, yu'un li stuque ja' laj yac' ayinuc scotol li c'usitic oye. Jech noxtoc li Israele ja' la st'uj sventa chu'unin o; ja' Muc'ul Dios tspas ta mantal scotol te ta vinajel, xi sbi.

Li Babiloniae ja' to'ox itun yu'un Muc'ul Dios sventa laj yac' stojol mulil

²⁰ Jech chal li Muc'ul Diose: “Babilonia, vo'ot to'ox jmarroot, vo'ot to'ox cabtejebot ta sventa pleito. Vo'ot ta aventa la jlilin li muc'tic lumetique; vo'ot ta aventa laj cules li ajvaliletique.

²¹ Vo'ot ta aventa la jlilin ca'etic xchi'uc soldadoetic; vo'ot ta aventa la jlilin caretaetic xchi'uc li boch'otic te cajajtique.

²² Vo'ot ta aventa la jmil viniquetic, antsetic; vo'ot ta aventa la jmil moletic xchi'uc queremetic; vo'ot ta aventa la jmil queremetic, tsebetic.

²³ Vo'ot ta aventa la jmil jchabichijetic xchi'uc xchijic; vo'ot ta aventa la jmil jloc-banamiletic xchi'uc xvacaxic; vo'ot ta aventa la jmil ajvaliletic xchi'uc banquilaletic yu'unic.

Ta stoj smul Babilonia

²⁴ “Te ta asatic ta xcac'be stoj c'usi la spasic te ta Sión li Babilonia xchi'uc caldeaetique”, xi li Muc'ul Diose.

²⁵ “J'ulesvanej, vu'un chajcontrainot, vo'ot ti ja' jechot jech chac c'u cha'al toyol vitse, vo'ot ti laj asoques scotol li banamile. Ta xcac' tal jc'ob sventa chcac'bot atoj amul. Ta jbalijesot batel c'alal to ta ch'entic; ta jc'atajesot jech chac c'u cha'al jun vits ti tocajem sbejlijile.

²⁶ Mu'yuc xa boch'o tstunes o ta sventa chiquin na li tonetic avu'une; mu'yuc xa boch'o tstunes o sventa chich' pasel na, yu'un j'ech'el yavnaijem chacom o”, xi li Muc'ul Diose.

²⁷ “Toyo abanderaic te ta banamil ta sventa li pleitoe. Jupanic oq'ues sventa chchapan sbaic li yantic lumetique, yu'un ac'o bat scontrainic li Babiloniae. Ac'o stsob sbaic tal ta scontrainel li muc'tic ajvaliletic ta Ararat, ta Mini, xchi'uc ta Askenaze. T'ujic junuc banquilal soldado; ac'o talicuc ca'etic jech chac c'u cha'al c'ulubetic ti liquem tal sc'ac'al yo'ntonique.

²⁸ Ac'o xchapan sbaic tal ta scontrainel li muc'tic lumetique, xchi'uc li ajvaliletic ta Mediae, xchi'uc li banquilal soldadoetic, li banquilaletic, xchi'uc scotol ti c'u smuc'ul sventainojique”, xi li Diose.

²⁹ Li banamile ta xnic, ta xbac', yu'un ta xac' c'otuc ta pasel c'usi xchapanoj ta stojol Babilonia li Muc'ul Diose. Ta sc'atajes o ta xocol banamil; mu'yuc xa boch'o te chnaqui o.

³⁰ Li soldadoetic yu'un Babiloniae i'ech' xa yo'ntonic ta paspleito; te xa no'ox snac'oj sbaic ta snac'ubbailic. Mu'yuc xa stsatsal yo'ntonic; ja' xa xchi'ilic ants ic'otic. Ic'ac' xa li slumalique; ic'asan xa li sbaj ti'naetic yu'unique.

³¹ Xyal xmuy no'ox j'almantaletic ta stojol li ajvalil ta Babiloniae, yu'un ja' chalbeic ti ch-och o ta c'abal scotol li slumalique.

³² Ti bu xtuch'ubil uc'um yu'unique ventainbil xa; li spojobbailique chic'bil xa ta c'oc'; li soldadoetic yu'unique solel i'och xi'el ta yo'ntonic.

³³ Yu'un jech chal li Muc'ul Dios ti tspas ta mantal scotol te ta vinajele, ja' li Dios yu'un Israele: “Li Babiloniae ja' jech chc'ot jech chac c'u cha'al yav trigoaltic ti pech'ilanbil ta teq'uel ti c'alal tuch'bil xa li trigoe. Yu'un jutuc xa sc'an sta yorail chich' tuch'el.”

^34-35 Li Jerusalén, ja' li lum Sione, jech chlic yal: “Li Nabucodonosor ajvalil ta Babiloniae la xvoch'iun, biq'uitic la slilinun; jeche' pojol la scomtsanun jech chac c'u cha'al xocol vaso. La sbic'un jech chac c'u cha'al muc'ta chanul nab, lec inoj xch'ut o yu'un li c'usitic lec oy cu'une; yan li scomelale la sjipbun batel. Ja' yu'un li jvocol, li uts'intael laj yac'bune ac'o xcuch ya'ay li Babiloniae. Li jch'ich'al la smalbicune ac'o stoj li caldeaetique”, xi chlic yal.

Li Diose oy c'usi laj yal ta stojol Israel

³⁶ Li Muc'ul Diose jech chal: “A'yo ava'ay, vu'un ta jchapan li avocole, vu'un ta jpac ac'oplal; ta xcules o ta j'ech'el li nabetic xchi'uc li nio'etic yu'un Babiloniae.

³⁷ Puru tontic xa te busul chcom ta Babilonia; yavil oq'uiletic xa chc'ot. Mu'yuc xa yajval chcom o; toj ep xi'elal, toj chopol xa chcom o.

³⁸ Scotolic xme'etic ta oq'uel jech chac c'u cha'al leonetic; x'avetic jech chac c'u cha'al bic'tal leonetic.

³⁹ C'alal toj c'ux c'ac'al cha'yique, oy c'usi ta xcac'be lec yuch'ic, ta xyacubic yu'un, ta xch'ay yo'ntonic; te ch-och o svayelic, sbatel osil mu xa xjulovic o. Jech chcal vu'un li Muc'ul Diosune.

⁴⁰ Ja'o ta xcac' ti ac'o ic'aticuc batel ta milel jech chac c'u cha'al ch'ium chijetic, jech chac c'u cha'al tentsunetic xchi'uc tot chijetic”, xi li Muc'ul Diose.

Sc'oplal c'alal ilaj Babilonia

⁴¹ ¡C'uxi itsalat, c'uxi i'och ta c'abal li Babilonia ti solel puquem sc'oplal ta sbejel banamile! ¡C'uxi ic'ot ta pasel ti yavil xi'el ic'ot yu'un scotol li yantic lumetique!

⁴² Imuc ta nab li Babiloniae; imuc ta stsatsal syuc'benal li nabe.

⁴³ Li lumetic yu'une iyavnaijan; ipas ta xocol banamil, ta taqui banamil. Mu'yuc xa boch'o te chnaqui o; mu'yuc xa boch'o te chjelov o.

⁴⁴ “Ta xcac'be stoj smul li dios Bel ta Babiloniae; ta xcac'be xeta loq'uel li c'usitic i'ac'bat sbiq'ue, jech mu xa xbatic o ta stojol li yantic lumetique. Li coralton yu'un Babiloniae ta xjin scotol.

⁴⁵ Jteclumal, pojo abaic li jujunoxuque; loc'anic batel ta stojol, jech mu xastsacoxuc li sc'ac'al co'nton tsaneme.

⁴⁶ Mu me xaxi'ic, mu me c'u xal avo'ntonic ta scoj li lo'iletic chava'yic li' ta banamile. Yu'un ta jujun jabile yantic xa li a'yejetic chtale. Chava'yic a'yej ta sventa ti oy ep c'op ta banamile xchi'uc ti tscontrain sbaic jpasmantaletique,

⁴⁷ yu'un ta ono'ox sta sc'ac'alil ta xcules scotol li diosetic ta Babiloniae. Li yosilale mu'yuc stu chcom o, xchi'uc noj ta animaetic chcom.

⁴⁸ Li vinajel banamil xchi'uc li c'usitic te oye xcuxet no'ox yo'ntonic chq'uejinic ta sventa li Babiloniae, yu'un ta xtal jmilvanejetic ta norte. Jech chcal vu'un li Muc'ul Diosune.

⁴⁹ Li Babiloniae ta xlaj ta scoj ti ep imilvan ta Israele xchi'uc ta scoj li ep imilvan ta scotol banamile”, xi li Muc'ul Diose.

Sc'oplal c'usi i'albatic judaetic ti c'alal te oyic ta Babiloniae

⁵⁰ Vo'oxuc ti lacolic ta milele, jatovanic batel ta anil, mu me xapajic ta be. Ac'o me nom xa oyoxuc batel, pero na'ic me li Muc'ul Diose, xchi'uc mu me xch'ay ta avo'ntonic li lum Jerusalene.

⁵¹ Li vo'oxuque jech chavalic: “Toj ven q'uexlal laj ca'aytic ti c'alal lijchopolc'optaate; solel mu xa xijva'i ta q'uexlal ya'yel, yu'un li yanlumetique i'ochic batel c'alal ta ch'ul cuarto te ta xch'ulna li Muc'ul Diose”, xachiic.

⁵² Pero jech chal li Muc'ul Diose: “Ta to sta sc'ac'alil ta xcac'be stoj smul li diosetic ta Babiloniae; ta scotol yosilalic ch-avanic ta scoj svocolic.

⁵³ Ac'o me chmuy batel c'alal to ta vinajel li Babiloniae, ac'o me tspas lec snac'ubbail ta toyol, pero vu'un te ta jtacbe batel yajcontra, yu'un ac'o bat yich'ic ulesel”, xi li Muc'ul Diose.

Li Babiloniae ch-ul o ta j'ech'el

⁵⁴ Chvinaj ep oq'uel ta Babilonia, chvinaj tsots vocolajel te ta yosilal li caldeaetique.

⁵⁵ Yu'un ja' stuc Muc'ul Dios ta xules li Babiloniae, jech mu'yuc xa c'usi chbac'. Li yajcontrataque solel xvo'et no'ox jech chac c'u cha'al muc'ta nab; xc'ululet no'ox chvul ta stojolic.

⁵⁶ Yu'un chtal xa yulesel li Babiloniae. Ta xa xich' chuquel li soldadoetic yu'une; ta xa xich' lilinel li flechaetic yu'une. Yu'un li Muc'ul Diose ja' chac' tojolil stuc; ja' chac'be stoj ti c'u x'elan la spasique.

⁵⁷ Li Ajvalil, ja' li Muc'ul Dios ti tspas ta mantal scotol te ta vinajel xi sbie, jech chal: “Ta xcac' yacubicuc li banquilaletic yu'unique, li ajvaliletique, li j'abteletique, li soldadoetique, xchi'uc li bijil viniquetic yu'unique. Jech ta x'och o svayelic sbatel osil; mu'yuc xa ta xjulovic o”, xi.

⁵⁸ Jech chal noxtoc li Muc'ul Dios ti tspas ta mantal scotol te ta vinajele: “Li pimil coralton yu'un Babiloniae j'ech'el ta xjin o scotol; li epal ti'naetic toj muc'tique ta xc'ac' ta c'oc'. Altic laj yac' svocolic ta abtel li cristianoetique; ja' no'ox la slubtsan sbaic sventa chich' chiq'uel ta c'oc'”, xi li Muc'ul Diose.

Li c'usi laj yal Jeremiase bat yalic ta Babilonia

⁵⁹ C'alal xchanibal jabil yochel ta ajvalilal ta Judá li Sedequiase, li j'alc'op Jeremiase oy c'usi laj yalbe li Seraías xnich'on Nerías, smomnich'on Maasiase. Ja' laj yalbe ti ja' ac'o sq'uel, ac'o stuc'ulan li ajvalil Sedequías c'alal chc'otic ta Babiloniae, yu'un ja' ibat xchi'in ti c'alal ibat ta Babiloniae.

⁶⁰ Li Jeremiase la sts'iba ta jpoc vun scotol li c'usi chopol chc'ot ta stojol li Babiloniae; scotol li c'usi ts'ibabile puru ta scontra li Babiloniae.

⁶¹ Li Jeremiase jech laj yalbe li Seraiase: “C'alal chac'ot ta Babiloniae, aptao me scotol li c'usitic ts'ibabil li'i.

⁶² Ts'acal jech xlic ac'opan Dios: ‘Muc'ul Dios, vo'ot laj aval ti chavules o li lum li'i, ti mu'yuc yajval chcom oe; me cristiano, me chonbolom, mu'yuc ta xcom, solel chayavnaijes o’, chian.

⁶³ C'alal me laj avapta li vun li'i, chucbo jbejuc ton, jipo ochel ta uc'um Eufrates,

⁶⁴ jech xaval noxtoc: ‘Ja' jech ta xch'ay o batel li Babiloniae; mu'yuc xa ta xlic o yan velta ta scoj li vocol ta x'ac'bat yu'un Muc'ul Diose’, chian”, xut batel. Ja' no'ox li' c'alal ipaj ya'yej li Jeremiase.